ಮಂಗಳೂರು: ‘ಸ್ಮಾರ್ಟ್ ಸಿಟಿ’ಯ ಹೆಗ್ಗಳಿಕೆ ಪಡೆದಿರುವ ಮಂಗಳೂರು ನಗರದ ಹೃದಯ ಭಾಗದಲ್ಲಿರುವ ಕದ್ರಿ ಪಾರ್ಕ್ನಲ್ಲಿ ಸರಿಸುಮಾರು ₹5 ಕೋಟಿ ವೆಚ್ಚದಲ್ಲಿ ಸ್ಥಾಪಿಸಲಾಗಿದ್ದ ಸಂಗೀತ ಕಾರಂಜಿ ಮತ್ತು ಲೇಸರ್ ಶೋ ಕಳೆದ ಆರು ವರ್ಷಗಳಿಂದ ಸಂಪೂರ್ಣವಾಗಿ ಸ್ಥಗಿತಗೊಂಡಿದೆ. ಈ ಉದ್ಯಾನವನವನ್ನು ನಗರದ ಪ್ರಮುಖ ಸಾಂಸ್ಕೃತಿಕ ಹಾಗೂ ಮನರಂಜನಾ ಕೇಂದ್ರವನ್ನಾಗಿ ರೂಪಿಸುವ ಮಹತ್ವಾಕಾಂಕ್ಷೆಯ ಭರವಸೆ ಈಗ ನಿರ್ಲಕ್ಷ್ಯದ ಕನ್ನಡಿ ಹಿಡಿದಿದೆ.
ಹಳೆಯ ಜಿಂಕೆ ಪಾರ್ಕ್ನಲ್ಲಿದ್ದ ಈ ಸಂಗೀತ ಕಾರಂಜಿ ಮತ್ತು ಲೇಸರ್ ಶೋ ಅನ್ನು ಅಂದಿನ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು 2018ರ ಜನವರಿ 7 ರಂದು ಲೋಕಾರ್ಪಣೆ ಮಾಡಿದ್ದರು. 4.01 ಎಕರೆ ಪ್ರದೇಶದಲ್ಲಿ ಕಲ್ಪಿಸಲಾಗಿದ್ದ ಈ ಮೂಲಸೌಕರ್ಯದ ಅಡಿಯಲ್ಲಿ ಸಂಗೀತದ ಲಯಕ್ಕೆ ಅನುಗುಣವಾಗಿ ನರ್ತಿಸುತ್ತಿದ್ದ ಬಣ್ಣ ಬಣ್ಣದ ಕಾರಂಜಿಗಳು, ಯಕ್ಷಗಾನ, ಕಂಬಳ, ಭೂತಾರಾಧನೆಯಂತಹ ತುಳುನಾಡಿನ ಸಮೃದ್ಧ ಸಂಸ್ಕೃತಿಯನ್ನು ಬಿಂಬಿಸುವ ಜನಪದೀಯ ಚಿತ್ರಣಗಳು ಪ್ರೇಕ್ಷಕರನ್ನು ಅಪಾರವಾಗಿ ಆಕರ್ಷಿಸಿದ್ದವು. ಶುರುವಾದ ಆರಂಭಿಕ ತಿಂಗಳುಗಳಲ್ಲಿ ಇದು ಕೌಟುಂಬಿಕ ಪ್ರವಾಸಿಗರ ಪ್ರಮುಖ ತಾಣವಾಗಿ ಮಾರ್ಪಟ್ಟಿತ್ತು.
ಆದರೆ, ಕೋವಿಡ್-19 ಸಾಂಕ್ರಾಮಿಕದ ಬಳಿಕ ನರ್ತನ ನಿಲ್ಲಿಸಿದ ಈ ಸಂಗೀತ ಕಾರಂಜಿ, ಇದುವರೆಗೆ ಮತ್ತೆ ಕಾರ್ಯಾರಂಭ ಮಾಡಿಲ್ಲ. ಪ್ರಸ್ತುತ ಸ್ಥಳ ಪರಿಶೀಲಿಸಿದಾಗ, ಲಕ್ಷಾಂತರ ರೂಪಾಯಿ ಮೌಲ್ಯದ ಮೋಟಾರು ಪಂಪ್ಗಳು, ಪೈಪ್ಗಳು ಮತ್ತು ಇತರ ಪರಿಕರಗಳು ನೀರಿನ ತೊಟ್ಟಿಯಲ್ಲೇ ತುಕ್ಕು ಹಿಡಿದಿರುವುದು ಕಂಡುಬಂದಿದೆ. ಕಾರಂಜಿಯ ಸುತ್ತಮುತ್ತಲಿನ ಪರಿಸರದಲ್ಲಿ ಹುಲ್ಲು ಮತ್ತು ಕಳೆಗಳು ಬೆಳೆದು ನಿಂತಿದ್ದು, ಪ್ರೇಕ್ಷಕರಿಗೆ ಕಲ್ಪಿಸಲಾಗಿದ್ದ ಆಸನಗಳು ಕೂಡ ಹದಗೆಟ್ಟಿವೆ. ಕೋಟ್ಯಂತರ ರೂಪಾಯಿ ಹೂಡಿಕೆ ಸಂಪೂರ್ಣ ವ್ಯರ್ಥವಾಗುತ್ತಿರುವುದು ಸಾರ್ವಜನಿಕರಲ್ಲಿ ಆಕ್ರೋಶ ಮೂಡಿಸಿದೆ.
ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಕದ್ರಿ ಪಾರ್ಕ್ ಸಮಿತಿಯ ಅಧ್ಯಕ್ಷರೂ ಆಗಿರುವ ಜಿಲ್ಲಾಧಿಕಾರಿ ದರ್ಶನ್ ಎಚ್ ವಿ ಅವರು, ಸಂಗೀತ ಕಾರಂಜಿ ಪುನರುಜ್ಜೀವನಗೊಂಡರೆ ವಿದ್ಯುತ್ ಬಿಲ್ ₹30 ಸಾವಿರದಿಂದ ₹35 ಸಾವಿರ ಸೇರಿದಂತೆ ಮಾಸಿಕ ನಿರ್ವಹಣೆಗೆ ಸುಮಾರು ₹70 ಸಾವಿರ ಖರ್ಚು ಬರಲಿದೆ ಎಂದು ತಿಳಿಸಿದ್ದಾರೆ. ಲೋ ಕಾಸ್ಟ್ನಲ್ಲಿ ಜನರಿಗೆ ಮನೋರಂಜನೆ ಒದಗಿಸಲು ಹೇಗೆ ಸಾಧ್ಯ ಎಂದು ಚರ್ಚಿಸಿ ಮುಂದಿನ ಎರಡು ಅಥವಾ ಮೂರು ತಿಂಗಳಿನಲ್ಲಿ ಈ ಬಗ್ಗೆ ನಿರ್ಧಾರ ಕೈಗೊಳ್ಳುವುದಾಗಿ ಅವರು ಭರವಸೆ ನೀಡಿದ್ದಾರೆ. ಒಟ್ಟಿನಲ್ಲಿ, ಪ್ರವಾಸಿಗರು ಮತ್ತು ನಾಗರಿಕರು ಈ ಸಂಗೀತ ಕಾರಂಜಿ ಪುನರಾರಂಭಗೊಂಡು, ಜಿಲ್ಲಾಡಳಿತ ಹಾಗೂ ತೋಟಗಾರಿಕೆ ಇಲಾಖೆ ತುಕ್ಕು ಹಿಡಿದಿರುವ ಪರಿಕರಗಳನ್ನು ಸರಿಪಡಿಸಿ ಮತ್ತೆ ಮನರಂಜನೆಯ ಸಂಭ್ರಮವನ್ನು ಹೆಚ್ಚಿಸಲಿ ಎಂದು ಕಾಯುತ್ತಿದ್ದಾರೆ.
Recommended for you
-
142
-
147
-
2.4K
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
