ಮಂಗಳೂರು : ಕನ್ನಡದ ಬಹುಮುಖ ಪ್ರತಿಭೆಯ ಕವಿ, ಸಂಗೀತಗಾರ ಹಾಗೂ ಗ್ರಾಮೀಣ ನಾಯಕ ದಿವಂಗತ ಕೇದಿಗೆ ಭಾಸ್ಕರ ರಾವ್ ಅವರ ಜನ್ಮ ಶತಮಾನೋತ್ಸವದ ನೆನಪಿನಲ್ಲಿ ਕੇದಿಗೆ ಪ್ರತಿಷ್ಠಾನ ಮಂಗಳೂರು ವತಿಯಿಂದ ಆಯೋಜಿಸಲಾಗಿದ್ದ “ಭಾಸ್ಕರ ಶತಾಬ್ದಿ ಸಂಸ್ಮರಣೆ ಮತ್ತು ಲಕ್ಷ್ಮಿ ಭಾಸ್ಕರ ಪ್ರಶಸ್ತಿ ಪ್ರದಾನ” ಸಮಾರಂಭವು ಮಲ್ಲಿಕಟ್ಟೆಯ ಲಯನ್ಸ್ ಸೇವಾ ಮಂದಿರದಲ್ಲಿ ಅತ್ಯಂತ ವಿಜೃಂಭಣೆಯಿಂದ ನೆರವೇರಿತು. ಲಯನ್ಸ್ ಕ್ಲಬ್, ಸೀನಿಯರ್ ಚೇಂಬರ್ ಇಂಟರ್ನ್ಯಾಷನಲ್ ಹಾಗೂ ಕೇದಿಗೆ ಕುಟುಂಬಸ್ಥರ ಸಹಯೋಗದೊಂದಿಗೆ ನಡೆದ ಈ ಐತಿಹಾಸಿಕ ಕಾರ್ಯಕ್ರಮದಲ್ಲಿ 200ಕ್ಕೂ ಅಧಿಕ ಗಣ್ಯರು ಹಾಗೂ ಸಾರ್ವಜನಿಕರು ಭಾಗವಹಿಸಿದ್ದರು. ಕಾರ್ಯಕ್ರಮದಲ್ಲಿ ಕೇದಿಗೆ ಭಾಸ್ಕರ ರಾವ್ ಅವರು ರಚಿಸಿದ್ದ ಪ್ರಸಿದ್ಧ ಮಕ್ಕಳ ಕವನ ಸಂಕಲನ “ಕೇದಿಗೆ ಹೂವು” ಕೃತಿಯ ಮರುಮುದ್ರಿತ ಪ್ರತಿಯನ್ನು ಸುಧಾಕರ ಪೇಜಾವರ ಅವರು ಮುಖ್ಯ ಅತಿಥಿಗಳ ಸಮ್ಮುಖದಲ್ಲಿ ಬಿಡುಗಡೆ ಮಾಡಿದರು.
ಈ ರಜತ ಮಹೋತ್ಸವದ ಶುಭ ಸಂದರ್ಭದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ ಪ್ರಮುಖ ಸಾಧಕರಿಗೆ ಪ್ರತಿಷ್ಠಿತ “ಲಕ್ಷ್ಮಿ ಭಾಸ್ಕರ ಪ್ರಶಸ್ತಿ” ನೀಡಿ ಗೌರವಿಸಲಾಯಿತು. ಮಿಲಿಟರಿ ಕ್ಷೇತ್ರದಲ್ಲಿ ಅತ್ಯುತ್ತಮ ಸೇವೆ ಸಲ್ಲಿಸಿದ ಕರ್ನಲ್ ನಿತಿನ್ ಭಿಡೆ ಅವರಿಗೆ “ರಾಷ್ಟ್ರಸೇವಾ ನಿಷ್ಠ”, ಯಕ್ಷಗಾನ ಮತ್ತು ಕಲಾ ವಿಮರ್ಶೆಯ ಧುರೀಣ ಪ್ರೊ. ಡಾ. ಎಂ. ಪ್ರಭಾಕರ ಜೋಶಿ ಅವರಿಗೆ “ಯಕ್ಷಕಲಾ ನಿಷ್ಠ”, ಶೈಕ್ಷಣಿಕ ಹಾಗೂ ರೇಖಾಚಿತ್ರ ಕ್ಷೇತ್ರದ ಸಾಧಕ ಪ್ರೊ. ಅನಂತ ಪದ್ಮನಾಭ ರಾವ್ ಅವರಿಗೆ “ಚಿತ್ರಕಲಾ ನಿಷ್ಠ” ಹಾಗೂ ಕೃಷಿ ಚಿಂತನೆ ಮತ್ತು ಗ್ರಾಮೀಣಾಭಿವೃದ್ಧಿಗಾಗಿ ಕೆ. ತಿರುಮಲೇಶ್ವರ ಭಟ್ ಅವರಿಗೆ “ಕೃಷಿಸೇವಾ ನಿಷ್ಠ” ಬಿರುದಾಂಕಿತ ಪ್ರಶಸ್ತಿಗಳನ್ನು ಪ್ರದಾನ ಮಾಡಲಾಯಿತು.
ಸಮಾಜಮುಖಿ ಕಾಳಜಿಯ ಭಾಗವಾಗಿ, 103 ವರ್ಷದ ಹಿರಿಯ ಮೃದಂಗ ವಿದ್ವಾಂಸ ಬಾಬು ರೈ ಅವರ ಸುಲಭ ಸಂಚಾರಕ್ಕಾಗಿ ಅವರ ಪುತ್ರ ಸುಭಾಷ್ ರೈ ಮುಖಾಂತರ ಗಾಲಿಕುರ್ಚಿಯನ್ನು (ವೀಲ್ ಚೇರ್) ಹಸ್ತಾಂತರಿಸಲಾಯಿತು. ಇದೇ ವೇಳೆ ಅರ್ಹ ವಿದ್ಯಾರ್ಥಿಗಳಿಗೆ ಮಂಗಳೂರು ಲಯನ್ಸ್ ಚಾರಿಟೇಬಲ್ ಟ್ರಸ್ಟ್ ಸಹಯೋಗದೊಂದಿಗೆ ವಿದ್ಯಾರ್ಥಿವೇತನ ವಿತರಿಸಲಾಯಿತು. ಮುಖ್ಯ ಅತಿಥಿ ಯಾಜಿ ಪಾವಂಜೆ ದಿವಾಕರ ಭಟ್ ಅವರು ಹೆತ್ತವರನ್ನು ಪ್ರೀತಿಯಿಂದ ಆರೈಕೆ ಮಾಡುವ ತತ್ತ್ವದ ಕುರಿತು ಪ್ರೇರಣಾದಾಯಿ ಸಂದೇಶ ನೀಡಿದರು. ಕಾರ್ಯಕ್ರಮದಲ್ಲಿ ಹಿರಿಯ ಕಲಾವಿದ ದಿನೇಶ್ ಹೊಳ್ಳ ಅವರ ನೇತೃತ್ವದಲ್ಲಿ ಲೈವ್ ಕ್ಯಾನ್ವಾಸ್ ಪೇಂಟಿಂಗ್ ಹಾಗೂ ‘ಟೀಮ್ ಅರೆಹೊಳೆ ನಂದಗೋಕುಲ’ ತಂಡದಿಂದ ಮೂಡಿಬಂದ ಸಾಂಸ್ಕೃತಿಕ ರಸಸಂಜೆ ನೆರೆದಿದ್ದ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿತು.
Recommended for you
-
34
-
484
-
857
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
