ಮಂಗಳೂರು : ಖಾಸಗಿ ಸಹಭಾಗಿತ್ವದಲ್ಲಿ  ಮಂಗಳೂರು ಮಹಾನಗರ ಪಾಲಿಕೆಯ ವ್ಯಾಪ್ತಿಯಲ್ಲಿ ಎಚ್‌ಪಿಸಿಎಲ್ ಸಹಯೋಗದೊಂದಿಗೆ ನಿರ್ಮಾಣಗೊಂಡ ಐದು ಇ-ಟಾಯ್ಲೆಟ್‌ಗಳು ಇಂದು ಲೋಕಾರ್ಪಣೆಗೊಂಡವು.

ನಗರದ ಲಾಲ್‌ಬಾಗ್ ಬಸ್ ನಿಲ್ದಾಣ ಬಳಿ ಶಾಸಕ ಜೆ.ಆರ್.ಲೋಬೊ ಇ-ಟಾಯ್ಲೆಟ್‌ ಉದ್ಘಾಟಿಸಿದರು. ಬಳಿಕ ಮಾತನಾಡಿದ ಅವರು, ನಗರದಲ್ಲಿ ಇದೇ ಮಾದರಿಯ ಇನ್ನಷ್ಟು ಟಾಯ್ಲೆಟ್‌ಗಳು ನಿರ್ಮಾಣವಾಗಬೇಕಾದ ಅಗತ್ಯವಿದೆ ಎಂದರು.

ಸುಮಾರು ಆರೂವರೆ ಲಕ್ಷ ರೂ. ವೆಚ್ಚದಲ್ಲಿ ಇ-ಟಾಯ್ಲೆಟ್‌ ನಿರ್ಮಿಸಲಾಗಿದೆ . ಈ ಪೈಕಿ ಲಾಲ್‌ಭಾಗ್‌ನಲ್ಲಿ 2, ಕದ್ರಿಯಲ್ಲಿ 2 ಮತ್ತು ಹಂಪನಕಟ್ಟೆಯ ಬಳಿ ಒಂದು ಟಾಯ್ಲೆಟನ್ನು ಸಾರ್ವಜನಿಕ ಸೇವೆಗೆ ಬಳಸಲು ಇಂದು ಉದ್ಘಾಟಿಸಲಾಯಿತು ಎಂದವರು ತಿಳಿಸಿದರು.

ಮನಪಾ ಮೇಯರ್ ಕವಿತಾ ಸನಿಲ್ ಮಾತನಾಡಿ, ನಗರದಲ್ಲಿ ಇನ್ನೂ ಕೆಲವು ಕಂಪೆನಿಗಳು ಈ ರೀತಿಯ ಟಾಯ್ಲೆಟ್‌ಗಳ ನಿರ್ಮಾಣಕ್ಕೆ ಸಹಕಾರ ನೀಡುವ ಭರವಸೆ ನೀಡಿವೆ ಎಂದು ತಿಳಿಸಿದರು.

ತಿರುವನಂತಪುರದ ಇರಂ ಸೈಂಟಿಫಿಕ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯ ಹಿರಿಯ ಪ್ರಾದೇಶಿಕ ವ್ಯವಸ್ಥಾಪಕ ಶ್ರೀಕುಮಾರ್ ಮಾತನಾಡಿ, ಇರಂ ಸೈಂಟಿಫಿಕ್ ಪ್ರೈ.ಲಿ. ಮೂಲಕ ನಿರ್ಮಾಣಗೊಂಡಿರುವ ಈ ಇ-ಟಾಯ್ಲೆಟ್‌ಗಳು ಡಿಜಿಟಲ್ ತಂತ್ರಜ್ಞಾನದೊಂದಿಗೆ ಕಾರ್ಯನಿರ್ವಹಿಸುತ್ತದೆ. ಜನರು 1 ರೂ., 2 ರೂ., 5 ರೂ. ನಾಣ್ಯಗಳನ್ನು ಬಳಸಿ ಟಾಯ್ಲೆಟನ್ನು ಬಳಸಬಹುದು. ಈ ಟಾಯ್ಲೆಟ್‌ನಲ್ಲಿ ಕನಿಷ್ಠ ನೀರಿನ ಬಳಕೆ, ನಿಗದಿಪಡಿಸಿದ ಸಮಯ ಹಾಗೂ ಸಮರ್ಪಕವಾದ ನಿರ್ವಹಣೆ ಇರುತ್ತದೆ ಎಂದವರು ತಿಳಿಸಿದರು.

ದೇಶದ 19 ರಾಜ್ಯಗಳಲ್ಲಿ ಈ ರೀತಿಯ ಟಾಯ್ಲೆಟ್‌ನ್ನು ನಿರ್ಮಿಸಲಾಗಿದೆ. ಬೆಂಗಳೂರಿನಲ್ಲಿ 232 ಟಾಯ್ಲೆಟ್ ನಿರ್ಮಿಸಲಾಗಿದೆ. ಕಂಪೆನಿ ಒಂದು ವರ್ಷ ಈ ಟಾಯ್ಲೆಟನ್ನು ಉಚಿತವಾಗಿ ನಿರ್ವಹಣೆ ಮಾಡಲಿದೆ ಎಂದರು.

ಈ ಸಂದರ್ಭದಲ್ಲಿ ಮನಪಾ ಉಪ ಮೇಯರ್ ರಜನೀಶ್, ಮನಪಾ ಮುಖ್ಯ ಸಚೇತಕ ಶಶಿಧರ ಹೆಗ್ಡೆ, ಮನಪಾ ಸದಸ್ಯರಾದ ಪ್ರತಿಭಾ ಕುಳಾಯಿ, ಸಬಿತಾ ಮಿಸ್ಕತ್, ಹೇಮಲತಾ ಆರ್. ಸಾಲ್ಯಾನ್, ಮಾಜಿ ಮೇಯರ್ ಗಣೇಶ್ ಹೊಸಬೆಟ್ಟು, ಮನಪಾ ಆಯುಕ್ತ ಮುಹಮ್ಮದ್ ನಝೀರ್ ಮೊದಲಾದವರು ಉಪಸ್ಥಿತರಿದ್ದರು.