ಬೆಳ್ತಂಗಡಿ: ಶ್ರೀ ಕ್ಷೇತ್ರ ಧರ್ಮಸ್ಥಳದಲ್ಲಿ ಆಗಸ್ಟ್ 21 ರಂದು ಆನ್‍ಲೈನ್ ರೂಮ್ ಬುಕಿಂಗ್ ಸೌಲಭ್ಯಕ್ಕೆ ಚಾಲನೆ ದೊರೆತಿದೆ. ಭಕ್ತಾದಿಗಳ ಅನುಕೂಲಕ್ಕಾಗಿ ಶ್ರೀ ಕ್ಷೇತ್ರದ ಅಧಿಕೃತ ವೆಬ್ ಪೇಜ್‍ನಲ್ಲಿ ಈ ಆನ್‍ಲೈನ್ ಬುಕ್ಕಿಂಗ್ ವ್ಯವಸ್ಥೆ ಕಲ್ಪಿಸಲಾಗಿದೆ.

ಪ್ರಸ್ತುತ ಧರ್ಮಸ್ಥಳದಲ್ಲಿರುವ “ರಜತಾದ್ರಿ” ವಸತಿಗೃಹದ 110 ರೂಮ್‍ಗಳು ಈ ಆನ್‍ಲೈನ್ ಬುಕ್ಕಿಂಗ್ ಸೌಲಭ್ಯದಡಿ ಭಕ್ತಾದಿಗಳಿಗೆ ಲಭಿಸಲಿದೆ. ಈ ಆನ್‍ಲೈನ್ ರೂಮ್ ಬುಕ್ಕಿಂಗ್‍ಗಾಗಿ ಭಕ್ತಾದಿಗಳು ಶ್ರೀ ಕ್ಷೇತ್ರ ಧರ್ಮಸ್ಥಳದ ವೆಬ್‍ ಪೇಜ್ http://www.shridharmasthala.org/ ಲಾಗಿನ್ ಆಗಿ ರೂಮ್ ಬುಕ್ಕಿಂಗ್ ಮಾಡಲು ಸಿದ್ಧಪಡಿಸಿರುವ ಲಿಂಕ್ ಮೂಲಕ ಬುಕ್ ಮಾಡಬಹುದು.

ಸೂಕ್ತ ವಿವರಗಳನ್ನು ತುಂಬಿದ ನಂತರ ರೂಮ್‌ ಬುಕ್ ಮಾಡಿದವರಿಗೆ ಬುಕ್ಕಿಂಗ್ ಕುರಿತಾದ ದೃಢೀಕರಣ ಪತ್ರ ಈ ಮೇಲ್ ಮೂಲಕ ತಲುಪುತ್ತದೆ. ನಂತರ ಈ ಪತ್ರದ ಪ್ರತಿಯನ್ನು ಶ್ರೀ ಕ್ಷೇತ್ರಕ್ಕೆ ಬಂದು ವಸತಿ ಗೃಹದಲ್ಲಿ ತೋರಿಸಿ ರೂಮ್ ಪಡೆಯಬಹುದು.

ಸದ್ಯಕ್ಕೆ ರೂಮ್ ಬುಕ್ಕಿಂಗ್‍ಗೆ ಮಾತ್ರ ವ್ಯವಸ್ಥೆ ಇದ್ದು, ಮುಂದಿನ ದಿನಗಳಲ್ಲಿ ರೂಮ್ ಬುಕ್ಕಿಂಗ್ ಹಣ ಪಾವತಿಗೂ ಆನ್‍ಲೈನ್‍ನಲ್ಲೇ ವ್ಯವಸ್ಥೆ ಕಲ್ಪಿಸಲಾಗುವುದು. ಭಕ್ತಾದಿಗಳು ಈ ಸೌಲಭ್ಯವನ್ನು ಸದ್ಬಳಕೆ ಮಾಡಿಕೊಳ್ಳಬಹುದು ಎಂದು ಶ್ರೀ ಕ್ಷೇತ್ರದ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.