ಶಬರಿಮಲೆ : ಶಬರಿಮಲೆ ಅಯ್ಯಪ್ಪ ಸ್ವಾಮಿ ಸನ್ನಿಧಾನದ ಸ್ಟ್ರಾಂಗ್ ರೂಮ್ನಲ್ಲಿದ್ದ 446 ಗ್ರಾಂ ತೂಕದ ಚಿನ್ನದ ಕಿರೀಟ ಕಳವಾಗಿದೆ ಎಂಬ ಸುದ್ದಿ ಭಾರಿ ಸೌಂಡ್ ಮಾಡುತ್ತಿದ್ದಂತೆಯೇ, ಈ ಕುರಿತು ಸ್ಪಷ್ಟನೆ ನೀಡಿರುವ ತಿರುವಾಭರಣಂ ಕಮಿಷನರ್ ಆರ್. ರೆಜಿಲಾಲ್ ಅವರು ಕಿರೀಟವು ಸಂಪೂರ್ಣ ಭದ್ರವಾಗಿದ್ದು ಯಾವುದೇ ಅಭದ್ರತೆ ಉಂಟಾಗಿಲ್ಲ ಎಂದು ತಿಳಿಸಿದ್ದಾರೆ. ಕೇರಳ ಹೈಕೋರ್ಟ್ ನೇಮಕಗೊಳಿಸಿರುವ ಅಮಿಕಸ್ ಕ್ಯೂರಿ ಜಸ್ಟಿಸ್ ಕೆ.ಟಿ. ಶಂಕರನ್ ಅವರ ನೇತೃತ್ವದಲ್ಲಿ ದೇವಸ್ಥಾನದ ತಿರುವಾಭರಣಗಳ ಪರಿಶೋಧನೆ ಮತ್ತು ಸ್ಟಾಕ್ ಪರಿಶೀಲನೆ ಸಾಗುತ್ತಿದ್ದಾಗ, 2012ರಲ್ಲಿ ತಮಿಳುನಾಡಿನ ಶ್ರದ್ಧಾಳುಗಳು ಅರ್ಪಿಸಿದ್ದ 445.78 ಗ್ರಾಂ ತೂಕದ ನೈಜ ಸ್ವರ್ಣ ಕಿರೀಟವು ಸನ್ನಿಧಾನದ ಕೊಠಡಿಯಲ್ಲಿ ಲಭ್ಯವಾಗಿರಲಿಲ್ಲ. ಅದರ ಬದಲಾಗಿ ಕೇವಲ 240 ಗ್ರಾಂ ತೂಕ ಹೊಂದಿದ್ದ, ನಕಲಿ ರತ್ನಗಳನ್ನು ಪೋಣಿಸಿದ ಬೇರೊಂದು ಕಿರೀಟ ಪತ್ತೆಯಾಗಿದ್ದು ಭಕ್ತಾದಿಗಳ ತೀವ್ರ ಆಕ್ರೋಶ ಹಾಗೂ ಅನುಮಾನಕ್ಕೆ ಕಾರಣವಾಗಿತ್ತು.
ವಿಷಯದ ಗಂಭೀರತೆ ಅರಿತ ತಿರುವಾಂಕೂರು ದೇವಸ್ವಂ ಮಂಡಳಿ (TDB) ತಕ್ಷಣವೇ ಕಾರ್ಯಪ್ರವೃತ್ತವಾಗಿ ಸಮಗ್ರ ವಿಚಾರಣೆಗೆ ನಿರ್ದೇಶನ ನೀಡಿತು. ತನಿಖೆಯ ಭಾಗವಾಗಿ ಆರಣ್ಮುಳದಲ್ಲಿರುವ ಪ್ರಧಾನ ಸ್ಟ್ರಾಂಗ್ ರೂಮ್ಗೆ ಖುದ್ದಾಗಿ ಭೇಟಿ ನೀಡಿದ ಕಮಿಷನರ್ ಆರ್. ರೆಜಿಲಾಲ್, ಪರಿಶೀಲನೆ ನಡೆಸಿ ಮಧ್ಯಾಹ್ನದ ವೇಳೆಗೆ ಅಧಿಕೃತ ಮಾಹಿತಿ ಹಂಚಿಕೊಂಡರು. ಸ್ವಾಮಿಯ ಮೂಲ ಚಿನ್ನದ ಕಿರೀಟವನ್ನು ಸುರಕ್ಷಿತವಾಗಿ ಆರಣ್ಮುಳದ ಮುಖ್ಯ ಕೊಠಡಿಯಲ್ಲೇ ಇರಿಸಲಾಗಿದ್ದು, ಸನ್ನಿಧಾನದಿಂದ ಇಲ್ಲಿಗೆ ವರ್ಗಾಯಿಸುವ ಸಂದರ್ಭದಲ್ಲಿ ದಾಖಲಾತಿಯಲ್ಲಿ ಉಂಟಾದ ಗೊಂದಲವೇ ಈ ಅಪಪ್ರಚಾರಕ್ಕೆ ಮೂಲ ಕಾರಣ ಎಂದು ಅವರು ವಿವರಣೆ ನೀಡಿದರು.
ಕಿರೀಟ ಸುರಕ್ಷಿತವಾಗಿದೆ ಎಂಬ ಸಮಾಧಾನದ ನಡುವೆಯೂ, ಆರಣ್ಮುಳ ಭದ್ರತಾ ಕೊಠಡಿಯ ದಾಸ್ತಾನು ಪರಿಶೀಲನೆ ವೇಳೆ ನಾಲ್ಕು ಸವರನ್ ತೂಕದ ಸ್ವರ್ಣ ಸರವೊಂದು ಪತ್ತೆಯಾಗದಿರುವುದು ಹೊಸ ಆತಂಕಕ್ಕೆ ಕಾರಣವಾಗಿದೆ. ಇದರ ಜೊತೆಗೆ ತಿರುವನಂತಪುರಂನ ಒಟಿಸಿ ಹನುಮಾನ್ ದೇವಾಲಯದಲ್ಲಿದ್ದ ಬೆಲೆಬಾಳುವ ಕಲ್ಲುಗಳಿಂದ ಅಲಂಕೃತಗೊಂಡಿದ್ದ ಬೆಳ್ಳಿ ಕೊಂಬುಗಳು ಕೂಡ ಗಾಯಬ್ ಆಗಿರುವುದು ದೇವಸ್ವಂ ಮಂಡಳಿಯ ನಿರ್ವಹಣಾ ಲೋಪ ಹಾಗೂ ಸೆಕ್ಯೂರಿಟಿ ವೈಫಲ್ಯವನ್ನು ಎತ್ತಿಹಿಡಿದಿದೆ. ಈ ಹಿನ್ನೆಲೆಯಲ್ಲಿ ಮಂಡಳಿಯ ಅಧ್ಯಕ್ಷ ಕೆ. ಜಯಕುಮಾರ್ ತೀವ್ರ ಕಳವಳ ವ್ಯಕ್ತಪಡಿಸಿದ್ದು, ಹಿರಿಯ ಅಧಿಕಾರಿಗಳಿಂದ ಸಮಗ್ರ ತನಿಖೆ ಮುಂದುವರಿಸಲು ಕಟ್ಟುನಿಟ್ಟಿನ ಆಜ್ಞೆ ಹೊರಡಿಸಿದ್ದಾರೆ.
ಈ ಹಿಂದೆ ಶಬರಿಮಲೆಯಲ್ಲಿ ಜರುಗಿದ್ದ ನೈಜ ಕಳ್ಳತನದ ದುರಂತ ಘಟನೆಗಳೇ ಪ್ರಸ್ತುತ ವದಂತಿ ಇಷ್ಟೊಂದು ಕಾಡ್ಗಿಚ್ಚಿನಂತೆ ಹರಡಲು ಪ್ರಮುಖ ಕಾರಣವಾಗಿದೆ. 2025ರ ಕೊನೆಯ ಅವಧಿಯಲ್ಲಿ ಗರ್ಭಗುಡಿಯ ದ್ವಾರಪಾಲಕ ವಿಗ್ರಹಗಳಲ್ಲಿದ್ದ 4.5 ಕೆಜಿ ತೂಕದ ಚಿನ್ನದ ಲೇಪನವಿದ್ದ ತಾಮ್ರದ ಕವರ್ಗಳನ್ನು ಕಳವು ಮಾಡಿ ನಕಲಿ ಕವರ್ಗಳನ್ನು ಅಳವಡಿಸಲಾಗಿತ್ತು. ಪ್ರಸ್ತುತ ಈ ಹಳೆಯ ಕಳ್ಳತನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬೆಂಗಳೂರಿನ ಉದ್ಯಮಿ ಉನ್ನಿಕೃಷ್ಣನ್ ಪೊಟ್ಟಿ ಹಾಗೂ ದೇವಸ್ವಂ ಮಂಡಳಿಯ ಮಾಜಿ ಅಧ್ಯಕ್ಷ ಪಿ.ಎಸ್. ಪ್ರಶಾಂತ್ ಅವರನ್ನು ಬಂಧಿಸಲಾಗಿದ್ದು, ಎಸ್ಐಟಿ ಅಧಿಕಾರಿಗಳು ತೀವ್ರ ವಿಚಾರಣೆಗೊಳಪಡಿಸುತ್ತಿದ್ದಾರೆ.
Recommended for you
-
2.6K
-
1.3K
-
1.2K
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ರಾಜ್ಯ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
