ಮಂಗಳೂರು : ಮಂಗಳೂರಿನ ಜೋಕಟ್ಟೆ ಮತ್ತು ಸುತ್ತಮುತ್ತಲಿನ ಗ್ರಾಮಗಳ ಪಾಲಿಗೆ ಎಂ.ಆರ್.ಪಿ.ಎಲ್ (MRPL) ಸಂಸ್ಥೆಯು ಅಭಿವೃದ್ಧಿಯ ಸಂಕೇತವಾಗುವ ಬದಲು ಆರೋಗ್ಯ ಮತ್ತು ಬದುಕಿನ ನೆಮ್ಮದಿಯನ್ನು ಕಸಿದುಕೊಳ್ಳುತ್ತಿರುವ ಮಾರಕ ಗೂಡಾಗಿ ಪರಿಣಮಿಸಿದೆ. ಉದ್ಯೋಗ ಸೃಷ್ಟಿ ಮತ್ತು ತುಳುನಾಡಿನ ಆರ್ಥಿಕ ಪ್ರಗತಿಯ ದೊಡ್ಡ ಕನಸುಗಳನ್ನು ಬಿತ್ತಿ ಸಾವಿರಾರು ಎಕರೆ ಕೃಷಿ ಭೂಮಿಯನ್ನು ಸ್ವಾಧೀನಪಡಿಸಿಕೊಂಡ ಈ ಕಂಪನಿಯು, ಸ್ಥಳೀಯರಿಗೆ ಉದ್ಯೋಗ ನೀಡುವ ವಿಚಾರದಲ್ಲಿ ಪದೇ ಪದೇ ತಾಂತ್ರಿಕ ಕಾರಣಗಳನ್ನು ಒಡ್ಡಿ ಜಾರಿಕೊಳ್ಳುತ್ತಿದೆ. ಆರಂಭಿಕ ಹಂತಗಳಲ್ಲಿ ಅನಿವಾರ್ಯವಾಗಿ ಕೆಲವು ಕುಟುಂಬಗಳಿಗೆ ಉದ್ಯೋಗ ನೀಡಿದ್ದರೂ, ನಾಲ್ಕನೇ ಹಂತದ ವಿಸ್ತರಣೆಯ ಸಂದರ್ಭದಲ್ಲಿ ಭೂಮಿ ಕಳೆದುಕೊಂಡ ಸಂತ್ರಸ್ತರಿಗೆ ಉದ್ಯೋಗದ ಬದಲು ಹಣದ ಆಮಿಷವೊಡ್ಡಿ ಅಥವಾ ವಿವಿಧ ತಂತ್ರಗಳ ಮೂಲಕ ಅಧಿಕೃತವಾಗಿ ತನ್ನ ಹೊಣೆಗಾರಿಕೆಯಿಂದ ನುಣುಚಿಕೊಳ್ಳುತ್ತಿದೆ ಎಂಬ ಗಂಭೀರ ಆರೋಪ ಕೇಳಿಬರುತ್ತಿದೆ.
ಕಂಪನಿಯ ಪೆಟ್ರೋಕೆಮಿಕಲ್ ಘಟಕಗಳಿಂದ ಹೊರಬರುತ್ತಿರುವ ಮಾಲಿನ್ಯವು ಸುತ್ತಲಿನ ಪರಿಸರವನ್ನು ಜೀವಿಸಲು ಅಸಾಧ್ಯವಾದ ನರಕವನ್ನಾಗಿ ಮಾಡಿದೆ. 2014ರಲ್ಲಿ ಮೂರನೇ ಹಂತದ ಪೆಟ್ ಕೋಕ್ ಮತ್ತು ಸಲ್ಫರ್ ಘಟಕಗಳು ಕಾರ್ಯಾರಂಭ ಮಾಡಿದ ದಿನದಿಂದಲೂ ಗ್ರಾಮಸ್ಥರು ಉಸಿರಾಟದ ತೊಂದರೆ, ಚರ್ಮದ ಕಾಯಿಲೆ ಹಾಗೂ ಶ್ವಾಸಕೋಶದ ಗಂಭೀರ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಆಗ ನಡೆದ ಬೃಹತ್ ಪ್ರತಿಭಟನೆಯ ಫಲವಾಗಿ ರಾಜ್ಯ ಸರ್ಕಾರವು ಆರು ಅಂಶಗಳ ಸುಧಾರಣಾ ಕ್ರಮಗಳನ್ನು ಜಾರಿಗೆ ತರಲು ಆದೇಶಿಸಿತ್ತು. ಕಂಪನಿಯು ಐದು ಅಂಶಗಳನ್ನು ಜಾರಿಗೆ ತಂದಿರುವುದಾಗಿ ಹೇಳಿಕೊಳ್ಳುತ್ತಿದ್ದರೂ, ಜನವಸತಿ ಪ್ರದೇಶ ಮತ್ತು ಕಂಪನಿಯ ನಡುವೆ ಇರಬೇಕಾದ ‘ಹಸಿರು ವಲಯ’ ನಿರ್ಮಿಸುವ ಆರನೇ ಆದೇಶವನ್ನು ಜಾರಿಗೆ ತರಲು ದಶಕಗಳಿಂದ ಮೀನಾಮೇಷ ಎಣಿಸುತ್ತಿದೆ. ಇತ್ತೀಚಿನ ಮಾತುಕತೆಗಳಲ್ಲಿ 27 ಎಕರೆ ಭೂಸ್ವಾಧೀನದ ಮೂಲಕ ಹಸಿರು ಪಟ್ಟಿ ನಿರ್ಮಿಸುವ ಭರವಸೆ ಸಿಕ್ಕಿದ್ದರೂ, ಅಲ್ಲಿಯವರೆಗೆ ಜನರ ಆರೋಗ್ಯದ ಮೇಲೆ ಬೀರುತ್ತಿರುವ ದ್ರೋಹಕ್ಕೆ ಹೊಣೆಗಾರರು ಯಾರು ಎಂಬ ಪ್ರಶ್ನೆ ಕಾಡುತ್ತಿದೆ ಎಂದು ಸ್ಥಳೀಯ ನಿವಾಸಿಗಳು ಹೇಳಿದ್ದಾರೆ.
ಇಂದು ಜೋಕಟ್ಟೆಯ ನಲ್ಕೆಮಾರ್ ಅಂತಹ ಪ್ರದೇಶಗಳಲ್ಲಿನ ವಾಸ್ತವ ಸ್ಥಿತಿ ಮೈ ಜುಂ ಎನಿಸುವಂತಿದೆ. ಚಳಿಗಾಲದ ಮಂಜಿನಂತೆ ಪೆಟ್ ಕೋಕ್ ಪುಡಿಯು ಮನೆಗಳ ಕಿಟಕಿ, ಟೆರೇಸ್ ಮತ್ತು ಅಡುಗೆ ಮನೆಯವರೆಗೂ ಆವರಿಸುತ್ತಿದೆ. ಜನರು ಕುಡಿಯುವ ನೀರಿಗಾಗಿ ಅವಲಂಬಿಸಿರುವ ತೆರೆದ ಬಾವಿಗಳು ಕಪ್ಪು ಬಣ್ಣಕ್ಕೆ ತಿರುಗುತ್ತಿದ್ದು, ಅಸಹಾಯಕ ಗ್ರಾಮಸ್ಥರು ಅದೇ ವಿಷಪೂರಿತ ನೀರನ್ನು ಸೇವಿಸುವ ಪರಿಸ್ಥಿತಿ ಬಂದೊದಗಿದೆ. ಮಾಲಿನ್ಯ ನಿಯಂತ್ರಣ ಮಂಡಳಿ ಮತ್ತು ಜಿಲ್ಲಾಡಳಿತಕ್ಕೆ ನೂರಾರು ಬಾರಿ ದೂರು ನೀಡಿದರೂ, ಅವುಗಳ ನಿರ್ಲಕ್ಷ್ಯ ಧೋರಣೆಯು ಕಂಪನಿಯ ಲಾಭದ ಮುಂದೆ ಜನರ ಜೀವಕ್ಕೆ ಬೆಲೆ ಇಲ್ಲದಂತಾಗಿದೆ. ಅತೀ ಅಪಾಯಕಾರಿ ಸಲ್ಫರ್ ಮತ್ತು ಪೆಟ್ ಕೋಕ್ ಪುಡಿಯು ಜನರ ರಕ್ತ ಮತ್ತು ಶ್ವಾಸಕೋಶವನ್ನು ಸೇರುತ್ತಿದ್ದು, ಮುಗ್ಧ ಮಕ್ಕಳ ಆರೋಗ್ಯವು ದಿನದಿಂದ ದಿನಕ್ಕೆ ಕ್ಷೀಣಿಸುತ್ತಿರುವುದು ಇಡೀ ಜಿಲ್ಲೆಯನ್ನೇ ಆತಂಕಕ್ಕೀಡುಮಾಡಿದೆ ಎಂದು ಅವರು ಹೇಳಿದ್ದಾರೆ.
Recommended for you
-
1.8K
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
