ಉಡುಪಿ : ಶಿರ್ವ ಸಮೀಪದ ಕುತ್ಯಾರು ಆನೆಗುಂದಿ ಮಠದ ಆವರಣದಲ್ಲಿರುವ ಗೋಶಾಲೆಗೆ ಸಂಬಂಧಿಸಿದ ಮೇವು ಸಂಗ್ರಹಣಾ ಕೊಠಡಿಯೊಂದರಲ್ಲಿ ರವಿವಾರ ಬೆಳಿಗ್ಗೆ ದೊಡ್ಡ ಮಟ್ಟದ ಅಗ್ನಿ ಅನಾಹುತ ಸಂಭವಿಸಿದೆ. ಈ ಕೊಠಡಿಯು ಗೋಶಾಲೆಯ ಮುಖ್ಯ ಪ್ರದೇಶದಿಂದ ಪ್ರತ್ಯೇಕವಾಗಿದ್ದು, ಸಭಾ ಭವನದ ಮಹಡಿ ಮೇಲೆ ನಿರ್ಮಿಸಲಾಗಿತ್ತು. ಈ ದುರ್ಘಟನೆಯಿಂದಾಗಿ ಮಠದ ಗೋಶಾಲೆಗಾಗಿ ಸಂಗ್ರಹಿಸಿಡಲಾಗಿದ್ದ ಬಹುಪಾಲು ಒಣ ಮೇವು ಸಂಪೂರ್ಣ ಸುಟ್ಟು ಭಸ್ಮವಾಗಿದೆ.
ಬೆಳಿಗ್ಗೆ ಸುಮಾರು 9 ಗಂಟೆಯ ಸುಮಾರಿಗೆ ಬೆಂಕಿ ಕಾಣಿಸಿಕೊಂಡಿದೆ. ಪ್ರಾಥಮಿಕ ವರದಿಗಳ ಪ್ರಕಾರ, ಕೊಠಡಿಯೊಳಗೆ ಸಂಭವಿಸಿದ ವಿದ್ಯುತ್ ಶಾರ್ಟ್ ಸರ್ಕ್ಯೂಟ್ ನಿಂದಾಗಿ ಮೊದಲು ಕಿಡಿ ಹೊತ್ತಿಕೊಂಡಿದೆ. ಬಳಿಕ ಬೆಂಕಿಯ ಕೆನ್ನಾಲಿಗೆ ಕ್ಷಣಾರ್ಧದಲ್ಲಿಯೇ ಇಡೀ ಮೇವು ಸಂಗ್ರಹಣಾ ಕೊಠಡಿಯನ್ನು ಆವರಿಸಿಕೊಂಡಿತು. ಕೊಠಡಿಯಲ್ಲಿ ಹೆಚ್ಚು ಸುಡುವ ಗುಣವುಳ್ಳ ಒಣ ಬೈ ಹುಲ್ಲಿನ ಮೇವು ಇರುವುದರಿಂದ, ಬೆಂಕಿಯು ತೀವ್ರವಾಗಿ ವ್ಯಾಪಿಸಿ ಅಪಾರ ಪ್ರಮಾಣದ ಹಾನಿಗೆ ಕಾರಣವಾಯಿತು.
ಅಗ್ನಿ ಅನಾಹುತ ಸಂಭವಿಸಿದ ಕೂಡಲೇ ಮಠದ ಪರಿಸರದಲ್ಲಿದ್ದ ವೇದಪಾಠ ಶಾಲೆಯ ವಿದ್ಯಾರ್ಥಿಗಳು ಮತ್ತು ಮಠದ ಸಿಬ್ಬಂದಿಗಳು ತಕ್ಷಣವೇ ಎಚ್ಚೆತ್ತುಕೊಂಡರು. ಅವರು ಸಮಯಪ್ರಜ್ಞೆ ಮೆರೆದು, ಬೆಂಕಿ ನಂದಿಸಲು ಆರಂಭಿಕ ಪ್ರಯತ್ನಗಳನ್ನು ಮಾಡಿದರು ಹಾಗೂ ಬೆಂಕಿ ಗೋಶಾಲೆಯ ಇತರ ಭಾಗಗಳಿಗೆ ಅಥವಾ ಮಠದ ಮುಖ್ಯ ಕಟ್ಟಡಗಳಿಗೆ ಹರಡದಂತೆ ತಡೆದರು. ಅವರ ಸಕಾಲಿಕ ಪ್ರತಿಕ್ರಿಯೆಯಿಂದಾಗಿ ದೊಡ್ಡ ಮಟ್ಟದ ಜೀವ ಮತ್ತು ಆಸ್ತಿ ಹಾನಿಯನ್ನು ತಪ್ಪಿಸಿದಂತಾಗಿದೆ. ಇದರ ಬೆನ್ನಲ್ಲೇ, ವಿಷಯ ತಿಳಿದು ಸ್ಥಳಕ್ಕೆ ಧಾವಿಸಿದ ಉಡುಪಿ ಅಗ್ನಿಶಾಮಕ ದಳದ ಸಿಬ್ಬಂದಿಗಳು ತಕ್ಷಣವೇ ಕಾರ್ಯಚರಣೆ ಆರಂಭಿಸಿ, ಬೆಂಕಿಯನ್ನು ಸಂಪೂರ್ಣವಾಗಿ ನಂದಿಸುವಲ್ಲಿ ಯಶಸ್ವಿಯಾದರು.
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
