ಮಂಗಳೂರು: ಇತ್ತೀಚೆಗೆ ಬಹುದೊಡ್ಡ ಯಶಸ್ಸು ಗಳಿಸಿದ ‘ಕಾಂತಾರ ಚಾಪ್ಟರ್ 1’ (Kantara Chapter 1) ಚಲನಚಿತ್ರದ ಹಿನ್ನೆಲೆಯಲ್ಲಿ ನಟ ಹಾಗೂ ನಿರ್ದೇಶಕ ರಿಷಬ್ ಶೆಟ್ಟಿ ಮತ್ತು ಚಿತ್ರತಂಡ ಭಾಗವಹಿಸಿದ್ದ ಹರಕೆಯ ಕೋಲವು ಇದೀಗ ಭಾರಿ ವಿವಾದಕ್ಕೆ ಕಾರಣವಾಗಿದೆ. ಈ ಕೋಲದ ಸಂದರ್ಭದಲ್ಲಿ ದೈವ ನರ್ತಕನ ವರ್ತನೆಯು ಅತಿಯಾಗಿತ್ತು ಎಂಬ ಆಕ್ಷೇಪ ವ್ಯಕ್ತವಾಗಿದ್ದು, ಇದು ತುಳುನಾಡಿನ ದೈವಾರಾಧಕರ ಮತ್ತು ಭಕ್ತರ ಕೆಂಗಣ್ಣಿಗೆ ಗುರಿಯಾಗಿದೆ. ದೈವಾರಾಧಕ ತಮ್ಮಣ್ಣ ಶೆಟ್ಟಿ ಸೇರಿದಂತೆ ಹೆಚ್ಚಿನ ಸಂಖ್ಯೆಯ ಭಕ್ತರು ಈ ವರ್ತನೆಯನ್ನು ತೀವ್ರವಾಗಿ ವಿರೋಧಿಸಿದ್ದರು.
ದೈವ ನರ್ತಕನ ಅತಿರೇಕದ ವರ್ತನೆಯಿಂದ ಸೃಷ್ಟಿಯಾದ ಈ ವಿವಾದಕ್ಕೆ ಸಂಬಂಧಿಸಿದಂತೆ ಸ್ಪಷ್ಟನೆ ನೀಡುವ ಉದ್ದೇಶದಿಂದ ದೈವಸ್ಥಾನದ ಅಡಳಿತ ಮಂಡಳಿಯು ಮಂಗಳೂರಿನಲ್ಲಿ ಪತ್ರಿಕಾಗೋಷ್ಠಿಯನ್ನು ಆಯೋಜಿಸಿತ್ತು. ವಿವಾದದ ಬಿಸಿ ಹೆಚ್ಚಿದ್ದ ಕಾರಣ, ಈ ಸುದ್ದಿಗೋಷ್ಠಿಯತ್ತ ಮಾಧ್ಯಮಗಳ ಗಮನ ಕೇಂದ್ರೀಕೃತವಾಗಿತ್ತು. ದೈವಸ್ಥಾನದವರು ಈ ವಿವಾದವನ್ನು ಹೇಗೆ ನಿಭಾಯಿಸುತ್ತಾರೆ ಮತ್ತು ಭಕ್ತರ ಪ್ರಶ್ನೆಗಳಿಗೆ ಏನು ಉತ್ತರ ನೀಡುತ್ತಾರೆ ಎಂಬುದರ ಮೇಲೆ ಎಲ್ಲರ ಚಿತ್ತವಿತ್ತು.
ಆದರೆ, ಸುದ್ದಿಗೋಷ್ಠಿಯಲ್ಲಿ ಪತ್ರಕರ್ತರು ಕೇಳಿದ ಪ್ರಶ್ನೆಗಳಿಗೆ ಅಡಳಿತ ಮಂಡಳಿಯು ಸರಿಯಾದ ಉತ್ತರ ನೀಡುವಲ್ಲಿ ವಿಫಲವಾಯಿತು. ವಿಶೇಷವಾಗಿ, ಹರಕೆಯ ನೇಮದ ಸಂದರ್ಭದಲ್ಲಿ ದೈವ ನರ್ತಕ ತೋರಿದ ವಿವಾದಾತ್ಮಕ ವರ್ತನೆಗಳು ಮತ್ತು ವಾರಾಹಿ ಪಂಜುರ್ಲಿ ದೈವದ ಹಿನ್ನಲೆ ಹಾಗೂ ಆರಾಧನಾ ಪದ್ಧತಿಗಳ ಕುರಿತು ಪತ್ರಕರ್ತರು ವಿವರಣೆ ಕೇಳಿದರು. ಈ ನಿರ್ದಿಷ್ಟ ಮತ್ತು ಸೂಕ್ಷ್ಮ ಪ್ರಶ್ನೆಗಳಿಗೆ ಉತ್ತರಿಸುವ ಬದಲು, ಅಡಳಿತ ಮಂಡಳಿಯ ಪ್ರಮುಖರು ಮತ್ತು ಸದಸ್ಯರು ಏಕಾಏಕಿ ಕೋಪಗೊಂಡರು.
ಪ್ರಮುಖ ಪ್ರಶ್ನೆಗಳಿಗೆ ಸ್ಪಷ್ಟೀಕರಣ ನೀಡಲು ಅಸಮರ್ಥರಾದ ಅಡಳಿತ ಮಂಡಳಿಯು, ಕೊನೆಗೆ ಪತ್ರಕರ್ತರ ವಿರುದ್ಧವೇ ಗರಂ ಆಗುವ ಪ್ರಸಂಗ ನಡೆಯಿತು. ವಿವಾದದ ಕುರಿತು ಸ್ಪಷ್ಟನೆ ನೀಡುವ ಬದಲು, ಪ್ರಶ್ನೆ ಕೇಳಿದ ಪತ್ರಕರ್ತರ ಮೇಲೆಯೇ ರೇಗಿ, ಸಭೆಯಲ್ಲಿ ಉದ್ವಿಗ್ನ ಪರಿಸ್ಥಿತಿ ಸೃಷ್ಟಿಯಾಯಿತು. ಇದರಿಂದಾಗಿ, ದೈವಸ್ಥಾನದ ಆಡಳಿತ ಮಂಡಳಿಯ ಈ ಸುದ್ದಿಗೋಷ್ಠಿ ವಿವಾದಕ್ಕೆ ತೆರೆ ಎಳೆಯುವ ಬದಲು, ಮತ್ತಷ್ಟು ಗೊಂದಲ ಮತ್ತು ಅಸಮಾಧಾನಕ್ಕೆ ಕಾರಣವಾದಂತಾಗಿದೆ.
Recommended for you
-
1.2K
-
1.5K
-
1.3K
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
