ಬಂಟ್ವಾಳ : ಮಹಾರಾಷ್ಟ್ರದಲ್ಲಿ ಗೆಳೆಯನ ವಿವಾಹ ಮಹೋತ್ಸವ ಮುಗಿಸಿ ಸಕುಟುಂಬ ಸಮೇತರಾಗಿ ವಾಪಸಾಗುತ್ತಿದ್ದ ಚಿನ್ನದ ಉದ್ಯಮಿಯ ದಾರಿ ಕಾಯ್ದು, ಸಿನಿಮಾ ಶೈಲಿಯಲ್ಲಿ ಕಾರನ್ನು ಅಪಹರಿಸಿ 20 ಲಕ್ಷ ರೂಪಾಯಿ ಮೌಲ್ಯದ ನಗದು ಹಾಗೂ ಆಭರಣ ದೋಚಿದ್ದ ದುಷ್ಕರ್ಮಿಗಳ ಕೃತ್ಯದ ಮುಂದುವರಿದ ಭಾಗವಾಗಿ, ಕಳವಾಗಿದ್ದ ಕಾರು ಬಂಟ್ವಾಳ ತಾಲೂಕಿನ ಕಲ್ಪನೆ ಎಂಬ ನಿರ್ಜನ ಪ್ರದೇಶದಲ್ಲಿ ಪತ್ತೆಯಾಗಿದೆ. ಇನ್ನು ಹೆಚ್ಚಿನ ನಗದು ಅಥವಾ ಒಡವೆಗಳು ಇರಬಹುದೆಂಬ ಸಂಶಯದಿಂದ ದರೋಡೆಕೋರರು ಕಾರಿನ ಸೀಟುಗಳು ಸೇರಿದಂತೆ ವಾಹನದ ವಿವಿಧ ಭಾಗಗಳನ್ನು ಚಾಕುವಿನಿಂದ ಇರಿದು ಜಾಲಾಡಿದ್ದಾರೆ. ತಪಾಸಣೆಯ ನಂತರ ಯಾವುದೇ ಬೆಲೆಬಾಳುವ ವಸ್ತುಗಳು ಸಿಗದಿದ್ದಾಗ ವಾಹನವನ್ನು ಅಲ್ಲೇ ಬಿಟ್ಟು ಪರಾರಿಯಾಗಿದ್ದಾರೆ.
ಈ ಹೈಟೆಕ್ ದರೋಡೆ ಪ್ರಕರಣದ ತನಿಖೆಯನ್ನು ಮಂಗಳೂರು ನಗರ ಪೊಲೀಸ್ ಆಯುಕ್ತರು ಅತ್ಯಂತ ಗಂಭೀರವಾಗಿ ಪರಿಗಣಿಸಿದ್ದು, ಅಪರಾಧಿಗಳ ಹೆಡೆಮುರಿ ಕಟ್ಟಲು ವಿಶೇಷ ತನಿಖಾ ತಂಡಗಳನ್ನು ಕಣಕ್ಕಿಳಿಸಿದ್ದಾರೆ. ಸದ್ಯಕ್ಕೆ ಒಂದು ಪ್ರಮುಖ ತಂಡವು ಸಂತ್ರಸ್ತ ಚಿನ್ನದ ವ್ಯಾಪಾರಿ ವಿಕಾಸ್ ಸುಬ್ಬರಾವ್ ಧನವಾಡೆ ಅವರ ಒಡೆತನದ ಚಿನ್ನದ ಮಳಿಗೆಯ ಸಿಬ್ಬಂದಿ ವರ್ಗ ಹಾಗೂ ಅವರ ಆಪ್ತ ವಲಯದ ಪರಿಚಯಸ್ಥರನ್ನು ತೀವ್ರ ವಿಚಾರಣೆಗೆ ಒಳಪಡಿಸುತ್ತಿದೆ. ಆಂತರಿಕ ಮಾಹಿತಿ ಸೋರಿಕೆಯಿಂದಲೇ ಈ ಕೃತ್ಯ ನಡೆದಿದೆಯೇ ಎಂಬ ಕೋನದಲ್ಲೂ ತನಿಖೆ ಚುರುಕುಗೊಂಡಿದೆ.
ಅಪರಾಧ ಎಸಗಲು ದುಷ್ಕರ್ಮಿಗಳು ಒಟ್ಟು ಮೂರು ಐಷಾರಾಮಿ ಕಾರುಗಳನ್ನು ಬಳಸಿದ್ದು, ಇದರಲ್ಲಿ ಎರಡು ಕೇರಳ ನೋಂದಣಿ ಮತ್ತು ಮತ್ತೊಂದು ಬೆಂಗಳೂರು ನೋಂದಣಿ ಸಂಖ್ಯೆಯನ್ನು ಹೊಂದಿರುವುದು ಪೊಲೀಸರ ಪ್ರಾಥಮಿಕ ತನಿಖೆಯಲ್ಲಿ ಬಹಿರಂಗಗೊಂಡಿದೆ. ಈ ಸುಳಿವಿನ ಆಧಾರದ ಮೇಲೆ ಸನ್ನದ್ಧವಾಗಿರುವ ತನಿಖಾ ದಳದ ಒಂದು ತಂಡ ಕೇರಳದ ಪಯ್ಯನ್ನೂರಿನಲ್ಲಿ ಬೀಡುಬಿಟ್ಟಿದ್ದರೆ, ಮತ್ತೊಂದು ವಿಶೇಷ ತಂಡ ಬೆಂಗಳೂರಿನಲ್ಲಿ ಆರೋಪಿಗಳ ಪತ್ತೆಗಾಗಿ ವ್ಯಾಪಕ ಬಲೆ ಬೀಸಿದೆ.
ಮೂಲತಃ ಮಹಾರಾಷ್ಟ್ರದ ನಿವಾಸಿಯಾದ ವಿಕಾಸ್ ಸುಬ್ಬರಾವ್ ಧನವಾಡೆ ಕಳೆದ ಹನ್ನೆರಡು ವರ್ಷಗಳಿಂದ ಕೇರಳದ ಪಯ್ಯನ್ನೂರಿನಲ್ಲಿ ನೆಲೆಸಿ ಚಿನ್ನದ ವ್ಯಾಪಾರ ನಡೆಸುತ್ತಿದ್ದಾರೆ. ಇವರು ಮುಂಬೈನಿಂದ ರಾಷ್ಟ್ರೀಯ ಹೆದ್ದಾರಿ-66ರ ಮೂಲಕ ತಮ್ಮ ಕುಟುಂಬದೊಂದಿಗೆ ಮರಳುತ್ತಿದ್ದಾಗ, ಮಂಗಳವಾರ ಮುಂಜಾನೆ ಸುಮಾರು 2.15ರ ವೇಳೆಗೆ ಪಣಂಬೂರು ಬಳಿ ಮುಸುಕುಧಾರಿಗಳಾಗಿದ್ದ ಏಳು ಜನರ ಸಶಸ್ತ್ರ ಗ್ಯಾಂಗ್ ಕಾರನ್ನು ಅಡ್ಡಗಟ್ಟಿ ಈ ದರೋಡೆ ನಡೆಸಿತ್ತು. ಸದ್ಯ ಪಣಂಬೂರು ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದ್ದು, ಅಂತರರಾಜ್ಯ ದರೋಡೆಕೋರರ ಪತ್ತೆಗೆ ಶೋಧ ಕಾರ್ಯ ಮುಂದುವರಿದಿದೆ.
Recommended for you
-
1.6K
-
2.8K
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
