ಸುಳ್ಯ : ದಕ್ಷಿಣ ಕನ್ನಡದ ಸುಳ್ಯ ಮೂಲದ ಪರಿಶಿಷ್ಟ ಪಂಗಡಕ್ಕೆ ಸೇರಿದ ಯುವತಿ ಚಾಂದಿನಿ ಅವರು ‘ಹೈಪರ್ ಐಜಿಇ ಸಿಂಡ್ರೋಮ್’ ಎಂಬ ಅಪರೂಪದ ಮತ್ತು ಮಾರಕ ಕಾಯಿಲೆಯಿಂದ ಬಳಲುತ್ತಿದ್ದರು. ಸಂವಿಧಾನದ ಪರಿಚ್ಛೇದ 21 (ಜೀವಿಸುವ ಹಕ್ಕು) ರ ಅಡಿಯಲ್ಲಿ ವಿಶೇಷ ಪ್ರಕರಣವೆಂದು ಪರಿಗಣಿಸಿ ಖಾಸಗಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಒದಗಿಸಬೇಕಾಗಿದ್ದರೂ, ಸರ್ಕಾರದಿಂದ ಹಣಕಾಸು ಪೂರೈಕೆಯಲ್ಲಿ ಆದ ತೀವ್ರ ವಿಳಂಬದಿಂದಾಗಿ ಚಾಂದಿನಿಗೆ ಸೂಕ್ತ ಚಿಕಿತ್ಸೆ ಸಿಗಲಿಲ್ಲ. ಮಾಧ್ಯಮಗಳು ಮತ್ತು ಕುಟುಂಬದವರು ಪದೇ ಪದೇ ಸರ್ಕಾರದ, ಆರೋಗ್ಯ ಇಲಾಖೆಯ ಹಾಗೂ ಸಚಿವರ ಗಮನಕ್ಕೆ ತಂದರೂ, ಸಮಯಕ್ಕೆ ಸರಿಯಾಗಿ ಹಣ ಬಿಡುಗಡೆಯಾಗಲಿಲ್ಲ. ಈ ವಿಳಂಬದ ಪರಿಣಾಮವಾಗಿ, ಚಾಂದಿನಿ ಸಾವಿಗೀಡಾದರು.
ಈ ಘಟನೆಗೆ ಸಂಬಂಧಿಸಿದಂತೆ ಆರೋಗ್ಯ ಸಚಿವ ದಿನೇಶ್ ಗುಂಡೂರಾವ್ ಅವರು, “ಸಾಧ್ಯವಾದಷ್ಟು ನೆರವು ನೀಡಿದ್ದೇವೆ, ಆತ್ಮಕ್ಕೆ ಶಾಂತಿ ಸಿಗಲಿ” ಎಂದು ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ. ಆದರೆ, ಸಾರ್ವಜನಿಕರು ಮತ್ತು ಹಕ್ಕು ಹೋರಾಟಗಾರರು ಈ ಸಾವಿಗೆ ಯಾರು ಹೊಣೆ, ಆಡಳಿತಾತ್ಮಕ ಲೋಪ ಎಲ್ಲಿದೆ ಎಂಬ ಬಗ್ಗೆ ಸರ್ಕಾರದ ನಿರ್ಲಕ್ಷ್ಯವನ್ನು ಪ್ರಶ್ನಿಸಿದ್ದಾರೆ. ಮುಖ್ಯಮಂತ್ರಿಗಳ ಕಚೇರಿಯಿಂದ ₹30 ಲಕ್ಷ ಬಿಡುಗಡೆಗೆ ಶಿಫಾರಸ್ಸು ಬಂದಿದ್ದರೂ ಕೇವಲ ₹9 ಲಕ್ಷ ಮಾತ್ರ ಪಾವತಿಸಿರುವುದು, ಆಯುಷ್ಮಾನ್ ಭಾರತ್ ಯೋಜನೆಯಲ್ಲಿ ಚಿಕಿತ್ಸೆ ನೀಡದಿರುವುದು, ಹಾಗೂ ₹50 ಲಕ್ಷ ನೆರವಿಗೆ ಬರೆದ ಪತ್ರ ಕಚೇರಿಗಳಲ್ಲಿ ವಿಳಂಬವಾಗಿರುವುದು ವಿವಾದಕ್ಕೆ ಕಾರಣವಾಗಿದೆ. ಸ್ವತಃ ಚಾಂದಿನಿಯೇ ತನ್ನ ಚಿಕಿತ್ಸೆಗಾಗಿ ಆಸ್ತಿ ಮಾರಾಟ ಮಾಡಿ ಹಣ ಸಂಗ್ರಹಿಸುವ ಪರಿಸ್ಥಿತಿ ಉಂಟಾಗಿತ್ತು. ಹಣವಿಲ್ಲದ ಕಾರಣ ಖಾಸಗಿ ಆಸ್ಪತ್ರೆಗಳು ಚಿಕಿತ್ಸೆಗೆ ಸರಿಯಾದ ಸಮಯದಲ್ಲಿ ದಾಖಲು ಮಾಡಿಲ್ಲ. ಕೆಲವು ಅಸ್ಪತ್ರೆ ಗಳು ದಾಖಲು ಮಾಡಿದರೂ .ಸರಕಾರದ ಹಣ ಬರಿತ್ತಿಲ್ಲ ಎಂದು ಡಿಸ್ಸರ್ಜ್ ಮಾಡಿದ ಘಟನೆಗಳು ನಡೆದಿದೆ.
ಈ ಹಿನ್ನೆಲೆಯಲ್ಲಿ, ಸಾರ್ವಜನಿಕರು ಮತ್ತು ಮಾಧ್ಯಮಗಳು ಒಟ್ಟು 12 ಪ್ರಶ್ನೆಗಳನ್ನು ಸರ್ಕಾರದ ಮುಂದಿಟ್ಟಿದ್ದು, ಆಡಳಿತಾತ್ಮಕ ವೈಫಲ್ಯ, ಹಣಕಾಸು ಬಿಡುಗಡೆಯಲ್ಲಿನ ವಿಳಂಬ ಮತ್ತು ಸಂವಿಧಾನಾತ್ಮಕ ಜೀವಿಸುವ ಹಕ್ಕಿನ ಉಲ್ಲಂಘನೆಯ ಕುರಿತು ಕೇಂದ್ರೀಕೃತವಾಗಿವೆ. ಈ ದುರಂತ ಮರುಕಳಿಸದಿರಲು, ಚಾಂದಿನಿ ಸಾವಿನ ಕುರಿತು ಆಂತರಿಕ ತನಿಖೆ ನಡೆಸಿ, ವಿಳಂಬಕ್ಕೆ ಕಾರಣರಾದ ಜವಾಬ್ದಾರರನ್ನು ನಿಗದಿಪಡಿಸಿ, ಕಾನೂನು ಕ್ರಮ ಕೈಗೊಳ್ಳಬೇಕು ಹಾಗೂ ಭವಿಷ್ಯದಲ್ಲಿ ಇಂತಹ ಅಪರೂಪದ ವೈದ್ಯಕೀಯ ಪ್ರಕರಣಗಳಿಗೆ ಸಕಾಲದಲ್ಲಿ ನೆರವು ನೀಡುವ ಹೊಸ ನೀತಿಯನ್ನು ರೂಪಿಸಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.
Recommended for you
-
2.2K
-
2.5K
-
1.0K
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
