ಮಂಗಳೂರು: ಬಡ ಯುವತಿಗೆ ಬಾಳು ನೀಡುವುದಾಗಿ ನಂಬಿಸಿ ಮದುವೆ ದಿನವೇ ವರ ಕೈಕೊಟ್ಟು ನಾಪತ್ತೆಯಾದ ವಿಲಕ್ಷಣ ಘಟನೆ ನಿನ್ನೆ ನಗರದಲ್ಲಿ ನಡೆದಿದೆ. ಸುರತ್ಕಲ್ ಸಮೀಪದ ಸರಿಪಳ್ಳ ಕಣ್ಣಗುಡ್ಡೆಯ ಬಡ ಯುವತಿಯೋರ್ವಳಿಗೆ ಬೋಂದೆಲ್ ಕೃಷ್ಣನಗರದ ಪ್ರಸಾದ್ ಎಂಬಾತನ ಜೊತೆ ವಿವಾಹ ನಿಶ್ಚಯಿಸಲಾಗಿತ್ತು.

ಅದರಂತೆ ನಿನ್ನೆ ಅಕ್ಟೋಬರ್ 28ರಂದು ಮಲ್ಲಿಕಟ್ಟೆಯಲ್ಲಿರುವ ಸುವರ್ಣ ಸಭಾಂಗಣದಲ್ಲಿ ವಿವಾಹ ನಡೆಸುವುದಾಗಿ ತೀರ್ಮಾನಿಸಲಾಗಿದ್ದು ವಿವಾಹಕ್ಕೆ ಬೇಕಾದ ಎಲ್ಲಾ ಸಿದ್ಧತೆಗಳನ್ನು ಮಾಡಲಾಗಿತ್ತು. ವಧು ಮದುವೆಯ ಸೀರೆಯುಟ್ಟು ಮಂಟಪಕ್ಕೆ ಬಂದರೂ ವರನ ಪತ್ತೆಯಿರಲಿಲ್ಲ.ಎಷ್ಟುಹೊತ್ತು ಕಾದರೂ ವರನ ಸುಳಿವಿಲ್ಲದ ಕಾರಣ, ಕುಟುಂಬಸ್ಥರು ಕಂಗಾಲಾದರು.

ಈ ಸಂದರ್ಭದಲ್ಲಿ ಸ್ಥಳೀಯ ಸಂಘಟನೆಯ ನೆರವಿನಿಂದ ಬಜಾಲ್ ಕಾವುಬೈಲ್ ನವರಾದ ರಿಕ್ಷಾ ಚಾಲಕ ರಾಮಚಂದ್ರ ಸುವರ್ಣ ಎಂಬುವವರು ಯುವತಿಯನ್ನು ಮದುವೆಯಾಗಲು ಒಪ್ಪಿಗೆ ಸೂಚಿಸಿದ ಕಾರಣ ಅದೇ ಸಭಾಂಗಣದಲ್ಲಿ ಸಂಜೆಯ ವೇಳೆ ಮದುವೆ ನೆರವೇರಿತು. ನಾಪತ್ತೆಯಾದ ವರನ ವಿರುದ್ಧ ಕದ್ರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.