ಮಂಗಳೂರು: ನಗರದ ಪಿ.ಎಂ.ರಾವ್ ರಸ್ತೆಯಲ್ಲಿರುವ ಖಾಸಗಿ ವಸತಿ ಗೃಹದಲ್ಲಿ ವೇಶ್ಯಾವಾಟಿಕೆ ನಡೆಸುತ್ತಿದ್ದ ಆರೋಪದ ಮೇಲೆ ಆರು ಮಂದಿಯನ್ನು ಪೊಲೀಸರು ಬಂಧಿಸಿ ನಾಲ್ವರು ಮಹಿಳೆಯರನ್ನು ರಕ್ಷಿಸಿದ್ದಾರೆ.

ವಸತಿ ಗೃಹದ ಮಾಲೀಕ ಆಕಾಶಭವನದ ಶಶಿಧರ (42), ಸ್ವಾಗತಕಾರರಾದ ಪುತ್ತೂರಿನ ಹರೀಶ್ (34), ಕೈಕಾರ್ನ ಸುದೇಶ್ (21), ಉಪ್ಪಿನಂಗಡಿಯ ನಝೀಬ್ (34), ರೂಂ ಬಾಯ್‌ಗಳಾದ ಕಾರ್ಕಳದ ಸಂದೀಪ್ (29), ಹಾಸನದ ಕುಮಾರ್ (30) ಬಂಧಿತರು. ಈ ವೇಳೆ ನಾಲ್ವರು ಮಹಿಳೆಯರನ್ನು ರಕ್ಷಿಸಿ ಬಿಡುಗಡೆ ಮಾಡಲಾಗಿದೆ.

ಕೇಂದ್ರ ಉಪ ವಿಭಾಗದ ಎಸಿಪಿ ಉದಯ ನಾಯಕ್, ಬಂದರು ಪೊಲೀಸ್ ಠಾಣೆಯ ಇನ್ಸ್‌ಪೆಕ್ಟರ್ ಶಾಂತರಾಮ ನೇತೃತ್ವದಲ್ಲಿ ಖಚಿತ ಮಾಹಿತಿ ಮೇರೆಗೆ ಕಾರ್ಯಾಚರಣೆ ನಡೆಸಿದ್ದರು. ಈ ಬಗ್ಗೆ ಬಂದರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.