ಬೆಂಗಳೂರು : ಕ್ಯಾಪ್ಸೂಲ್‌ನಂತೆ ಸಿದ್ಧಪಡಿಸಿದ ಮಾಧಕ ವಸ್ತುಗಳನ್ನು ನುಂಗಿ, ಹೊಟ್ಟೆಯೊಳಗೆ ಇರಿಸಿಕೊಂಡು ತಲುಪ ಬೇಕಾದ ಸ್ಥಳಕ್ಕೆ ತಲುಪಿದ ಬಳಿಕ ಆಪರೇಷನ್‌ ಬಳಿಕ ತೆಗೆಯುವ ಕೃತ್ಯಗಳನ್ನು ನೋಡಿದ್ದೇವೆ. ಚಾಕೋಲೆಟ್‌ನ ಸಿಪ್ಪೆಯಂತೆ ತೆಳುವಾಗಿ ಸಿದ್ಧಪಡಿಸಿ ಅಕ್ರಮ ಚಿನ್ನ ಸಾಗಿಸಿದ ಕತೆಯನ್ನು ಕೇಳಿದ್ದೇವೆ. ಆದರೆ ಗುಪ್ತಾಂಗದೊಳಗೆ ಮಾಧಕ ವಸ್ತು ಸಾಗಿಸುವ ಮೂಲಕ ಕಸ್ಚಮ್ಸ್‌ ಅಧಿಕಾರಿಗಳು ಸೇರಿ ಎಲ್ಲರನ್ನು ಬೆಚ್ಚಿ ಬೀಳಿಸಿದ ಘಟನೆಯಿದು.

ಗ್ವಾಟೆಮಾಲಾ ಮೂಲದ ಮಹಿಳೆಯೊಬ್ಬರು ಗುಪ್ತಾಂಗದ ಮೂಲಕ ಬರೋಬ್ಬರಿ 8.31 ಕೋಟಿ ರೂ. ಮೌಲ್ಯದ ಕೊಕೇನ್‌ಅನ್ನು ಅಕ್ರಮವಾಗಿ ಸಾಗಿಸುತ್ತಿದ್ದ ವೇಳೆ ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಕಸ್ಟಮ್ಸ್‌ ಅಧಿಕಾರಿಗಳಿಗೆ ಸಿಕ್ಕಿಬಿದ್ದಿದ್ದಾಳೆ.

ಮಹಿಳೆಯ ಗುಪ್ತಾಂಗದೊಳಗೆ ಸುಮಾರು 1 ಕೆಜಿ 385 ಗ್ರಾಂ ತೂಕದ ಕೊಕೇನ್‌ ಪತ್ತೆಯಾಗಿದ್ದು, ಅಧಿಕಾರಿಗಳೇ ಬೆಚ್ಚಿ ಬಿದ್ದಿದ್ದಾರೆ. ಬಂಧಿತ ಮಹಿಳೆ ಗ್ವಾಟೆಮಾಲಾದವಳಾಗಿದ್ದು, ಇಥಿಯೋಪಿಯಾ ಏರ್‌ಲೈನ್ಸ್‌ ಇಟಿ690 ವಿಮಾನದಲ್ಲಿ ಅದಿಸ್‌ ಅಬಾಬಾದಿಂದ ಬೆಂಗಳೂರಿಗೆ ಬಂದಿಳಿದ ಸಂದರ್ಭ ಬಂಧನಕ್ಕೆ ಒಳಗಾಗಿದ್ದಾಳೆ.

ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಕಸ್ಟಮ್ಸ್‌ ಅಧಿಕಾರಿಗಳು ತಪಾಸಣೆ ನಡೆಸಿದ ಸಂದರ್ಭ ಗುಪ್ತಾಂಗದಲ್ಲಿ 150ಕ್ಕೂ ಹೆಚ್ಚು ಸಣ್ಣಸಣ್ಣ ಟ್ಯೂಬ್‌ ಮಾತ್ರೆಗಳ ರೀತಿಯಲ್ಲಿ ಶೇಖರಿಸಿಟ್ಟುಕೊಂಡಿದ್ದಳು. ಪ್ಲಾಸ್ಟಿಕ್‌ನಂತಹ ವಸ್ತುವಿನಿಂದ ಕವರ್‌ ಮಾಡಿದ ಕೊಕೇನ್‌ ಕ್ಯಾಪ್ಸೂಲ್‌ಗಳು ಒಟ್ಟು 1.385 ಗ್ರಾಂ ತೂಕ ಹೊಂದಿರುವುದಾಗಿ ಕಸ್ಟಮ್ಸ್‌ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಅದಿಸ್‌ ಅಬಾಬಾದಿಂದ ವಿಮಾನ ಏರುವ ಮುಂಚೆಯೇ ಅಂದರೆ ಎರಡು ದಿನಗಳ ಮೊದಲೇ ತನ್ನ ಗುಪ್ತಾಂಗದಲ್ಲಿ ಕೊಕೇನ್‌ ಇರಿಸಿಕೊಂಡಿದ್ದಳು ಎನ್ನಲಾಗಿದೆ. ಎನ್‌ಡಿಪಿಎಸ್‌ ಕಾಯ್ದೆ ಅಡಿ ವಿದೇಶಿ ಮಹಿಳೆಯನ್ನು ಬಂಧಿಸಲಾಗಿದ್ದು, ವಿಚಾರಣೆ ನಡೆಸಲಾಗುತ್ತಿದೆ.