ಬೆಂಗಳೂರು : ಇಂಡೋ- ಇಸ್ರೇಲ್ ಯೋಜನೆಯಡಿ  ಅಭಿವೃದ್ಧಿ ಪಡಿಸಿದ 3 ಉತ್ಕೃಷ್ಟ ಕೇಂದ್ರಗಳಾದ ಕೋಲಾರದ ಮಾವು ಉತ್ಕೃಷ್ಟ ಕೇಂದ್ರ, ಬಾಗಲಕೋಟೆಯ  ದಾಳಿಂಬೆ  ಉತ್ಕೃಷ್ಟ ಕೇಂದ್ರ ಹಾಗೂ ಧಾರವಾಡದ ತರಕಾರಿ ಉತ್ಕೃಷ್ಟ ಕೇಂದ್ರಗಳನ್ನು ವರ್ಚುವಲ್ ಮೂಲಕ ಮುಖ್ಯಮಂತ್ರಿಗಳಾದ ಶ್ರೀ ಬಿ.ಎಸ್. ಯಡಿಯೂರಪ್ಪ ಅವರು ಬೆಂಗಳೂರಿನಲ್ಲಿಂದು ಉದ್ಘಾಟಿಸಿದರು.

ಉದ್ಘಾಟನೆ ಬಳಿಕ ಮಾತನಾಡಿದ ಮುಖ್ಯಮಂತ್ರಿಗಳು, ಕರ್ನಾಟಕ ರಾಜ್ಯವು ತೋಟಗಾರಿಕೆ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿದ್ದು, ತೋಟಗಾರಿಕೆ ಬೆಳೆಗಳು ಕೃಷಿ ಬೆಳೆಗಳಿಗಿಂತ ಹೆಚ್ಚಿನ ಲಾಭಧಾಯಕ ವಾಗಿರುವುದರಿಂದ ತೋಟಗಾರಿಕೆ ಬೆಳೆಗಳ ವಿಸ್ತೀರ್ಣ ಪ್ರತಿ ವರ್ಷವು ಹೆಚ್ಚುತ್ತಿದೆ. ರಾಜ್ಯದಲ್ಲಿ ಎಲ್ಲಾ ರೀತಿಯ ಭೌಗೊಳಿಕ ಹವಾಗುಣಗಳು ಆಯಾ ಋತುಮಾನಕ್ಕೆ ಹಮ್ಮಿಕೊಳ್ಳುವಂತೆ ಸಹಕಾರಿಯಾಗಿದ್ದು, ನಮ್ಮ ರೈತರು ಅತ್ಯುತ್ತಮ ಗುಣಮಟ್ಟದ ತೋಟಗಾರಿಕೆ ಬೆಳೆಗಳನ್ನು ಬೆಳೆಯುತ್ತಿರುತ್ತಾರೆ ಎಂದರು.

ಭಾರತವು ಇಸ್ರೇಲ್ ದೇಶವನ್ನು ಕೃಷಿ ಕ್ಷೇತ್ರದಲ್ಲಿ ಕಾರ್ಯತಂತ್ರದ ಪಾಲುದಾರನನ್ನಾಗಿ ಆಯ್ಕೆ ಮಾಡಿದ್ದು, 2006 ರಲ್ಲಿ ಭಾರತ ಸರ್ಕಾರದ ಕೃಷಿ ಸಚಿವರು ಮತ್ತು  ಇಸ್ರೇಲ್ ಸರ್ಕಾರದ ಒಡಂಬಡಿಕೆಯನ್ವಯ ಇಂಡೋ- ಇಸ್ರೇಲ್ ಕ್ರಿಯಾ ಯೋಜನೆಯನ್ನು ರೂಪಿಸಿ ಕಾರ್ಯರೂಪಕ್ಕೆ ತರಲಾಗಿದೆ. ಈ ಪಾಲುದಾರಿಕೆಯಿಂದ ಸುಧಾರಿತ ತಂತ್ರಜ್ಞಾನ ಅಳವಡಿಕೆ, ನೀರಿನ ಮಿತ ಬಳಕೆಯಿಂದ ಸಂಪನ್ಮೂಲಗಳ ಸದುಪಯೋಗ ಹಾಗೂ ಉತ್ಪಾದನೆ ಮತ್ತು ಉತ್ಪಾದಕತೆ ಹೆಚ್ಚಿಸಲು ಸಹಕಾರಿಯಾಗಿದೆ. ಈ ಹಿನ್ನೆಲೆಯಲ್ಲಿ, ಕರ್ನಾಟಕ ರಾಜ್ಯದಲ್ಲಿ ಮೂರು ಉತ್ಕೃಷ್ಟ ಕೇಂದ್ರಗಳಾದ ಮಾವು ಉತ್ಕೃಷ್ಟ ಕೇಂದ್ರ, ಕೋಲಾರ, ದಾಳಿಂಬೆ ಉತ್ಕೃಷ್ಟ ಕೇಂದ್ರ, ಬಾಗಲಕೋಟೆ ಮತ್ತು ತರಕಾರಿ ಬೆಳೆಗಳ ಉತ್ಕೃಷ್ಟ ಕೇಂದ್ರ, ಧಾರವಾಡದಲ್ಲಿ ಸ್ಥಾಪಿಸಲಾಗಿದೆ ಎಂದರು.

ಈ ಕೇಂದ್ರಗಳನ್ನು ಸುಧಾರಿತ ತಂತ್ರಜ್ಞಾನಗಳಾದ ಅಧಿಕ ಸಾಂದ್ರ ಬೇಸಾಯ ಪದ್ಧತಿ, ಪುನಃಶ್ಚೇತನ, ಮೇಲಾವರಣ ನಿರ್ವಹಣೆ, ವಿವಿಧ ಟ್ರಿಲಿಸಿಂಗ್ ಪದ್ಧತಿಗಳು, ಸ್ವಯಂಚಾಲಿತ ಹನಿ ನೀರಾವರಿ ಮತ್ತ ರಸಾವರಿ ತಂತ್ರಜ್ಞಾನಗಳ ಅಳವಡಿಕೆಯಿಂದ ಮಾವು, ದಾಳಿಂಬೆ ಹಾಗೂ ತರಕಾರಿ ಬೆಳೆಗಳ ಇಳುವರಿಯನ್ನು ಮತ್ತು ಉತ್ಪನ್ನದ ಗುಣಮಟ್ಟವನ್ನು ಹೆಚ್ಚಿಸಲು ಹಾಗೂ ಉತ್ತಮ ಗುಣಮಟ್ಟದ ಸಸಿ/ ಕಸಿಗಳನ್ನು ಒದಗಿಸಲು, ಕ್ಷೇತ್ರ ಪ್ರಾತ್ಯಕ್ಷತೆ ಹಾಗೂ ತರಬೇತಿಗಳನ್ನು ಆಯೋಜಿಸುವುದರ ಮೂಲಕ ನವೀನಾತ್ಮಕ ತಾಂತ್ರಿಕತೆಗಳನ್ನು ರೈತರಿಗೆ ತಲುಪಿಸಲು ಸ್ಥಾಪಿಸಲಾಗಿದೆ.

ಈ ಕೇಂದ್ರಗಳಲ್ಲಿ ಮೂಲಭೂತ ಸೌಕರ್ಯಗಳಾದ ಕಛೇರಿ ಕಟ್ಟಡ ಹಾಗೂ ಸುಸಜ್ಜಿತ ತರಬೇತಿ ಕೊಠಡಿ, ವಸತಿ ನಿಲಯ, ಮಣ್ಣು, ನೀರು ಮತ್ತು ಎಲೆ ವಿಶ್ಲೇಷಣಾ ಪ್ರಯೋಗಾಲಯ, ಬಯೋಡೈಜೆಸ್ಟರ್, ಎರೆ ಹುಳು ಗೊಬ್ಬರ ಘಟಕ, ಕೃಷಿ ಹೊಂಡಗಳನ್ನು ನಿರ್ಮಿಸಲಾಗಿರುತ್ತದೆ ಹಾಗೂ ಕೇಂದ್ರಗಳಿಗೆ ಅವಶ್ಯವಿರುವ ಕೃಷಿ ಪರಿಕರಗಳನ್ನು ಒದಗಿಸಲಾಗಿರುತ್ತದೆ ಎಂದು ಹೇಳಿದರು.

ಸಂದರ್ಭದಲ್ಲಿ ಉಪಮುಖ್ಯಮಂತ್ರಿಗಳಾದ ಶ್ರೀ ಗೋವಿಂದ ಎಂ ಕಾರಜೋಳ, ತೋಟಗಾರಿಕೆ ಸಚಿವರಾದ ಶ್ರೀ ಶಂಕರ್, ತೋಟಗಾರಿಕೆ ಇಲಾಖೆಯ  ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.

ತೋಟಗಾರಿಕೆ ಬೆಳೆಗಳ ಇಂಡೋ- ಇಸ್ರೇಲ್ ಉತ್ಕೃಷ್ಟ ಕೇಂದ್ರಗಳ ಕುರಿತ ಹೆಚ್ಚುವರಿ ಮಾಹಿತಿ

1. ಮಾವು ಉತ್ಕೃಷ್ಟ ಕೇಂದ್ರ, ಕೋಲಾರ

ಇಂಡೋ- ಇಸ್ರೇಲ್ ಕೃಷಿ ಯೋಜನೆಯಡಿ ಈ ಕೇಂದ್ರದ ಸ್ಥಾಪನೆಗಾಗಿ ಭಾರತ ಸರ್ಕಾರದಿಂದ ರೂ. 198 ಲಕ್ಷಗಳನ್ನು ಹಾಗೂ ರಾಜ್ಯ ಸರ್ಕಾರದಿಂದ ರೂ.360 ಲಕ್ಷಗಳನ್ನು ಕೇಂದ್ರದ ನಿರ್ವಹಣೆಗಾಗಿ ಒದಗಿಸಲಾಗಿರುತ್ತದೆ.

ಕೇಂದ್ರದ ಚಟುವಟಿಕೆಗಳು:

• ಅತ್ಯಧಿಕ / ಅಧಿಕ ಸಾಂದ್ರತೆ ಬೇಸಾಯ ತಾಕಿನಲ್ಲಿ ನಾಲ್ಕು ಪ್ರಮುಖ ವಾಣಿಜ್ಯ ತಳಿಗಳಾದ ಬಾದಾಮಿ, ಮಲ್ಲಿಕ, ದಶಹರಿ ಮತ್ತು ತೋತಾಪುರಿ ತಳಿಗಳನ್ನು 4 ವಿವಿಧ ಸಾಂದ್ರತೆಯಲ್ಲಿ ಪ್ರಾತ್ಯಕ್ಷಿಸಲಾಗಿದೆ.
• ಸ್ವಯಂಚಾಲಿತ ಹನಿ-ನೀರಾವರಿ ಹಾಗೂ ರಸಾವರಿ ಪದ್ದತಿಯನ್ನು ಅಳವಡಿಸಲಾಗಿದೆ.
• ವಿದೇಶಿ ತಳಿಗಳ ತಾಕು : ಹೊರ ದೇಶದ ಪ್ರಮುಖವಾದ ನಾಲ್ಕು ತಳಿಗಳಾದ ಟಾಮಿ ಅಟ್ಕಿನ್ಸ್, ಲಿಲ್ಲಿ, ಮಾಯಾ ಹಾಗೂ ಕೆಂಟ್ ತಳಿಗಳನ್ನು ಪರಿಚಯಿಸಲು ಈ ತಾಕನ್ನು ಅಭಿವೃದ್ಧಿ ಪಡಿಸಲಾಗಿದೆ.
• ಬಹುಬ್ರೂಣ ಮಾವಿನ ತಳಿಗಳ ತಾಕು:ಎರಡು ಬಹುಬ್ರೂಣ ತಳಿಗಳಾದ ಸೈಬರ್ ಮತ್ತು 4/9 ತಳಿಗಳನ್ನು ಇಸ್ರೇಲ್ ದೇಶದಿಂದ ಆಮದು ಮಾಡಿಕೊಂಡು ಕೇಂದ್ರದಲ್ಲಿ ಪ್ರಾತ್ಯಕ್ಷಿಸಲಾಗುತ್ತಿದೆ.
• ಸವರುವುಕೆ ಹಾಗೂ ಪುನ:ಶ್ಚೇತನ – ಹಳೆಯ ಹಾಗೂ ಅನುತ್ಪಾದಕ ಮರಗಳನ್ನು ಗುರುತಿಸಿ ಅವುಗಳನ್ನು ಪುನಶ್ಚೇತನಗೊಳಿಸಲಾಗಿದೆ
• ತರಬೇತಿ: ನಿರುದ್ಯೋಗಿ ಯುವಕ ಯುವತಿಯರಿಗೆ, ಅಧಿಕಾರಿ ಹಾಗೂ ಉದ್ದಿಮೆದಾರರಿಗೆ ಮಾವು ಬೆಳೆಯ ವೈಜ್ಞಾನಿಕ ಕೃಷಿ ಪದ್ದತಿಗಳು, ಕೋಯ್ಲೋತ್ತರ ನಿರ್ವಹಣೆ ಹಾಗೂ ರಫ್ತಿನ ಬಗ್ಗೆ ತರಬೇತಿಗಳನ್ನು ನೀಡಲಾಗುತ್ತಿದೆ.

2. ದಾಳಿಂಬೆ ಉತ್ಕೃಷ್ಟ ಕೇಂದ್ರ, ಬಾಗಲಕೋಟೆ

ಇಂಡೋ- ಇಸ್ರೇಲ್ ಕೃಷಿ ಯೋಜನೆಯಡಿ ಈ ಕೇಂದ್ರದ ಸ್ಥಾಪನೆಗಾಗಿ ಭಾರತ ಸರ್ಕಾರದಿಂದ ರೂ. 343 ಲಕ್ಷಗಳನ್ನು ಹಾಗೂ ರಾಜ್ಯ ಸರ್ಕಾರದಿಂದ ರೂ.156 ಲಕ್ಷಗಳನ್ನು ಕೇಂದ್ರದ ನಿರ್ವಹಣೆಗಾಗಿ ಒದಗಿಸಲಾಗಿರುತ್ತದೆ.

ಕೇಂದ್ರದ ಚಟುವಟಿಕೆಗಳು:

ಈ ಕೇಂದ್ರವನ್ನು ದಾಳಿಂಬೆಯ ಇಳುವರಿ ಮತ್ತು ಗುಣಮಟ್ಟವನ್ನು ಹೆಚ್ಚಿಸಲು ಇಸ್ರೇಲ್ ತಂತ್ರಜ್ಞಾನ ಮಾದರಿಯಲ್ಲಿ ಅಧಿಕಸಾಂದ್ರಬೇಸಾಯ, ವೈಜ್ಞಾನಿಕ ಸವರುವಿಕೆ, ಸ್ವಯಂಚಾಲಿತ ಹನಿ-ನೀರಾವರಿ ಹಾಗೂ ರಸಾವರಿ ಪದ್ದತಿ ಹಾಗೂ ಕೇಂದ್ರದ ಪ್ರಾತ್ಯಕ್ಷತೆ ತಾಕುಗಳಲ್ಲಿ ಇಸ್ರೇಲ್ ತಂತ್ರಜ್ಞಾನದ T, Y ಮತ್ತು Single Pole ಟ್ರೇಲಿಸಿಂಗ್ ಸಿಸ್ಟಮ್ ಅಳವಡಿಸಿಕೆ, ಉತ್ತಮ ಗುಣಮಟ್ಟದ ರೋಗಮುಕ್ತ ದಾಳಿಂಬೆ ಸಸ್ಯಗಳನ್ನು ಉತ್ಪಾದನೆಮಾಡಿ ರೈತರಿಗೆ ಒದಗಿಸಲು ಹಾಗು ತರಬೇತಿ ಮೂಲಕ ರೈತರಿಗೆ ತಂತ್ರಜ್ಞಾನಗಳನ್ನು ತಲುಪಿಸಲು ಸ್ಥಾಪಿಸಲಾಗಿದೆ.

ಈ ತಂತ್ರಜ್ಞಾನಗಳನ್ನು ರೈತರಿಗೆ ತಲುಪಿಸುವ ಸಲುವಾಗಿ ಹಾಗೂ ಕೇಂದ್ರದ ಸುತ್ತಮುತ್ತಲಿನ ಹಳ್ಳಿಗಳಲ್ಲಿ  ಈ ತಂತ್ರಜ್ಞಾನಗಳನ್ನು ಅಳವಡಿಸಿ ರೈತ ಸಮುದಾಯದ ಆರ್ಥಿಕ ಸ್ಥಿತಿ ಹಾಗೂ ಜೀವನ ಮಟ್ಟವನ್ನು ಸುಧಾರಿಸಲು ಉದ್ದೇಶಿಸಲಾಗಿದೆ.

3. ತರಕಾರಿ ಬೆಳೆಗಳ ಉತ್ಕೃಷ್ಟ ಕೇಂದ್ರ, ಧಾರವಾಡ

ಇಂಡೋ- ಇಸ್ರೇಲ್ ಕೃಷಿ ಯೋಜನೆಯಡಿ ಈ ಕೇಂದ್ರದ ಸ್ಥಾಪನೆಗಾಗಿ ಭಾರತ ಸರ್ಕಾರದಿಂದ ರೂ. 500 ಲಕ್ಷಗಳನ್ನು ಹಾಗೂ ರಾಜ್ಯ ಸರ್ಕಾರದಿಂದ ರೂ.260 ಲಕ್ಷಗಳನ್ನು ಕೇಂದ್ರದ ನಿರ್ವಹಣೆಗಾಗಿ ಒದಗಿಸಲಾಗಿರುತ್ತದೆ.

ಕೇಂದ್ರದ ಚಟುವಟಿಕೆಗಳು:

ಈ ಕೇಂದ್ರವು ಅತ್ಯುತ್ತಮ ಗುಣಮಟ್ಟದ ಸಸಿಗಳನ್ನು ಉತ್ಪಾದಿಸಲಿದ್ದು, ಇಸ್ರೇಲ್ ಮಾನದಂಡಗಳೊಂದಿಗೆ ಉತ್ತಮ ಪದ್ದತಿಗಳನ್ನು ಪ್ರಾತ್ಯಕ್ಷಿಸಲಾಗುತ್ತಿದೆ. ಇಸ್ರೇಲ್ ತರಕಾರಿ ಬೆಳೆಗಳ ತಳಿಗಳನ್ನು ಸಹ ಪರಿಚಯಿಸಲಿದೆ ಹಾಗೂ ನೆಮಟೋಡ್ ರಹಿತ ತಳಿಗಳ ಪ್ರಾತ್ಯಕ್ಷಿತೆಯನ್ನು ಮಾಡಲಾಗುತ್ತಿದೆ.  ಇದಕ್ಕಾಗಿ ಈ ಕೆಳಕಂಡ ಸೌಕರ್ಯಗಳನ್ನು ನಿರ್ಮಿಸಲಾಗಿದೆ.

• ಉತ್ತಮ ಗುಣಮಟ್ಟದ ರೋಗಮುಕ್ತ ತರಕಾರಿ ಸಸಿಗಳನ್ನು ಮಣ್ಣು ರಹಿತ ಮಾದ್ಯಮದಲ್ಲಿ ಉತ್ಪಾದನೆ ಮಾಡಿ ರೈತರಿಗೆ ಒದಗಿಸಲು ಮೂಲಭೂತವಾಗಿ ಅಗತ್ಯವಿರುವ ಹೈಟೆಕ್ ಪಾಲಿಹೌಸ್ ಅನ್ನು 1500 ಚ.ಮೀ. ವಿಸ್ತೀರ್ಣದಲ್ಲಿ ನಿರ್ಮಿಸಲಾಗಿದೆ.
• ಇಸ್ರೇಲ್ ತಂತ್ರಜ್ಙಾನ ಮಾದರಿಯಲ್ಲಿ ಸಂರಕ್ಷಿತ ರಚನೆಗಳಾದ ನೈಸರ್ಗಿಕ ಪಾಲಿಹೌಸ್ (2 ಸಂ.), ಕೀಟ ನಿರೋಧಕ ನೆರಳು ಪರದೆ ಮನೆ (2ಸಂ.) ಹಾಗೂ ವಾಕ್ ಇನ್ ಟನಲ್ (4ಸಂ.) ಗಳಲ್ಲಿ ವಿವಿಧ ತರಕಾರಿ ಬೆಳೆಗಳ ಪ್ರತ್ಯಕ್ಷಿತೆಯನ್ನು ಹಮ್ಮಿಕೊಳ್ಳಲಾಗಿದೆ.
• ನಿಖರ ಬೇಸಾಯ ಪದ್ದತಿಯಲ್ಲಿ ತೆರೆದ ಕ್ಷೇತ್ರದಲ್ಲಿ ತರಕಾರಿ ಪ್ರಾತ್ಯಕ್ಷಿತೆ: ಏರು ಮಡಿ, ಹನಿ ನನೀರಾವರಿ, ಮಲ್ಚಿಂಗ್ ಹಾಗೂ ರಸಾವರಿ ತಾಂತ್ರಿಕತೆಗಳನ್ನು ಉಪಯೋಗಿಸಿ ವಿವಿಧ ತರಕಾರಿ ಬೆಳೆಗಳ ಪ್ರತ್ಯಕ್ಷಿತೆ ತಾಕುಗಳನ್ನು ಸಜ್ಜುಗೊಳಿಸಲಾಗಿದೆ.
• ಸ್ವಯಂಚಾಲಿತ Weather Station ಅನ್ನು ಅಳವಡಿಸಲಾಗಿದೆ.

ಭವಿಷ್ಯದ ಉದ್ದೇಶಿತ ಚಟುವಟಿಕೆಗಳು:

• ಹಳ್ಳಿಗಳನ್ನು ದತ್ತು ಪಡೆದು ಈ ಕೇಂದ್ರಗಳಲ್ಲಿ ಅಭಿವೃದ್ಧಿ ಪಡಿಸಿದ ತಂತ್ರಜ್ಞಾನಗಳ ಪ್ರಾತ್ಯಕ್ಷಿತೆ ಕೈಗೊಳ್ಳುವುದು.
• ಬೆಳೆಯ ಇಳುವರಿಯನ್ನು ಹೆಚ್ಚಿಸಲು ಅವಶ್ಯವಿರುವ ಜೈವಿಕ ಪರಿಕರಗಳನ್ನು ಉತ್ಪಾದಿಸಿ ಕೇಂದ್ರದ ಆದಾಯವನ್ನು ವೃದ್ಧಿಸುವುದು.
• ವೆಚ್ಚ ಮತ್ತು ಅಗತ್ಯಕ್ಕೆ ಅನುಗುಣವಾಗಿ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸುವುದು.