ಮಂಗಳೂರು :ಬೆಳ್ತಂಗಡಿ ತಾಲೂಕಿನ ಬಾರೆ ಗ್ರಾಮದ ಕೈಲಾರ ಪಿಲಿಗೂರಿನ ನಿವಾಸಿ ಜಾನ್ ಸಿಕ್ವೇರ ಎಂಬುವವರು ತನ್ನ ಸಹೋದರ ಜೋಕಿಂ ಸಿಕ್ವೇರಾ ರನ್ನು ಕಬ್ಬಿಣದ ರಾಡಿನಿಂದ ಹೊಡೆದು ಹತ್ಯೆ ಮಾಡಿರುವ ಘಟನೆ ನಡೆದಿದೆ.

ಅಣ್ಣ ತಮ್ಮ ನಡುವೆ ಆಸ್ತಿ ವಿಚಾರಕ್ಕೆ ಸಂಬಂಧಿಸಿದಂತೆ ನಿತ್ಯ ಜಗಳವಾಗುತಿತ್ತು, ಆದರೆ ಬುಧವಾರ ಮಧ್ಯರಾತ್ರಿ ಅಣ್ಣ ತಮ್ಮ ನಡುವೆ ಭೂವಿವಾದದ ಹಿನ್ನೆಲೆಯಲ್ಲಿ ಮಾತಿನ ಚಕಮಕಿ ನಡೆಯಿತು. ಕೋಪಗೊಂಡ ಅಣ್ಣ ಜಾನ್ ಸಿಕ್ವೆರಾ ಜೋಕಿಂ ಮೇಲೆ ರಾಡ್‌ನಿಂದ ಹಲ್ಲೆ ನಡೆಸಿದ. ತಲೆಗೆ ಗಂಭೀರ ಗಾಯಗೊಂಡ ಜೋಕಿಂ ಕುಸಿದು ಬಿದ್ದಿದ್ದು ಮನೆಯಲ್ಲಿದ್ದ ಇವರ ಅಕ್ಕನ ಮಗ ಅನಿಲ್ ಪಿಂಟೋ ಅಂಬ್ಯುಲೆನ್ಸ್ ತರಿಸಿ ಗಾಯಾಳುವನ್ನು ಆಸ್ಪತ್ರೆಗೆ ಸಾಗಿಸಿದರು. ಆದರೆ ಹಾದಿ ಮಧ್ಯೆ ಗಾಯಾಳು ಕೊನೆಯುಸಿರೆಳೆದರು.

ಘಟನೆಯ ಬಳಿಕ ಜಾನ್ ಸಿಕ್ವೇರ ನಾಪತ್ತೆಯಾಗಿದ್ದು, ನಿನ್ನೆ ಪೊಲೀಸರು ಆರೋಪಿಯನ್ನು ಬಂಧಿಸಿ ತನಿಖೆ ನಡೆಸುತ್ತಿದ್ದಾರೆ.