ಚೆನ್ನೈ:  ತಮಿಳುನಾಡು ಮುಖ್ಯ­ಮಂತ್ರಿ ಜೆ.ಜಯಲಲಿತಾ ಅವರು ಅಕ್ರಮ ಆಸ್ತಿ ಗಳಿಕೆ ಪ್ರಕರಣದಲ್ಲಿ ಜೈಲು ಸೇರಿದ ಕಾರಣ ತೆರವಾದ ಮುಖ್ಯ ಮಂತ್ರಿ ಸ್ಟಾನಕ್ಕೆ ಹಣಕಾಸುಸಚಿವ ಎಂ.ಪನ್ನೀರ್‌ಸೆಲ್ವಂ ಅವರನ್ನು ಆಯ್ಕೆ ಮಾಡಲಾಗಿದೆ. ಎಐಎಡಿಎಂಕೆ ಪ್ರಧಾನ ಕಚೇರಿ­ಯಲ್ಲಿ ಭಾನುವಾರ ನಡೆದ ಸಭೆಯಲ್ಲಿ ಅವಿರೋಧವಾಗಿ ಶಾಸಕಾಂಗ ಪಕ್ಷದ ನಾಯಕನನ್ನಾಗಿ ಆಯ್ಕೆ ಮಾಡಲಾ­ಯಿತು.

ಈ ಹಿಂದೆ ೨೦೦೧ರಲ್ಲಿ ತಾನ್ಸಿ ಭೂಹಗರಣ­ದಲ್ಲಿ ಸುಪ್ರೀಂ ಕೋರ್ಟ್‌ ತೀರ್ಪಿ­ನಿಂದಾಗಿ ಜಯಲಲಿತಾ ಅವರು ರಾಜೀನಾಮೆ ನೀಡ­ಬೇಕಾಗಿ ಬಂದಿದ್ದಾಗ ಪನ್ನೀರ್‌ಸೆಲ್ವಂ ಅವರು ಕೇವಲ  ಆರು ತಿಂಗಳ ಕಾಲ ಜಯಾ ಉತ್ತರಾ­ಧಿಕಾರಿ­ಯಾಗಿ ೨೦೦೧ರ ಸೆ.೨೧ರಿಂದ ೨೦೦೨ರ ಮಾರ್ಚ್‌ ೧ರವರೆಗೆ  ಅವರು ಮುಖ್ಯಮಂತ್ರಿಯಾಗಿ ಆಡಳಿತ ನಡೆಸಿದ್ದರು.  ಈ ಪ್ರಕರಣದಲ್ಲಿ ಜಯಾ ಖುಲಾಸೆಗೊಂಡ ಬಳಿಕ ಮುಖ್ಯ­ಮಂತ್ರಿ ಸ್ಥಾನವನ್ನು ಬಿಟ್ಟುಕೊಟ್ಟಿದ್ದರು.

ಅಕ್ರಮ ಆಸ್ತಿ ಪ್ರಕರಣದಲ್ಲಿ ಶನಿ­ವಾರ ವಿಶೇಷ ಕೋರ್ಟ್‌ ತಮ್ಮನ್ನು  ಅಪರಾಧಿ ಎಂದು ಘೋಷಿಸಿದ ಬಳಿಕ ಜಯ­ಲಲಿತಾ ಅವರು ಭಾನುವಾರ ಬೆಳಿಗ್ಗೆ ಉತ್ತರಾಧಿಕಾರಿ ಆಯ್ಕೆ ಸಂಬಂಧ ಪನ್ನೀರ್‌ಸೆಲ್ವಂ, ಇಂಧನ ಸಚಿವ ನಾಥಂ ವಿಶ್ವನಾಥನ್‌, ಸಾರಿಗೆ ಸಚಿವ ಸೆಂಥಿಲ್ ಬಾಲಾಜಿ ಹಾಗೂ ಸರ್ಕಾರದ ಸಲಹೆಗಾರ್ತಿಯಾಗಿರುವ ಮಾಜಿ ಮುಖ್ಯ­­­ಕಾರ್ಯದರ್ಶಿ ಶೀಲಾ ಬಾಲ­ಕೃಷ್ಣನ್‌ ಜತೆ ಜೈಲಿ­ನಲ್ಲಿಯೇ  ಚರ್ಚೆ ನಡೆಸಿ­ದ್ದರು.

ಶಾಸಕಾಂಗ ಪಕ್ಷದ ನಾಯಕನಾಗಿ ಆಯ್ಕೆಯಾದ ತಕ್ಷಣವೇ  ಪನ್ನೀರ್‌ಸೆಲ್ವಂ, ಗೃಹ ಸಚಿವ ಆರ್‌.ವೈತಿ­ಲಿಂಗಂ, ನಾಥಂ ವಿಶ್ವ­ನಾಥನ್‌ ಮತ್ತು ಹೆದ್ದಾರಿ ಸಚಿವ ಎಡಪ್ಪಡಿ ಪಳನಿಸ್ವಾಮಿಯವರೊಂದಿಗೆ ರಾಜ­ಭವನಕ್ಕೆ ತೆರಳಿ ರಾಜ್ಯಪಾಲ ರೋಸಯ್ಯ ಅವ­ರನ್ನು ಭೇಟಿಯಾಗಿ ತಮ್ಮ ಸಂಪುಟ ಸೇರುವ ಸಚಿವರ ಹೆಸರು­ಗಳನ್ನು ಪನ್ನೀರ್‌ಸೆಲ್ವಂ ರಾಜ್ಯ­ಪಾಲ­ರಿಗೆ ಕೊಟ್ಟರು. ಕೂಡಲೇ ರಾಜ್ಯ­ಪಾಲರು ಹೊಸ ಸರ್ಕಾರ ರಚಿಸುವಂತೆ ಅವರಿಗೆ ಆಹ್ವಾನ ನೀಡಿದರು. ಆದರೆ ರಾಜಭನ­ದೊಳಕ್ಕೆ ಮಾಧ್ಯಮ ಪ್ರತಿನಿಧಿ­ಗಳ ಪ್ರವೇಶವನ್ನು ನಿರ್ಬಂಧಿಸಲಾಗಿತ್ತು. ಪ್ರಮಾಣವಚನ ಸ್ವೀಕಾರ ಸಮಾರಂಭ ಸೋಮವಾರ ನಡೆ­ಯುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ