ಮೂಡುಬಿದಿರೆ:  ಇಲ್ಲಿನ ಹದಿನೆಂಟು ಬಸದಿಗಳಲ್ಲಿ ಒಂದಾದ ಸಿದ್ದಾಂತ ಬಸದಿಗೆ ಶನಿವಾರ ಇಳಿ ಮುಂಜಾನೆ ಕಳ್ಳರು ನುಗ್ಗಿ  13 ಕೋಟಿ ಬೆಲೆಬಾಳುವ 16ವಿಗ್ರಹಗಳನ್ನು ಕಳವುಗೈದ ಘಟನೆ ಬೆಳಕಿಗೆ ಬಂದಿದೆ.

ಶನಿವಾರ ಮುಂಜಾನೆ ಮಠದ ಮ್ಯಾನೇಜರ್ ಬಸದಿಯ ಬಾಗಿಲು ತೆರೆದಾಗ ಕಳ್ಳತನ ನಡೆದಿರುವುದು ತಿಳಿದು ಬಂತು. ಮೂಡಬಿದಿರೆಯು ಐತಿಹಾಸಿಕ ಸ್ಥಳವಾಗಿದ್ದು, ಇಲ್ಲಿಗೆ ಪ್ರತಿನಿತ್ಯ ಯಾತ್ರಾರ್ಥಿಗಳು ಬಂದು ಹೋಗುತ್ತಾರೆ. ಸಿದ್ದಾಂತ ಮಂದಿರವು ಗುರುಬಸದಿಯ ಹಿಂದುಗಡೆಯಿರುವ ಮಂದಿರ. ಸುಮಾರು 1.10ರ ವೇಳೆಗೆ ಕಳ್ಳತನ ನಡೆದಿರುವುದು ಸಿ.ಸಿ. ಟಿ.ವಿಯಲ್ಲಿ ದಾಖಲಾಗಿದೆ.

ಕಳ್ಳರು ಮಂದಿರದ ಬಲಬದಿಯ ಕಿಟಕಿಯನ್ನು ಗ್ಯಾಸ್ ಕಟ್ಟರ್ ಮೂಲಕ ಕತ್ತರಿಸಿ ಒಳಗೆ ಬಂದು, ಬಸದಿಯ ಹಾಲ್ ನಲ್ಲಿದ್ದ ಎರಡು ಸಿ.ಸಿ ಕ್ಯಾಮರದ ಸಂಪರ್ಕ ಕಡಿತಗೊಳಿಸಿದ್ದಾರೆ. ಒರ್ವ ಕಳ್ಳ ತನ್ನ ದೇಹಕ್ಕೆ ಸಂಪೂರ್ಣವಾಗಿ ಕವರ್ ಹಾಕಿದ್ದು, ಖಜಾನೆ ಕೋಣೆಯ ಶಟರನ್ನು ಅನ್ನು ಗ್ಯಾಸ್ ಕಟ್ಟರ್ ಮೂಲಕ ಕತ್ತರಿಸುವುದು ಸಿ.ಸಿ ಕ್ಯಾಮರದಲ್ಲಿ ರೆಕಾರ್ಡ್ ಆಗಿದೆ. ಬಸದಿಯಲ್ಲಿ ಸೈರನ್ ವ್ಯವಸ್ಥೆ ಇದ್ದರೂ ತಾಂತ್ರಿಕ ಕಾರಣಗಳಿಂದ ಕಳ್ಳತನವಾಗುವ ಸಂದರ್ಭದಲ್ಲಿ ಸ್ತಬ್ದವಾಗಿತ್ತು.

ಧರ್ಮಸ್ಥಳದ ವಿರೇಂದ್ರ ಹೆಗ್ಗಡೆಯವರ ಎಪ್ರಿಲ್ ತಿಂಗಳಲ್ಲಿ ಒಟ್ಟು ಎಂಟು ಸಿ.ಸಿ. ಕ್ಯಾಮರವನ್ನು ಬಸದಿಗೆ ಕೊಡುಗೆಯಾಗಿ ನೀಡಿದ್ದರು.  ಅದರಲ್ಲಿ ಎರಡು ಹಾಲ್ ನಲ್ಲಿ, ಎರಡು ಖಜಾನೆ ಕೋಣೆಯಲ್ಲಿ ಹಾಗೂ ನಾಲ್ಕು ಕ್ಯಾಮರವನ್ನು ಹೊರಗಡೆ ಅಳವಡಿಸಲಾಗಿದೆ.

ಚಾರು ಕೀರ್ತಿ ಭಟ್ಟಾಕರ ಸ್ವಾಮೀಜಿಯವರು ಅಮೇರಿಕಾ ಪ್ರವಾಸದಲ್ಲಿರುವ ಸಂದರ್ಭವನ್ನು ಉಪಯೋಗಿಸಿದ ಕಳ್ಳರು ಈ ಕ್ರುತ್ಯ ಎಸಗಿದ್ದಾರೆಂದು ಶಂಕಿಸಲಾಗಿದೆ.

ಸ್ಥಳಕ್ಕೆ ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆ, ರಾಜ್ಯ ಸಚಿವ ಅಭಯಚಂದ್ರ ಜೈನ್, ಕಾಂಗ್ರೆಸ್ ಹಿರಿಯ ನಾಯಕ ಜನಾರ್ಧನ ಪೂಜಾರಿ, ಮಾಜಿ ಸಚಿವ ಅಮರನಾಥ ಶೆಟ್ಟಿ ಮೊದಲಾದವರು ಭೇಟಿ ನೀಡಿದ್ದಾರೆ.