ಮೈಸೂರು: ಹುಣಸೂರು.ತಾ. ಹನಗೋಡು ಸಮೀಪದ ಅಬ್ಬೂರಿನಲ್ಲಿ ರೈತರಿಬ್ಬರ ಮೇಲೆ ಜೇನುಹುಳಗಳು ದಾಳಿ ನಡೆಸಿದ್ದು, ಒಬ್ಬರು ಸಾವನ್ನಪ್ಪಿದ್ದು ಮತ್ತೊಬ್ಬರು ಗಂಭೀರವಾಗಿ ಗಾಯಗೊಂಡಿರುವ ಘಟನೆ ನಡೆದಿದೆ.

ಅಬ್ಬೂರಿನ ರೈತ ಶಂಕರೇಗೌಡ ಸಾವಿಗೀಡಾದ ವ್ಯಕ್ತಿ ಹಾಗೂ ಇದೇ ಗ್ರಾಮದ ರಾಮೇಗೌಡ ಗಾಯಗೊಂಡ ರೈತ. ಈ ಇಬ್ಬರು ರೈತರು ಬೆಳಗ್ಗೆ ಶಂಕರೇಗೌಡರ ಜಮೀನಿನಲ್ಲಿ ಮುಸುಕಿನ ಜೋಳ ಕಟಾವು ಮಾಡುತ್ತಿದ್ದ ವೇಳೆ ಹೆಜ್ಜೇನು ದಾಳಿ ನಡೆಸಿದೆ. ದಾಳಿಗೊಳಗಾದ ರೈತರ ಕೂಗಾಟ ಚೀರಾಟ ಕೇಳಿದ ಪಕ್ಕದ ಜಮೀನಿನಲ್ಲಿ ಜೋಳ ಕಟಾವು ಮಾಡುತ್ತಿದ್ದ ರೈತರು, ಜೋಳದ ಗುಡ್ಡೆಗೆ ಬೆಂಕಿ ಹಚ್ಚಿ ಹೆಜ್ಜೇನು ಓಡಿಸಿದರು.

ಅನಂತರ ಗಾಯಗೊಂಡ ರೈತರನ್ನು ಹನಗೋಡು ಆಸ್ಪತ್ರೆಗೆ ದಾಖಲಿಸಿದರು. ಆದರೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಾಕಾರಿಯಾಗದೇ ಶಂಕರೇಗೌಡ ಸಾವನ್ನಪ್ಪಿದ್ದಾರೆ. ಸದ್ಯ ರಾಮೇಗೌಡ ಪ್ರಾಣಾಪಾಯದಿಂದ ಪಾರಾಗಿದ್ದು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.