ಮಂಗಳೂರು : ಬುಧವಾರ ನಗರದ ಮಿಲಾಗ್ರೀಸ್ ಚರ್ಚ್ ನಲ್ಲಿ ರಾಜ್ಯಸಭೆ ಸದಸ್ಯ, ಹಿರಿಯ ಕಾಂಗ್ರೆಸ್ ಮುಖಂಡ ಆಸ್ಕರ್ ಫರ್ನಾಂಡಿಸ್ ಅವರ ಪುತ್ರ ಓಶಾನ್ ಅವರ ವಿವಾಹವು ಜರುಗಿತು. ವಿವಾಹ ನೆರವೇರಿದ ಬಳಿಕ ನಗರದ ಲೈಟ್‌ಹಿಲ್ ಹೌಸ್ ರಸ್ತೆಯ ಲೇಡೀಸ್ ಕ್ಲಬ್‌ನಲ್ಲಿ ನಡೆದ ರಿಸೆಪ್ಶನ್‌ ನನ್ನು ಏರ್ಪಡಿಸಲಾಗಿತ್ತು. ವಿವಾಹ ಸಮಾರಂಭಕ್ಕೆ ಮುಖ್ಯಮಂತ್ರಿಗಳು, ಹಲವು ಕೇಂದ್ರ ಸಚಿವರು, ನೂರಾರು ಕಾಂಗ್ರೆಸ್ ನಾಯಕರು ಆಗಮಿಸಿದ್ದರು.

ಆಸ್ಕರ್ ಫರ್ನಾಂಡಿಸ್-ಬ್ಲಾಸಂ ಫರ್ನಾಂಡಿಸ್ ದಂಪತಿ ಪುತ್ರ ಓಶಾನ್ ಸ್ಯಾಮ್ ಪಿತ್ರೋಡಾ ಅವರ ಕಂಪನಿಯ ಮಾಹಿತಿ ತಂತ್ರಜ್ಞಾನ ವಿಭಾಗದಲ್ಲಿ ಉದ್ಯೋಗದಲ್ಲಿದ್ದು, ಉಡುಪಿ ಉದ್ಯಾವರದ ಸಾಯಿರಾ ಮತ್ತು ಫ್ರಾನ್ಸಿಸ್ ಕ್ವಾರ್ಡರ್ಸ್ ಅವರ ಪುತ್ರಿಯಾಗಿರುವ ವಧು ಫ್ರೇಝಿಲ್ ಉಡುಪಿಯಲ್ಲಿ ಚಾರ್ಟರ್ಡ್ ಅಕೌಂಟೆಂಟ್.

ವಿವಾಹ ಸಮಾರಂಭಕ್ಕೆ ಮಹಾರಾಷ್ಟ್ರ ಮುಖ್ಯಮಂತ್ರಿ ಪೃಥ್ವಿರಾಜ್ ಚೌಹಾಣ್, ಮೇಘಾಲಯ ಮುಖ್ಯಮಂತ್ರಿ ಮುಕುಲ್ ಸಂಗ್ಮಾ, ರಾಜ್ಯಪಾಲ ಹನ್ಸ್‌ರಾಜ್ ಭಾರದ್ವಾಜ್,  ಕೇಂದ್ರ ಸಚಿವರಾದ ರೆಹಮಾನ್ ಖಾನ್, ಜಿ.ಕೆ. ವಾಸನ್, ಮಲ್ಲಿಕಾರ್ಜುನ ಖರ್ಗೆ, ಕೆ.ಎಚ್.ಮುನಿಯಪ್ಪ, ಮುಖಂಡರಾದ ಜಗದೀಶ್ ಟೈಟ್ಲರ್, ರಮೇಶ್ ಚೆನ್ನಿತ್ತಲ, ವೆಂಕಟ್ರಾವ್, ಕೆ.ಜೆ. ಜಾರ್ಜ್ ಮೊದಲಾದ ಗಣ್ಯ ವ್ಯಕ್ತಿಗಳು ಆಗಮಿಸಿದ್ದರು.