ಮಂಗಳೂರು : ವಾಣಿಜ್ಯ ಹಾಗೂ ಕೈಗಾರಿಕಾ ಕ್ಷೇತ್ರಗಳಿಗೆ ಆಧುನಿಕ ಅನಿಲ ವ್ಯವಸ್ಥೆಗಳನ್ನು ಒದಗಿಸುತ್ತಿರುವ ದೇಶದ ಪ್ರಮುಖ ಸಂಸ್ಥೆಗಳಲ್ಲಿ ಒಂದಾದ ಪುಣೆ ಗ್ಯಾಸ್, ತನ್ನ 10ನೇ ಎಕ್ಸ್‌ಪೀರಿಯನ್ಸ್ ಸೆಂಟರ್ ಅನ್ನು ಮಂಗಳೂರಿನಲ್ಲಿ ಉದ್ಘಾಟಿಸಿದೆ. ಕರ್ನಾಟಕದಲ್ಲಿ ಬೆಂಗಳೂರಿನ ಬಳಿಕ ಆರಂಭಗೊಂಡ ಸಂಸ್ಥೆಯ ಎರಡನೇ ಕೇಂದ್ರ ಇದಾಗಿದ್ದು, ದಕ್ಷಿಣ ಕನ್ನಡ ಸೇರಿದಂತೆ ಕರಾವಳಿ ಕರ್ನಾಟಕದ ಉದ್ಯಮಗಳಿಗೆ ಅತ್ಯಾಧುನಿಕ ಅನಿಲ ತಂತ್ರಜ್ಞಾನ, ಇಂಧನ ದಕ್ಷತೆ ಮತ್ತು ಸುರಕ್ಷತಾ ಪರಿಹಾರಗಳನ್ನು ಸ್ಥಳೀಯವಾಗಿಯೇ ಒದಗಿಸುವ ಉದ್ದೇಶ ಹೊಂದಿದೆ.
ಕರ್ನಾಟಕ ಸರ್ಕಾರದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವರಾದ ಶ್ರೀ ಯು.ಟಿ. ಖಾದರ್ ಹಾಗೂ ಮಂಗಳೂರು ನಗರ ದಕ್ಷಿಣ ಕ್ಷೇತ್ರದ ಶಾಸಕರಾದ ಶ್ರೀ ಡಿ. ವೇದವ್ಯಾಸ ಕಾಮತ್ ಅವರು ನೂತನ ಕೇಂದ್ರವನ್ನು ಉದ್ಘಾಟಿಸಿದರು. ವಾಣಿಜ್ಯ ಮತ್ತು ಕೈಗಾರಿಕಾ ಉದ್ದೇಶಗಳಿಗೆ ಅಗತ್ಯವಿರುವ ಗ್ಯಾಸ್ ಲೀಕ್ ಪತ್ತೆ ವ್ಯವಸ್ಥೆ, ಒತ್ತಡ ನಿಯಂತ್ರಣ ಸಾಧನಗಳು, ಜನರೇಟರ್‌ಗಳಿಗೆ ಹೊಂದಿಕೊಳ್ಳುವ ಡ್ಯುಯಲ್ ಫ್ಯೂಯೆಲ್ ತಂತ್ರಜ್ಞಾನ ಹಾಗೂ ಅನಿಲ ಮೂಲಸೌಕರ್ಯಕ್ಕೆ ಸಂಬಂಧಿಸಿದ ವಿವಿಧ ಉಪಕರಣಗಳು ಇಲ್ಲಿ ಲಭ್ಯವಿರಲಿವೆ. ಮಂಗಳೂರಿನ ಈ ಕೇಂದ್ರವನ್ನು ಫ್ರಾಂಚೈಸಿ ಪಾಲುದಾರರಾದ ಶ್ರೀಮತಿ ವಿಂದ್ಯಾ ಪೈ ಮತ್ತು ಶ್ರೀ ನಿತ್ಯಾನಂದ ಪೈ ಅವರು ಸ್ಥಳೀಯವಾಗಿ ಮುನ್ನಡೆಸಲಿದ್ದು, ಪುಣೆ ಗ್ಯಾಸ್‌ನ ತಾಂತ್ರಿಕ ತಜ್ಞರು ಮತ್ತು ಆಡಳಿತ ಮಂಡಳಿಯ ಸಹಕಾರವೂ ದೊರೆಯಲಿದೆ.
ಮಂಗಳೂರು ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಗಳು ಆಹಾರೋದ್ಯಮ, ಹೋಟೆಲ್ ಮತ್ತು ಆತಿಥ್ಯ ಕ್ಷೇತ್ರ, ಮೀನು ಸಂಸ್ಕರಣೆ, ಸಮುದ್ರ ಉತ್ಪನ್ನಗಳ ರಫ್ತು, ಗೋಡಂಬಿ ಉದ್ಯಮ, ರಾಸಾಯನಿಕ, ಪೆಟ್ರೋಕೆಮಿಕಲ್, ರಸಗೊಬ್ಬರ ಹಾಗೂ ಉತ್ಪಾದನಾ ವಲಯ ಸೇರಿದಂತೆ ವೈವಿಧ್ಯಮಯ ಉದ್ಯಮ ಚಟುವಟಿಕೆಗಳಿಗೆ ಹೆಸರುವಾಸಿಯಾಗಿವೆ. ಬೈಕಂಪಾಡಿ, ಯೆಯ್ಯಾಡಿ, ಗಂಜಿಮಠ ಮತ್ತು ಕಾರ್ನಾಡ್‌ನಂತಹ ಕೈಗಾರಿಕಾ ಪ್ರದೇಶಗಳು ಈ ಭಾಗದ ಆರ್ಥಿಕ ಬೆಳವಣಿಗೆಗೆ ಪ್ರಮುಖ ಕೊಡುಗೆ ನೀಡುತ್ತಿವೆ. ಇಂತಹ ಉದ್ಯಮಗಳಲ್ಲಿ ಅಡುಗೆ, ಉತ್ಪಾದನಾ ಪ್ರಕ್ರಿಯೆ, ತಾಪನ ಮತ್ತು ಇತರ ಕಾರ್ಯಾಚರಣೆಗಳಿಗೆ ನಿರಂತರ ಹಾಗೂ ಪರಿಣಾಮಕಾರಿ ಇಂಧನ ವ್ಯವಸ್ಥೆಯ ಅಗತ್ಯವಿದೆ. ಈ ಹಿನ್ನೆಲೆಯಲ್ಲಿ ಮಂಗಳೂರು ಮತ್ತು ಸುತ್ತಮುತ್ತಲಿನ ಪ್ರದೇಶಗಳು ಪುಣೆ ಗ್ಯಾಸ್‌ನ ವಿಸ್ತರಣಾ ಯೋಜನೆಯಲ್ಲಿ ಮಹತ್ವದ ಸ್ಥಾನ ಪಡೆದಿವೆ.
ದಕ್ಷಿಣ ಕನ್ನಡ ಜಿಲ್ಲೆಯ ರಫ್ತು ಸಾಮರ್ಥ್ಯವನ್ನು ಗುರುತಿಸಿರುವ ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯವು, ಜಿಲ್ಲಾ ರಫ್ತು ಕೇಂದ್ರ ಯೋಜನೆಯಡಿ ಮೀನು ಉತ್ಪನ್ನಗಳು ಮತ್ತು ಗೋಡಂಬಿಯನ್ನು ಪ್ರಮುಖ ರಫ್ತು ಅವಕಾಶಗಳಾಗಿ ಗುರುತಿಸಿದೆ. ಇದೇ ವೇಳೆ ಕರ್ನಾಟಕ ಪ್ರವಾಸೋದ್ಯಮ ಇಲಾಖೆಯೂ ಮಂಗಳೂರು–ಉಡುಪಿ ಭಾಗದ ಕರಾವಳಿ ಆಹಾರ ವೈವಿಧ್ಯತೆ ಮತ್ತು ಸಮುದ್ರಾಹಾರ ಸಂಸ್ಕೃತಿಗೆ ವಿಶೇಷ ಮಹತ್ವ ನೀಡಿದೆ. ಇಂತಹ ವಾಣಿಜ್ಯ ಚಟುವಟಿಕೆಗಳಲ್ಲಿ ಎಲ್‌ಪಿಜಿ ಬಳಕೆಯನ್ನು ಸಮರ್ಪಕವಾಗಿ ನಿರ್ವಹಿಸುವ ತಂತ್ರಜ್ಞಾನಗಳು ಇಂಧನ ವ್ಯರ್ಥತೆಯನ್ನು ತಗ್ಗಿಸಿ, ನಿರ್ವಹಣಾ ವೆಚ್ಚವನ್ನು ನಿಯಂತ್ರಿಸಲು ನೆರವಾಗಬಲ್ಲವು. ಇದರಿಂದ ಉದ್ಯಮಗಳ ಉತ್ಪಾದನಾ ಸಾಮರ್ಥ್ಯ ಹಾಗೂ ಲಾಭದಾಯಕತೆಯನ್ನು ಹೆಚ್ಚಿಸುವ ಅವಕಾಶವಿದೆ.
ಈ ಸಂದರ್ಭದಲ್ಲಿ ಮಾತನಾಡಿದ ಪುಣೆ ಗ್ಯಾಸ್‌ನ ಕಾರ್ಯನಿರ್ವಾಹಕ ನಿರ್ದೇಶಕ ಹಾಗೂ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಶ್ರೀ ಜೇಸಲ್ ಸಂಪತ್, ಉದ್ಯಮಗಳ ಕಾರ್ಯಾಚರಣಾ ವೆಚ್ಚವನ್ನು ಕಡಿಮೆ ಮಾಡುವುದರ ಜೊತೆಗೆ ಉತ್ಪಾದನಾ ದಕ್ಷತೆಯನ್ನು ಹೆಚ್ಚಿಸುವಲ್ಲಿ ಇಂಧನ ಉಳಿತಾಯದ ಪಾತ್ರ ಅತ್ಯಂತ ಮಹತ್ವದ್ದಾಗಿದೆ ಎಂದು ತಿಳಿಸಿದರು. ದಕ್ಷಿಣ ಕನ್ನಡದ ವೈವಿಧ್ಯಮಯ ಉದ್ಯಮಗಳಿಗೆ ಸಂಸ್ಥೆಯ ತಾಂತ್ರಿಕ ಪರಿಣತಿಯನ್ನು ಇನ್ನಷ್ಟು ಹತ್ತಿರಕ್ಕೆ ತರುವ ಉದ್ದೇಶದಿಂದ ಮಂಗಳೂರಿನಲ್ಲಿ ಕೇಂದ್ರ ಸ್ಥಾಪಿಸಲಾಗಿದೆ ಎಂದರು. ಇಂಧನ ಬಳಕೆಯಲ್ಲಿನ ವ್ಯರ್ಥತೆಯನ್ನು ನಿಯಂತ್ರಿಸುವ ಮೂಲಕ ಪುಣೆ ಗ್ಯಾಸ್‌ನ ಪರಿಹಾರಗಳು ಈಗಾಗಲೇ ಉದ್ಯಮಗಳಿಗೆ ವಾರ್ಷಿಕವಾಗಿ ಸುಮಾರು ₹1,400 ಕೋಟಿ ಉಳಿತಾಯಕ್ಕೆ ನೆರವಾಗುತ್ತಿವೆ. ಇದೇ ರೀತಿಯ ಪ್ರಯೋಜನಗಳನ್ನು ಕರಾವಳಿ ಕರ್ನಾಟಕದ ಉದ್ಯಮಗಳಿಗೂ ವಿಸ್ತರಿಸುವ ವಿಶ್ವಾಸವಿದೆ. ದೇಶದಾದ್ಯಂತ ಸಂಸ್ಥೆಯ 10ನೇ ಅನುಭವ ಕೇಂದ್ರವಾಗಿ ಮಂಗಳೂರು ಘಟಕವು ಆಧುನಿಕ ಅನಿಲ ತಂತ್ರಜ್ಞಾನ ಮತ್ತು ತಾಂತ್ರಿಕ ಸೇವೆಗಳನ್ನು ಸುಲಭವಾಗಿ ತಲುಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಲಿದೆ ಎಂದು ಹೇಳಿದರು.
ಪುಣೆ ಗ್ಯಾಸ್‌ನ ಮಂಗಳೂರು ಫ್ರಾಂಚೈಸಿ ಪಾಲುದಾರರಾದ ಶ್ರೀ ನಿತ್ಯಾನಂದ ಪೈ ಮಾತನಾಡಿ, ಕರ್ನಾಟಕದಲ್ಲಿ ಪ್ರತಿದಿನ ವಾಣಿಜ್ಯ ಬಳಕೆಯ ಎಲ್‌ಪಿಜಿ ಬೇಡಿಕೆ ಸುಮಾರು 850 ಮೆಟ್ರಿಕ್ ಟನ್‌ಗಳಷ್ಟಿದೆ. ಇದು ದಿನವೊಂದಕ್ಕೆ ಸುಮಾರು 44 ಸಾವಿರ ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ಗಳಿಗೆ ಸಮಾನವಾಗಿದೆ ಎಂದು ವಿವರಿಸಿದರು. ಇಷ್ಟು ದೊಡ್ಡ ಪ್ರಮಾಣದ ಇಂಧನ ಬಳಕೆಯ ಹಿನ್ನೆಲೆಯಲ್ಲಿ ಉದ್ಯಮಗಳಲ್ಲಿ ಅನಿಲ ಬಳಕೆಯ ದಕ್ಷತೆಯನ್ನು ಹೆಚ್ಚಿಸಲು ವಿಫುಲ ಅವಕಾಶಗಳಿವೆ. ಪುಣೆ ಗ್ಯಾಸ್‌ನ ಆಧುನಿಕ ವ್ಯವಸ್ಥೆಗಳ ಮೂಲಕ ಗ್ರಾಹಕರು ಎಲ್‌ಪಿಜಿ ಬಳಕೆಯನ್ನು ಸಮರ್ಪಕಗೊಳಿಸಿ, ಅನಗತ್ಯ ಇಂಧನ ವ್ಯರ್ಥತೆಯನ್ನು ತಡೆದು ಗಣನೀಯ ಪ್ರಮಾಣದ ವೆಚ್ಚ ಉಳಿತಾಯ ಸಾಧಿಸಲು ನೆರವಾಗುವುದು ನಮ್ಮ ಗುರಿಯಾಗಿದೆ ಎಂದು ತಿಳಿಸಿದರು.
ಮಂಗಳೂರಿನ ನೂತನ ಅನುಭವ ಕೇಂದ್ರದಲ್ಲಿ ವಾಣಿಜ್ಯ ಮತ್ತು ಕೈಗಾರಿಕಾ ಸಂಸ್ಥೆಗಳಿಗೆ ಅನುಕೂಲವಾಗುವ ಹಲವು ಆಧುನಿಕ ತಂತ್ರಜ್ಞಾನಗಳನ್ನು ಪರಿಚಯಿಸಲಾಗಿದೆ. ಇವುಗಳಲ್ಲಿ ಪ್ರಮುಖವಾದುದು ಡ್ರೈ ಟೈಪ್ ಎಲ್‌ಪಿಜಿ ವೇಪರೈಸರ್. ಭಾರತದಲ್ಲೇ ಅಭಿವೃದ್ಧಿಪಡಿಸಲಾದ ಪೇಟೆಂಟ್ ತಂತ್ರಜ್ಞಾನ ಹೊಂದಿರುವ ಈ ಸಾಧನವು ದ್ರವ ರೂಪದಲ್ಲಿರುವ ಎಲ್‌ಪಿಜಿಯನ್ನು ಅನಿಲ ರೂಪಕ್ಕೆ ಪರಿವರ್ತಿಸುತ್ತದೆ. ವಿವಿಧ ಉದ್ಯಮಗಳ ಅಗತ್ಯಕ್ಕೆ ತಕ್ಕಂತೆ ಇದರ ಸಾಮರ್ಥ್ಯವನ್ನು ವಿನ್ಯಾಸಗೊಳಿಸಬಹುದಾಗಿದ್ದು, ನಿರಂತರ ಅನಿಲ ಪೂರೈಕೆಗೆ ಸಹಕಾರಿಯಾಗಿದೆ.
ಎಲ್‌ಪಿಜಿನಿಯಸ್ ಸ್ಮಾರ್ಟ್ ಎಲ್‌ಪಿಜಿ ವ್ಯವಸ್ಥೆಯು ಸಂಸ್ಥೆಯ ಪ್ರಮುಖ ಆವಿಷ್ಕಾರಗಳಲ್ಲಿ ಒಂದಾಗಿದೆ. ಜಗತ್ತಿನ ಮೊದಲ ಸ್ಮಾರ್ಟ್ ಎಲ್‌ಪಿಜಿ ವ್ಯವಸ್ಥೆ ಎಂದು ಸಂಸ್ಥೆ ಪರಿಚಯಿಸಿರುವ ಈ ತಂತ್ರಜ್ಞಾನವು ಅನಿಲ ಬಳಕೆಯನ್ನು ಉತ್ತಮಗೊಳಿಸಿ ನಿರಂತರ ಕಾರ್ಯಾಚರಣೆಗೆ ನೆರವಾಗುವಂತೆ ರೂಪಿಸಲಾಗಿದೆ. ಸಿಲಿಂಡರ್‌ಗಳಲ್ಲಿ ಉಂಟಾಗುವ ಅತಿಯಾದ ತಂಪಾಗುವಿಕೆ ಮತ್ತು ಬೆವರುವಿಕೆಯಂತಹ ಸಮಸ್ಯೆಗಳನ್ನು ನಿಯಂತ್ರಿಸುವ ಉದ್ದೇಶ ಹೊಂದಿದೆ. ಸಾಮಾನ್ಯ 19 ಕೆ.ಜಿ. ಸಿಲಿಂಡರ್ ವ್ಯವಸ್ಥೆಗೆ ಪರ್ಯಾಯವಾಗಿ 47.5 ಕೆ.ಜಿ. ಲಿಕ್ವಿಡ್ ಆಫ್‌ಟೇಕ್ (LOT) ಸಿಲಿಂಡರ್‌ಗಳೊಂದಿಗೆ ಕಾರ್ಯನಿರ್ವಹಿಸಬಲ್ಲದು. ಬಳಕೆಯ ಪರಿಸ್ಥಿತಿಗಳಿಗೆ ಅನುಗುಣವಾಗಿ ಎಲ್‌ಪಿಜಿ ವೆಚ್ಚದಲ್ಲಿ ಶೇ.20ರಿಂದ 30ರಷ್ಟು ಉಳಿತಾಯ ಸಾಧ್ಯವಾಗಬಹುದು ಎಂದು ಕಂಪನಿ ತಿಳಿಸಿದೆ.
ಫ್ಯೂಯೆಲ್‌ಫ್ಯೂಷನ್ ಎಂಬ ಮತ್ತೊಂದು ತಂತ್ರಜ್ಞಾನವು ಡೀಸೆಲ್ ಜನರೇಟರ್‌ಗಳಲ್ಲಿ ಡೀಸೆಲ್ ಮತ್ತು ಎಲ್‌ಪಿಜಿಯನ್ನು ಸಂಯೋಜಿಸಿ ಬಳಸಲು ಅವಕಾಶ ಕಲ್ಪಿಸುತ್ತದೆ. ಇದಕ್ಕೆ ಹೊಂದಾಣಿಕೆಯಾಗುವ ಜನರೇಟರ್‌ಗಳಲ್ಲಿ ದುಬಾರಿ ಮರುಅಳವಡಿಕೆ ವ್ಯವಸ್ಥೆಯ ಅಗತ್ಯವಿಲ್ಲದೆ ಡೀಸೆಲ್ ಬಳಕೆಯನ್ನು ಕಡಿಮೆ ಮಾಡಬಹುದಾಗಿದೆ. ಕಾರ್ಯಾಚರಣೆಯ ಸ್ವರೂಪ ಮತ್ತು ಉಪಕರಣದ ಹೊಂದಾಣಿಕೆಯನ್ನು ಅವಲಂಬಿಸಿ ಡೀಸೆಲ್ ಬಳಕೆಯಲ್ಲಿ ಶೇ.70ರವರೆಗೆ ಕಡಿತ ಸಾಧ್ಯವೆಂದು ಸಂಸ್ಥೆ ಹೇಳಿದೆ. ಡೀಸೆಲ್ ಜೊತೆಗೆ ಅನಿಲ ಇಂಧನ ಬಳಸುವುದರಿಂದ ಹೊರಸೂಸುವಿಕೆಯನ್ನು ತಗ್ಗಿಸುವ ಹಾಗೂ ಸ್ವಚ್ಛ ಇಂಧನ ಬಳಕೆಗೆ ಉತ್ತೇಜನ ನೀಡುವ ಪ್ರಯತ್ನಕ್ಕೂ ಇದು ಸಹಕಾರಿಯಾಗಲಿದೆ.
ಅನಿಲ ಸುರಕ್ಷತೆಯ ದೃಷ್ಟಿಯಿಂದ ಲೀಕ್‌ಚೆಕ್ ಮತ್ತು ಹ್ಯಾಂಡ್‌ಹೆಲ್ಡ್ ಸ್ನಿಫರ್ ಸಾಧನಗಳನ್ನು ಕೇಂದ್ರದಲ್ಲಿ ಪರಿಚಯಿಸಲಾಗಿದೆ. ವಾಣಿಜ್ಯ ಹಾಗೂ ಕೈಗಾರಿಕಾ ಘಟಕಗಳಲ್ಲಿ ಸಂಭವಿಸಬಹುದಾದ ಅನಿಲ ಸೋರಿಕೆಯನ್ನು ಗುರುತಿಸಿ, ಮುನ್ನೆಚ್ಚರಿಕೆ ಕ್ರಮ ಕೈಗೊಳ್ಳಲು ಈ ಉಪಕರಣಗಳು ನೆರವಾಗುತ್ತವೆ. ಸಮಯಕ್ಕೆ ಸರಿಯಾಗಿ ಸೋರಿಕೆಯನ್ನು ಪತ್ತೆಹಚ್ಚುವ ಮೂಲಕ ಅಪಾಯಗಳನ್ನು ತಗ್ಗಿಸಿ ಸುರಕ್ಷಿತ ಕಾರ್ಯಾಚರಣೆಗೆ ಅವಕಾಶ ಕಲ್ಪಿಸುತ್ತವೆ.
ಗ್ಯಾಸ್‌ಟ್ರೇನ್ ಪ್ರೆಶರ್ ರೆಗ್ಯುಲೇಷನ್ ವ್ಯವಸ್ಥೆಯು ವಿವಿಧ ಯಂತ್ರೋಪಕರಣಗಳು ಮತ್ತು ಉತ್ಪಾದನಾ ಪ್ರಕ್ರಿಯೆಗಳಿಗೆ ಅಗತ್ಯವಿರುವ ಅನಿಲದ ಒತ್ತಡವನ್ನು ನಿಯಂತ್ರಿಸುತ್ತದೆ. ಇದರಿಂದ ಅನಿಲ ಪೂರೈಕೆಯಲ್ಲಿ ಸ್ಥಿರತೆ ಮತ್ತು ನಿಖರತೆ ಕಾಪಾಡಿಕೊಳ್ಳಲು ಸಾಧ್ಯವಾಗುತ್ತದೆ. ಇದರೊಂದಿಗೆ ವಾಣಿಜ್ಯ ಮತ್ತು ಕೈಗಾರಿಕಾ ಎಲ್‌ಪಿಜಿ ಹಾಗೂ ನೈಸರ್ಗಿಕ ಅನಿಲ ವ್ಯವಸ್ಥೆಗಳಿಗೆ ಅಗತ್ಯವಿರುವ ವಿವಿಧ ಬಿಡಿಭಾಗಗಳು ಮತ್ತು ಬಳಕೆಯ ಸಾಮಗ್ರಿಗಳೂ ಇಲ್ಲಿ ದೊರೆಯಲಿವೆ. ಉದ್ಯಮಗಳ ಅಗತ್ಯಕ್ಕೆ ಸೂಕ್ತವಾದ ಬಿಡಿಭಾಗಗಳನ್ನು ಆಯ್ಕೆಮಾಡಲು ತಾಂತ್ರಿಕ ಮಾರ್ಗದರ್ಶನವನ್ನೂ ಒದಗಿಸಲಾಗುತ್ತದೆ.
ಮಂಗಳೂರಿನ ಪುಣೆ ಗ್ಯಾಸ್ ಅನುಭವ ಕೇಂದ್ರವು ಅಶೋಕನಗರದ ಉರ್ವ ಮಾರಿಗುಡಿ ಸಮೀಪದ ಲೋಟಸ್ ಅಥರ್ವ ಕಟ್ಟಡದಲ್ಲಿರುವ ವಿಂಧ್ಯಾ ಅಪ್ಲೈಯನ್ಸಸ್, ಅಂಗಡಿ ಸಂಖ್ಯೆ FF-10, ಮಂಗಳೂರು–575006 ವಿಳಾಸದಲ್ಲಿ ಕಾರ್ಯನಿರ್ವಹಿಸಲಿದೆ.
ನಾಲ್ಕು ದಶಕಗಳಿಗೂ ಅಧಿಕ ಅನುಭವ ಹೊಂದಿರುವ ಪುಣೆ ಗ್ಯಾಸ್, ವಾಣಿಜ್ಯ ಮತ್ತು ಕೈಗಾರಿಕಾ ಬಳಕೆಗೆ ಅಗತ್ಯವಾದ ಅನಿಲ ಆಧಾರಿತ ಇಂಧನ ವ್ಯವಸ್ಥೆಗಳ ವಿನ್ಯಾಸ, ಅಭಿವೃದ್ಧಿ ಹಾಗೂ ಅನುಷ್ಠಾನದಲ್ಲಿ ಮುಂಚೂಣಿಯಲ್ಲಿದೆ. ಭಾರತ ಸೇರಿದಂತೆ ಜಗತ್ತಿನ 20 ಅಂತರರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಸಂಸ್ಥೆಯ ಕಾರ್ಯಚಟುವಟಿಕೆಗಳು ವಿಸ್ತರಿಸಿವೆ. ಉತ್ಪಾದನೆ, ಆರೋಗ್ಯ ಸೇವೆ, ಹೋಟೆಲ್ ಮತ್ತು ಆತಿಥ್ಯ ಸೇರಿದಂತೆ ವಿವಿಧ ಕ್ಷೇತ್ರಗಳ ಸಾವಿರಾರು ಗ್ರಾಹಕರು ಸಂಸ್ಥೆಯ ಎಲ್‌ಪಿಜಿ ಹಾಗೂ ನೈಸರ್ಗಿಕ ಅನಿಲ ತಂತ್ರಜ್ಞಾನಗಳನ್ನು ಬಳಸುತ್ತಿದ್ದಾರೆ. ಉದ್ಯಮಗಳ ನಿರ್ವಹಣಾ ವೆಚ್ಚ ಕಡಿಮೆ ಮಾಡುವುದು, ಕಾರ್ಯಕ್ಷಮತೆ ಹೆಚ್ಚಿಸುವುದು ಮತ್ತು ಸ್ವಚ್ಛ ಇಂಧನದತ್ತ ಸಾಗಲು ನೆರವಾಗುವುದು ಸಂಸ್ಥೆಯ ಪ್ರಮುಖ ಉದ್ದೇಶವಾಗಿದೆ. ಪುಣೆ, ದೆಹಲಿ, ಅಹಮದಾಬಾದ್, ಬೆಂಗಳೂರು, ಕೊಚ್ಚಿ, ಚೆನ್ನೈ, ಸಿಲಿಗುರಿ ಮತ್ತು ಗ್ಯಾಂಗ್ಟಾಕ್ ಸೇರಿದಂತೆ ಹಲವು ನಗರಗಳಲ್ಲಿ ಸಂಸ್ಥೆಯ ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿವೆ. ಇದೀಗ ಮಂಗಳೂರಿನ ನೂತನ ಕೇಂದ್ರದ ಮೂಲಕ ಕರಾವಳಿ ಕರ್ನಾಟಕದಲ್ಲಿಯೂ ತನ್ನ ಸೇವಾ ಜಾಲವನ್ನು ಮತ್ತಷ್ಟು ಬಲಪಡಿಸಲು ಪುಣೆ ಗ್ಯಾಸ್ ಮುಂದಾಗಿದೆ.
Recommended for you
-
190
-
582
-
598
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
