ಮಂಗಳೂರು : ವಿಶ್ವಾದ್ಯಂತದ ಪ್ರವಾಸಿಗರನ್ನು ಹೊತ್ತ, ವಿಶ್ವದ ಅತ್ಯಂತ ವೈಭವೋಪೇತ ಪ್ರವಾಸಿ ಹಡಗು ಎಂ.ವಿ. ರೋಟರ್‌ಡ್ಯಾಮ್ ಗುರುವಾರ ಮಂಗಳೂರಿಗೆ ಆಗಮಿಸಿತು. 1,288  ಪ್ರವಾಸಿಗರು ಹಾಗೂ 598 ಸಿಬ್ಬಂದಿಗಳನ್ನೂಳಗೊಂಡ ಈ ಹಡಗು ಇಟಲಿಯಿಂದ ಹೊರಟು  ಗೋವಾ ಮೂಲಕ ಮಂಗಳೂರಿಗೆ ಆಗಮಿಸಿತು.

ನೆದರ್‌ಲ್ಯಾಂಡ್‌, ಅಮೆರಿಕ,ಇಂಗ್ಲಂಡ್,ಕೆನಡಾ ಹಾಗು ಮೂವರು ಭಾರತೀಯರು ಮತ್ತು ಇತರೆ ಅನ್ಯ ದೇಶದವರು ಹಡಗಿನಲ್ಲಿ ಆಗಮಿಸಿದ್ದರು.  ಪ್ರವಾಸಿಗರು ಮಂಗಳೂರಿನ ಪ್ರೇಕ್ಷಣೀಯ ಸ್ಥಳಗಳಾದ ಮಂಗಳಾದೇವಿ, ಗೋಕರ್ಣನಾಥ ದೇವಸ್ಥಾನ, ಸೈಂಟ್ ಅಲೋಶಿಯಸ್ ಚಾಪೆಲ್, ಗೇರು ಸಂಸ್ಕರಣ ಘಟಕಗಳು, ಕಾರ್ಕಳದ ಏಕಶಿಲಾ ಬಾಹುಬಲಿ ವಿಗ್ರಹ, ಮೂಡುಬಿದ್ರೆಯ ಸೋನ್ಸ್ ಪಾರ್ಮ್, ಸಾವಿರ ಕಂಬದ ಬಸದಿ ಮೊದಲಾದ ಸ್ಥಳಗಳಿಗೆ ಭೇಟಿ ನೀಡಿದರು.

ಹಾಲಂಡ್ ಅಮೆರಿಕ ಲೈನ್‌ನ ಆರು ಹಡಗುಗಳಲ್ಲಿ ಒಂದಾಗಿರುವ ರೋಟರ್ ಡ್ಯಾಮ್ ಅಟ್ಲಾಂಟಿಕ್ ಫ್ಲ್ಯಾಗ್‌ಶಿಪ್‌ನ ಎರಡು ಹಡಗುಗಳಲ್ಲಿ ಒಂದು. ಇಟಲಿಯಲ್ಲಿ 1997ರಲ್ಲಿ ನಿರ್ಮಾಣಗೊಂಡ ಈ ಹಡಗಿನಲ್ಲಿ ಚಿತ್ರಕಲೆ ಮತ್ತು ಹಳೆ ವಸ್ತುಗಳ ಮಹಾ ಸಂಗ್ರಹವಿದೆ. ಇಂಟರ್‌ನೆಟ್ ಸೆಂಟರ್, ಸ್ಪಾ ಮತ್ತು ಫಿಟ್‌ನೆಸ್ ಸೆಂಟರ್‌ನ ಜತೆಗೆ 2 ಮಿಲಿಯನ್ ಅಮೆರಿಕನ್ ಡಾಲರ್‌ಗಿಂತಲೂ ಹೆಚ್ಚಿನ ವೌಲ್ಯದ ಕಲಾಕೃತಿಗಳ ಸಂಗ್ರಹವನ್ನು ರೋಟರ್‌ಡ್ಯಾಮ್  ಒಳಗೊಂಡಿದೆ.

2012-13ನೇ ಸಾಲಿನಲ್ಲಿ ಮಂಗಳೂರು ಬಂದರಿಗೆ ಬಂದ 13ನೇ ಕ್ರೂಸ್ ವೆಸೆಲ್ ಇದಾಗಿದ್ದು, ಮಾರ್ಚ್ ಅಂತ್ಯದೊಳಗೆ ಇನ್ನೆರಡು ಬರುವ ನಿರೀಕ್ಷೆ ಇದೆ ಎಂದು ಎನ್‌ಎಂಪಿಟಿ ಅಧ್ಯಕ್ಷ ಡಾ. ಪಿ. ತಮಿಳ್‌ವಾನನ್ ಹೇಳಿದ್ದಾರೆ.