ಉಡುಪಿ: ಗುಜರಾತಿ ಮೂಲದ ಉದ್ಯಮಿಯೊಬ್ಬರನ್ನು ಹನಿ ಟ್ರ್ಯಾಪ್ ಖೆಡ್ಡಾಕ್ಕೆ ಕೆಡವಿ ದರೋಡೆ ಮಾಡಿದ್ದ ಪ್ರಕರಣದ ಮಹಿಳಾ ಆರೋಪಿಯೊಬ್ಬಳು, ಈಗ ಉಡುಪಿಯ ಪ್ರಸಿದ್ಧ ಉದ್ಯಮಿ ಸಂದೀಪ್ ಸಾಲಿಯಾನ್ ಅವರ ನಿಗೂಢ ಸಾವಿನ ಪ್ರಕರಣದಲ್ಲಿ ಪ್ರಮುಖ ಆರೋಪಿಯಾಗಿ ಪತ್ತೆಯಾಗಿದ್ದಾಳೆ. ಶ್ರೀಮಂತ ವ್ಯಕ್ತಿಗಳನ್ನು ಗುರಿಯಾಗಿಸಿಕೊಂಡು ಕ್ಯಾಸಿನೋಗಳ ಮೂಲಕ ಆಮಿಷವೊಡ್ಡಿ ಹಣ ಲೂಟಿ ಮಾಡುತ್ತಿದ್ದ ಈಕೆಯ ಜಾಲವನ್ನು ಕಂಡು ಸ್ವತಃ ಪೊಲೀಸ್ ಇಲಾಖೆಯೇ ಬೆಚ್ಚಿಬಿದ್ದಿದೆ. ತಲೆಮರೆಸಿಕೊಂಡಿದ್ದ ಮಂಗಳೂರು ಮೂಲದ ಕೊಲೆ ಆರೋಪಿ ಅಕ್ಷತಾ ಎಂ.ಕೆ ಅಲಿಯಾಸ್ ರೂಪಶ್ರೀ ಸಿ. ಎಂಬಾಕೆಯನ್ನು ಗೋವಾ ಪೊಲೀಸರು ಕರ್ನಾಟಕ ಪೊಲೀಸರ ನೆರವಿನೊಂದಿಗೆ ಬೆಂಗಳೂರಿನಲ್ಲಿ ಶುಕ್ರವಾರ (ಜುಲೈ 03) ತಡರಾತ್ರಿ ಯಶಸ್ವಿಯಾಗಿ ಬಂಧಿಸಿದ್ದಾರೆ.
ಉಡುಪಿಯ ಮಲ್ಪೆ ನಿವಾಸಿಯಾಗಿದ್ದ ಜಲ ಕ್ರೀಡಾ ದೋಣಿ ಉದ್ಯಮಿ ಸಂದೀಪ್ ಸಾಲಿಯಾನ್ (42) ಅವರ ಅನುಮಾನಾಸ್ಪದ ಕೊಲೆ ಪ್ರಕರಣದಲ್ಲಿ ಈ ಅಕ್ಷತಾ ಅಲಿಯಾಸ್ ರೂಪಶ್ರೀ ಸಿ. ಹಸ್ತಕ್ಷೇಪ ಇರುವುದು ತನಿಖೆಯಿಂದ ದೃಢಪಟ್ಟಿದೆ. ಈ ಚಾಲಾಕಿ ಮಹಿಳೆಯು ಶ್ರೀಮಂತ ಆಸಾಮಿಗಳನ್ನು ಕ್ಯಾಸಿನೋ ಹಾಗೂ ಹೋಟೆಲ್ಗಳಿಗೆ ಪುಸಲಾಯಿಸಿಕೊಂಡು ಬಂದು ದರೋಡೆ ಮಾಡಲು ಬೃಹತ್ ಜಾಲವನ್ನೇ ಹೆಣೆದಿದ್ದಳು. ಹಣವಂತರನ್ನು ತನ್ನ ರೂಪದ ಬಲೆಯಿಂದ ಸೆರೆಹಿಡಿದು ಹೋಟೆಲ್ ರೂಮ್ಗಳಿಗೆ ಕರೆದೊಯ್ಯುವುದು, ಅಲ್ಲಿ ಅವರಿಗೆ ಮಾದಕ ವಸ್ತು ನೀಡಿ ಪ್ರಜ್ಞಾಹೀನರನ್ನಾಗಿಸಿ ಚಿನ್ನಾಭರಣ ದೋಚುವುದು ಹಾಗೂ ಹನಿ ಟ್ರ್ಯಾಪ್ ವಿಡಿಯೋಗಳನ್ನು ಬಳಸಿ ಬ್ಲ್ಯಾಕ್ಮೇಲ್ ಮಾಡುವುದು ಈಕೆಯ ಪ್ರಮುಖ ಅಪರಾಧ ಶೈಲಿಯಾಗಿತ್ತು ಎಂಬ ಆತಂಕಕಾರಿ ವಿಷಯ ಬೆಳಕಿಗೆ ಬಂದಿದೆ.
ಈ ಹಿಂದೆ ಇದೇ ಮಾದರಿಯಲ್ಲಿ ಗುಜರಾತ್ ಮೂಲದ ಉದ್ಯಮಿ ತೋಮೇಶ್ ಯಾದವ್ ಎಂಬುವವರನ್ನು ಹೋಟೆಲ್ಗೆ ಕರೆದೊಯ್ದು ಪ್ರಜ್ಞೆ ತಪ್ಪಿಸಿ, ಅವರ ಬಳಿಯಿದ್ದ ಸುಮಾರು 2.40 ಲಕ್ಷ ರೂಪಾಯಿ ಮೌಲ್ಯದ ಚಿನ್ನದ ಆಭರಣಗಳನ್ನು ಈಕೆ ಎಗರಿಸಿದ್ದಳು. ಈ ದರೋಡೆಗೆ ಸಂಬಂಧಿಸಿದಂತೆ ಪಣಜಿ ಪೊಲೀಸ್ ಠಾಣೆಯಲ್ಲಿ ಈಗಾಗಲೇ ಕಳ್ಳತನದ ಕೇಸ್ ದಾಖಲಾಗಿತ್ತು. ಇನ್ನು ಈ ಜಾಲಕ್ಕೆ ಬಲಿಯಾದ ಉಡುಪಿಯ ಸಂದೀಪ್ ಸಾಲಿಯಾನ್ ಅವರು ಈ ಹಿಂದೆ ಕರ್ನಾಟಕ ಸರ್ಕಾರದ ಮಾಜಿ ಸಚಿವರಾದ ಪ್ರಮೋದ್ ಮಧ್ವರಾಜ್ ಅವರ ಬಳಿ ಕಾರು ಚಾಲಕರಾಗಿ ಕೆಲಸ ನಿರ್ವಹಿಸುತ್ತಿದ್ದರು. ನಂತರ ಆ ಉದ್ಯೋಗ ಬಿಟ್ಟು ಮಲ್ಪೆಯಲ್ಲಿ ಸ್ವಂತ ಜಲ ಕ್ರೀಡಾ ದೋಣಿ ವ್ಯವಹಾರ ಆರಂಭಿಸಿ, ಅತ್ಯಲ್ಪ ಅವಧಿಯಲ್ಲಿಯೇ ಕರಾವಳಿ ತೀರದ ಪ್ರಮುಖ ಯಶಸ್ವಿ ಉದ್ಯಮಿಯಾಗಿ ಬೆಳೆದಿದ್ದರು.
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
