ಮಂಗಳೂರು :ನಭೋಮಂಡಲದ ಚಿದಂಬರ ರಹಸ್ಯ ಭೇದಿಸಿದರೆ, `ನಿಬುರು’ ಕಪೋಲ ಕಲ್ಪಿತ ತಲೆಬುರುಡೆ ಆಕಾರದ ದೂರಗಾಮಿ ಛಾಯಾರೂಪದ ಕ್ಷುದ್ರಶಕ್ತಿ ಅಥವಾ ಅನ್ಯಗ್ರಹ. ಕ್ರಿ.ಪೂ. 1800 ವರ್ಷಗಳ ಹಿಂದೆ ಬಾಬಿಯೋನ್ ಪೂರ್ವಜರು ಇಹಲೋಕದ ಅಧಿದೇವರು ಎಂದೇ ಭಾವಿಸಿ ಈ ಗ್ರಹವನ್ನು ಪೂಜಿಸುತ್ತಿದ್ದರು. ಅವರು ಬ್ರಹ್ಮಾಂಡದ ಸೌರಮಂಡಲದಲ್ಲಿಯೇ ಅತಿ ದೊಡ್ಡದಾದ ಗುರುಗ್ರಹವನ್ನೇ ‘ನಿಬುರು’ ಎಂದು ಕರೆಯುತ್ತಿದ್ದುದು.

ಇಂದು ದೂರಗಾಮಿ ಅನ್ಯಗ್ರಹಗಳು ಮತ್ತು ಕ್ಷುದ್ರಗ್ರಹಳನ್ನು ಪತ್ತೆ ಮಾಡಲು ವೈಜ್ಞಾನಿಕ ಸ್ಥಾವರಗಳು ಇವೆ. ಈ ಸ್ಥಾವರಗಳು ಹಲವು ರೇಡಿಯೋ ಟೆಲಿಸ್ಕೋಪ್ ಗಳು ಮತ್ತು ಸೂಪರ್ ಕಂಪ್ಯೂಟರ್ ಗಳ ಮೂಲಕ ಗ್ರಹಗಳ ಪತ್ತೆಕೆಲಸ ಮಾಡುತ್ತವೆ. ಈ ಮೂಲಕ ಹಲವಾರು ಕ್ಷುದ್ರಗ್ರಹಗಳು ಮತ್ತು ಅನ್ಯ ನಭೋವಸ್ತುಗಳನ್ನು ಈ ವರೆಗೆ ಗುರುತಿಸಲಾಗಿದೆ. ಆದರೆ, ಇವು ಭೂಮಿಗೆ ಡಿಕ್ಕಿ ಹೊಡೆಯುತ್ತವೆ ಎಂಬುದನ್ನು ಯಾವ ಶೋಧವೂ ಹೇಳಿಲ್ಲ.

ಡಿಸೆಂಬರ್ 21 ರಂದು ‘ ನಿಬುರು’ ಎಂಬ ಅನ್ಯಗ್ರಹ ಭೂಮಿಗೆ ಡಿಕ್ಕಿ ಹೊಡೆದು ಜಗತ್ ಪ್ರಳಯ ಸಂಭವಿಸಲಿದೆ ಎಂದು ಹಲವು ನಾಸ್ತಿಕ ಮಹಾಶಯರು ಬಡಬಡಿಸುತ್ತಿದ್ದಾರೆ. ಟಿವಿ ವಾಹಿನಿಗಳಲ್ಲಿ ಕಾಣಿಸಿಕೊಳ್ಳುತ್ತಿರುವ ಇವರು ಜನರನ್ನು ಭಯಭೀತಿಗೆ ದೂಡುತ್ತಿದ್ದಾರೆ. ಇದು ನಿಜಕ್ಕೂ ಅಕಾರಣ ಕಳವಳ ತರುವ ಕೆಲಸವಷ್ಟೇ ಆಗಿದೆ. ಏಕೆಂದರೆ ಇಂಥ ಕ್ಷುದ್ರಗ್ರಹಗಳು ಭೂಮಿಗೆ ಡಿಕ್ಕಿ ಹೊಡೆಯುವುದು ನೂರಕ್ಕೆ ನೂರರಷ್ಟು ಸುಳ್ಳು.

ಗ್ರಹಗಳು ಮತ್ತು ಉಪಗ್ರಹಗಳು ಚಲನೆ ಕುರಿತು ತಮ್ಮದೇ ಆದ ನಭೋ ಸಿದ್ಧಾಂತಗಳನ್ನು ಹೊಂದಿರುತ್ತವೆ. ಒಂದು ಗ್ರಹದ ಚಲನ ಸಿದ್ಧಾಂತದ ರೇಖಾಂಶದಲ್ಲಿ ಮತ್ತೊಂದು ಗ್ರಹ ಪ್ರವೇಶಿಸಲಾರದು. ದೂರಗಾಮಿ ಗ್ರಹಗಳು ತಮ್ಮ ಚಲನೆಯ ವೃತ್ತವನ್ನು ಬಿಟ್ಟು ಇತರೆ ಗ್ರಹದ ವೃತ್ತದಲ್ಲಿ ಚಲಿಸಿದರೂ ಪರಸ್ಪರ ಡಿಕ್ಕಿ ಹೊಡೆಯುವುದಿಲ್ಲ.

16ನೇ ಶತಮಾನದವರೆಗೂ ಸೌರಮಂಡಲದಲ್ಲಿ ಕೇವಲ ಏಳು ಗ್ರಹಗಳು ಇವೆ ಎಂದು ಭಾವಿಸಲಾಗಿತ್ತು. ತದನಂತರದ ವೈಜ್ಞಾನಿಕ ಸಂಶೋಧನೆಗಳಿಂದ ಯುರೇನಸ್, ನೆಫ್ಚೂನ್ ಹಾಗೂ ಫ್ಲೂಟೋ ಗ್ರಹಗಳು ಕಾಣಿಸಿಕೊಂಡವು. ಇತ್ತೀಚೆಗಷ್ಟೇ ಅನ್ಯಗ್ರಹ ಮತ್ತು ನಭೊವಸ್ತುಗಳನ್ನು ಗುರುತಿಸಲಾಯಿತು. ನಿಬುರು ಒಂದು ದೂರಗಾಮಿ ನಭೋಗ್ರಹವಾಗಿರಬಹುದು. ಆದಾಗ್ಯೂ ಇಲ್ಲಿಯ ತನಕ ಯಾವುದೇ ಅನ್ಯಗ್ರಹ ಪೃಥ್ವಿಗೆ ಡಿಕ್ಕಿ ಹೊಡೆಯುತ್ತದೆ ಎಂದು ಪ್ರಸ್ತಾಪವಾಗಿಲ್ಲ.

ಯಾವುದೇ ಅನ್ಯಗ್ರಹ ಅಥವಾ ಕ್ಷುದ್ರವಸ್ತುಗಳು ಪೃಥ್ವಿಯ ಕಕ್ಷೆಯಲ್ಲಿ ಬರಲಾರಂಭಿಸುತ್ತವೆ ಎಂದಿಟ್ಟುಕೊಳ್ಳೋಣ. ಈ ಹಾದಿಯಲ್ಲಿ ಗ್ರಹಗಳ ಮತ್ತು ಉಪಗ್ರಹಗಳ ಮಧ್ಯೆ ವಿಸ್ತಾರಗೊಂಡಿರುವ ಗುರುತ್ವಾಕರ್ಷಣೆ ಶಕ್ತಿ ಇಲ್ಲದ ಶೂನ್ಯ ಪ್ರದೇಶ ಇರುತ್ತದೆ. ಈ ಪ್ರದೇಶವನ್ನು ಕ್ರಮಿಸಲು ಅವು ವಿಫಲವಾಗಬಹುದು. ಸೌರಮಂಡಲದ ಅನೇಕ ಆಮ್ಲಗಳ ರಾಸಾಯನಿಕ ಮತ್ತು ಭೌತಿಕ ಗುಣಗಳಿಗೆ ಒಳಪಟ್ಟು ಅವು ಸುಟ್ಟು ಬುದಿಯಾಗಲೂಬಹುದು. ಹಾಗೆಯೇ ಸೌರ ಮಾರುತಗಳ ಹೊಡೆತಗಳಿಗೆ ಸಿಕ್ಕು ಛಿದ್ರವಾಗಬಹುದು. ಹೀಗೆ ಛಿದ್ರಗೊಂಡ ತುಣುಕುಗಳು ಪೃಥ್ವಿಯತ್ತ ಕ್ರಮಿಸಿದರೂ ಭೂಮಿ ಮತ್ತು ಚಂದ್ರನ ಮಧ್ಯೆ ಇರುವ ಗುರುತ್ವಾಕರ್ಶಣೆ ಇಲ್ಲದ ಶೂನ್ಯ ಪ್ರದೇಶ ಇರುತ್ತದೆ. ಅದು ಅವನ್ನು ಖಂಡಿತಾ ತಡೆಯಬಲ್ಲುದು. ಅಂಥಹ ಶೂನ್ಯ ಪ್ರದೇಶವನ್ನು ಅಕ ಚಲನ ಸಿದ್ಧಾಂತದಿಂದ ಕ್ರಮಿಸಿ ಬಂದರೂ ಪೃಥ್ವಿಯ ಮೇಲ್ಮೆ ಇರುವ ಶೇ.85 ಭಾಗ ಜಲ ಮತ್ತು ವಾಯುವು ಕ್ಷುದ್ರವಸ್ತುಗಳ ತೀವ್ರತೆಯನ್ನು ನಿಷ್ಕ್ರಿಯಗೊಳಿಸುವುದು.

ಪ್ರಳಯದ ಸುದ್ದಿಗಳಿಗೆ ಭಯಪೀಡಿತರಾದ ಆಸ್ತಿಕ ಮತ್ತು ನಾಸ್ತಿಕ ಮಹಾಶಯರು ಮರುಭೂಮಿ ಪ್ರದೇಶಗಳಲ್ಲಿ ಅಕ ವೆಚ್ಚದಲ್ಲಿ ರಕ್ಷಣಾ ಬಂಕರ್ ಗಳನ್ನು ನಿರ್ಮಿಸಿ ಒಣ ಆಹಾರ ಪದಾರ್ಥಗಳನ್ನು ಶೇಖರಿಸುತ್ತಿದ್ದಾರೆ. ಹಲವು ಏಕಶಿಲಾ ಬೆಟ್ಟಗಳ ಮೇಲೆ ಅಂದು ರಾತ್ರಿ ಕಳೆದರೆ ಯಾವುದೇ ಅವಘಡಗಳು ಸಂಭವಿಸಲಾರವು ಎಂಬ ವಿಸ್ಮಯಕಾರಿ ಸಂಗತಿಗಳು ಬೆಳಕಿಗೆ ಬರುತ್ತಿವೆ.

ಆದರೆ, 1908 ಜೂನ್ 30 ರಂದು ಸೈಬೀರಿಯಾ ಪ್ರಾಂತ್ಯದ ತುಂಗುಸ್ಕ ಪ್ರದೇಶದ ಮೇಲೆ 40 ಮೀಟರ್ ಉದ್ದದ ಮಂಜುಗಡ್ಡೆ ಆಕಾರದ ಕ್ಷುದ್ರಶಿಲೆ ಬಿದ್ದು ಈ ಪ್ರಾಂತ್ಯದ ಸುಮಾರು 50 ಕಿ ಮೀ ದುರಂತಕ್ಕೆ ಒಳಗಾಗಿದೆ. 1994 ಜುಲೈ 18 ರಂದು ಸೌರಮಂಡಲದಲ್ಲಿಯೇ ಅತಿ ದೊಡ್ಡ ಗುರುಗ್ರಹಕ್ಕೆ ಷೂಮೇಕರ್ ಲೆವಿ ಎಂಬ ಉಲ್ಕ ಶಿಲೆ ಡಿಕ್ಕಿ ಹೊಡೆದು ಸಾವಿರಾರು ಕಿ ಮೀಗಳ ಕಂದಕ ರೂಪುಗೊಂಡಿದೆ. ಇದನ್ನು ನಭೋಮಂಡಲದ ಅತಿ ದೊಡ್ಡ ಪ್ರಳಯ ಎಂದು ಹೇಳಬಹುದು.

ಅಂತಹ ಉಲ್ಕ ಶಿಲೆ ಪೃಥ್ವಿಗೆ ಡಿಕ್ಕಿ ಹೊಡೆದಿದ್ದರೆ ಪೃಥ್ವಿಯ ಮೇಲೆ ಯಾವುದೇ ಜೀವರಾಶಿ ಬದುಕುಳಿಯಲು ಸಾಧ್ಯವಾಗುತ್ತಿರಲಿಲ್ಲ. ಅಂತಹ ಉಲ್ಕಶಿಲೆ ಆಗಲಿ, ನಿಬುರುಗಳಂತಹ ಕ್ಷುದ್ರ ಅನ್ಯಗ್ರಹವಾಗಲಿ 2012ರ ಡಿಸೆಂಬರ್ 21 ರಂದು ಪೃಥ್ವಿಗೆ ಡಿಕ್ಕಿ ಹೊಡೆಯುತ್ತದೆ ಎಂಬುದು ಕೇವಲ ಕಪೋಲ ಕಲ್ಪಿತ ವಿಚಾರಷ್ಟೇ ಅಲ್ಲದೆ ಮತ್ತೇನೂ ಅಲ್ಲ. ಈ ಎಲ್ಲ ಕಾರಣಕ್ಕೆ ಪ್ರಳಯದ ಬಗ್ಗೆ ಭಯ ಬೇಡ. ಸುಮಾರು 4.5ಮಿಲಿಯನ್ ವರ್ಷಗಳ ತನಕ ಪ್ರಳಯ ಸಂಭವಿಸಲಾರದು.

2012 ಉತ್ಕ್ರಾಂತಿ ವರ್ಷವೇ ಹೊರೆತು ಪ್ರಳಯದ ಸಂಕೇತವಲ್ಲ. ಅದರಲ್ಲೂ ಕರ್ನಾಟಕದಲ್ಲಿ ಪ್ರಳಯ ಸಂಭವಿಸಿ ಯಾವುದೇ ಆಘಾತ, ಆಪತ್ತು, ವಿಪತ್ತು, ಸುನಾಮಿ, ಜಲಪ್ರಳಯ, ಭೂಕಂಪ, ಜ್ವಾಲಾಮುಖಿಗಳಂತಹ ಅವಘಡಗಳು ಎಂದಿಗೂ ಸಂಭವಿಸಲಾರವು.

ಜ್ಯೋತಿಷಿ ರಾಮಚಂದ್ರ ಆಚಾರ್ಯ