ಮಂಗಳೂರು : ಬಿಜೈ ಕಾಪಿಕಾಡ್ ಸಮೀಪದ ಕೊಟ್ಟಾರ 1st ಕ್ರಾಸ್ ನಿವಾಸಿ ಆಲ್ಬರ್ಟ್ ರೇಗೋ (86) ಅವರ ಅನುಮಾನಾಸ್ಪದ ಸಾವಿನ ಪ್ರಕರಣಕ್ಕೆ ಸಂಬಂಧಿಸಿದಂತೆ, ಪೊಲೀಸರು ಇದೀಗ ಪ್ರಮುಖ ಹೆಜ್ಜೆ ಇಟ್ಟಿದ್ದು, ಅಕ್ಟೋಬರ್ 9 ರಂದು ದೇರೆಬೈಲ್ ಚರ್ಚ್‌ನ ಸ್ಮಶಾನದಲ್ಲಿ ಹೂಳಲಾಗಿರುವ ಮೃತದೇಹವನ್ನು ಹೊರತೆಗೆದು ಮರಣೋತ್ತರ ಪರೀಕ್ಷೆಗೆ (Post-Mortem) ಒಳಪಡಿಸಲು ನಿರ್ಧರಿಸಿದ್ದಾರೆ. ಮಗಳು ಆಸ್ತಿಗಾಗಿ ತಂದೆಗೆ ಮಾನಸಿಕ ಹಾಗೂ ಶಾರೀರಿಕ ಕಿರುಕುಳ ನೀಡಿ ಕೊಲೆ ಮಾಡಿದ್ದಾರೆ ಎಂಬ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ಉರ್ವ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.
ಆಲ್ಬರ್ಟ್ ರೇಗೋ ಅವರ ಮಗಳು ಮಾಯಾ ರೇಗೋ (A1) ತಂದೆಯ ಆಸ್ತಿಯನ್ನು ಬಲವಂತವಾಗಿ ವಿಲ್ ಮೂಲಕ ತನ್ನ ಹೆಸರಿಗೆ ಮಾಡಿಸಿಕೊಂಡು, ನಂತರ ಜುಲೈ 19, 2026 ರಂದು ಹಠಾತ್ತಾಗಿ ಮೃತಪಟ್ಟಿದ್ದ ತಂದೆಯ ಶವವನ್ನು ಇತರ ಸಂಬಂಧಿಕರಿಗೆ ತೋರಿಸದೆ ಆತುರಾತುರವಾಗಿ ದಫನ ಮಾಡಿದ್ದರು ಎಂಬ ಗಂಭೀರ ಆರೋಪವಿದೆ. ಅಲ್ಲದೆ, ಪ್ರಕರಣದಲ್ಲಿ ಪೊಲೀಸರ ಸಾಮೀಪ್ಯ ಹಾಗೂ ಅನುಮಾನಾಸ್ಪದ ನಡೆಗಳ ಕುರಿತು ದೂರುದಾರರು ಶಂಕೆ ವ್ಯಕ್ತಪಡಿಸಿದ್ದರು.
ಇದೀಗ ನ್ಯಾಯಾಲಯ ಹಾಗೂ ಹಿರಿಯ ಪೊಲೀಸ್ ಅಧಿಕಾರಿಗಳ ನಿರ್ದೇಶನದಂತೆ, ಪ್ರಕರಣದ ಸತ್ಯಾಸತ್ಯತೆ ಹಾಗೂ ಸಾವಿಗೆ ನಿಖರ ಕಾರಣ ತಿಳಿಯಲು ಅಕ್ಟೋಬರ್ 9 ರಂದು ವೈದ್ಯರ ಸಮ್ಮುಖದಲ್ಲಿ ಮೃತದೇಹವನ್ನು ಹೊರತೆಗೆದು ಮರಣೋತ್ತರ ಪರೀಕ್ಷೆ ನಡೆಸಲಾಗುವುದು. ಪರೀಕ್ಷೆಯ ವರದಿ ಬಂದ ಬಳಿಕ ಮುಂದಿನ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಉರ್ವ ಪೊಲೀಸರು ತಿಳಿಸಿದ್ದಾರೆ.
ಆಸ್ತಿಗಾಗಿ ವೃದ್ಧ ತಂದೆಯ ಹತ್ಯೆ ಶಂಕೆ: ಮಂಗಳೂರಿನಲ್ಲಿ ಮಗಳ ವಿರುದ್ಧ ಗಂಭೀರ ಆರೋಪ, ಎಫ್‌ಐಆರ್ ದಾಖಲು
ಆಸ್ತಿ ವಿವಾದಕ್ಕೆ ಸಂಬಂಧಿಸಿದಂತೆ 86 ವರ್ಷದ ವೃದ್ಧ ತಂದೆಯನ್ನೇ ಮಗಳು ಮಾನಸಿಕ ಹಾಗೂ ಶಾರೀರಿಕ ಕಿರುಕುಳ ನೀಡಿ ಕೊಲೆ ಮಾಡಿರುವ ಶಂಕೆ ವ್ಯಕ್ತವಾಗಿದ್ದು, ಮಂಗಳೂರಿನ ಉರ್ವ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಬಿಜೈ ಕಪಿಕ್ಕಾಡ್ ನಿವಾಸಿ ಆಲ್ಬರ್ಟ್ ರೇಗೋ (86) ಮೃತಪಟ್ಟವರು. ಅವರ ಮಗಳು ಮಾಯಾ ರೇಗೋ (A1) ಎಂಬಾಕೆಯ ವಿರುದ್ಧ ಕೊಲೆ (BNS 103(1)) ಪ್ರಕರಣ ಸೇರಿದಂತೆ ಎಫ್‌ಐಆರ್ ನಮೂದಿಸಲಾಗಿದೆ.
ಕುಟುಂಬದ ಆಪ್ತ ಹಾಗೂ ದೂರುದಾರರಾದ ಹೆರಾಲ್ಡ್ ಪಿರೇರಾ ಎಂಬುವರು ಈ ಕುರಿತು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಆಲ್ಬರ್ಟ್ ರೇಗೋ ಅವರ ಮಗಳು ಮಾಯಾ ರೇಗೋ ಕಳೆದ ಹಲವು ವರ್ಷಗಳಿಂದ ತಂದೆಯ ಆಸ್ತಿಯನ್ನು ತನ್ನ ಹೆಸರಿಗೆ ಮಾಡಿಕೊಡುವಂತೆ ಅವರಿಗೆ ತೀವ್ರ ಮಾನಸಿಕ ಹಾಗೂ ದೈಹಿಕ ಕಿರುಕುಳ ನೀಡುತ್ತಿದ್ದರು. ಅಲ್ಲದೆ ಆಸ್ತಿಯನ್ನು ತನ್ನ ಹೆಸರಿಗೆ ಬರೆದುಕೊಡದಿದ್ದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿದ್ದರು ಎನ್ನಲಾಗಿದೆ. ಬಲವಂತ ಹಾಗೂ ಬೆದರಿಕೆಗೆ ಹೆದರಿ ಆಲ್ಬರ್ಟ್ ರೇಗೋ ಅವರು ತಮ್ಮ ಆಸ್ತಿಯನ್ನು ಮಾಯಾ ರೇಗೋ ಹೆಸರಿಗೆ ವಿಲ್ ಮಾಡಿಕೊಟ್ಟಿದ್ದರೆನ್ನಲಾಗಿದೆ.
ಆರೋಗ್ಯವಂತರಾಗಿದ್ದ ಆಲ್ಬರ್ಟ್ ರೇಗೋ ಅವರು ಜುಲೈ 19, 2026 ರಂದು ಹಠಾತ್ತಾಗಿ ಮೃತಪಟ್ಟಿದ್ದರು. ಆದರೆ ಈ ವಿಷಯವನ್ನು ಇತರ ಮಕ್ಕಳಿಗೆ ತಿಳಿಸದೆ, ಮೃತದೇಹವನ್ನೂ ತೋರಿಸದೆ ಆತುರಾತುರವಾಗಿ ದಫನ ಮಾಡಲಾಗಿತ್ತು. ಯಾವುದೇ ಕಾಯಿಲೆ ಇಲ್ಲದಿದ್ದರೂ ಆಲ್ಬರ್ಟ್ ಅವರು ಮೃತಪಟ್ಟಿರುವುದಕ್ಕೆ ಮಗಳು ಮಾಯಾ ರೇಗೋ ನೀಡಿದ ಕಿರುಕುಳ ಅಥವಾ ವಿಷಪ್ರಾಶನವೇ ಕಾರಣವಿರಬಹುದು ಎಂದು ಶಂಕಿಸಿ ಹೆರಾಲ್ಡ್ ಪಿರೇರಾ ದೂರು ನೀಡಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
ಮಾನವ ಹಕ್ಕುಗಳ ಹೋರಾಟಗಾರ ಬಿಜೈ ಆನೆಗುಡ್ಡೆ ನಿವಾಸಿ ಅಜೋಯ್ ಕ್ರಿಸ್ಟೋಫೆರ್ ಡಿ ಸಿಲ್ವ ರವರು ಜುಲೈ 25 ರಂದು ಪೊಲೀಸ್ ಆಯುಕ್ತರ ಕಛೇರಿಗೆ ನೀಡಿದಂತಹ ದೂರು ಅರ್ಜಿಯನ್ನು ಮತ್ತು ಹೆರಾಲ್ಡ್ ಪಿರೇರಾ ಎಂಬುವರು ನೀಡಿದ ಅರ್ಜಿಯನ್ನು ಪರಿಶೀಲಿಸಿ ಆಲ್ಬರ್ಟ್ ರೇಗೋ ಅವರ ಸಾವಿನಲ್ಲಿ ಸಂಶಯಗೊಂಡು ಪೊಲೀಸ್ ಆಯುಕ್ತರು ಹೆಣವನ್ನು ಹೊರ ತೆಗೆದು ಮರಣೋತ್ತರ ಪರೀಕ್ಷೆಗೆ ಆದೇಶ ನೀಡಿದ್ದಾರೆ.
Recommended for you
-
567
-
960
-
1.3K
ಪ್ರತಿಕ್ರಿಯೆ ನೀಡಿ
ಪ್ರತಿಕ್ರಿಯೆ ನೀಡಿ
Posted in: ಪ್ರಾದೇಶಿಕ ಸುದ್ದಿಗಳು, ಟಾಪ್ ಸುದ್ದಿ, ಸುದ್ದಿಗಳು
