ಮಂಗಳೂರು : ಪೊಲೀಸ್ ಹುದ್ದೆಗೆ ಆಯ್ಕೆಯಾಗಲು ಸದೃಢ ಕಾಯವೇ ಮುಖ್ಯ ಮಾನದಂಡ. ವಿಪರ್ಯಾಸವೆಂದರೆ, ಡೊಳ್ಳು ಹೊಟ್ಟೆಯೇ ಪೊಲೀಸ್ ವೃತ್ತಿಯ ಸಂಕೇತವಾಗಿಬಿಟ್ಟಿದೆ. ಪಾತಕಿಗಳನ್ನು ಬೆನ್ನಟ್ಟಿ ಸೆರೆಹಿಡಿಯುವ ಹೊಣೆ ಹೊತ್ತಿರುವ ಪೊಲೀಸರಿಗೆ ಫಿಟ್ ನೆಸ್ ಅತ್ಯಗತ್ಯ. ಆದರೆ, ಗುಂಬಜಾಕೃತಿಯ ಹೊಟ್ಟೆ ಹೊತ್ತು ತಿರುಗುವ ಪೊಲೀಸರನ್ನು ಕಳ್ಳ – ಖದೀಮರು ಅಣಕಿಸುವಂತಾಗಿದೆ. ಸೇವೆಗೆ ಸೇರ್ಪಡೆಯಾದ ಸಿಬ್ಬಂದಿಗೆ ವರ್ಷಗಟ್ಟಲೆ ಕಠಿಣ ದೈಹಿಕ ತರಬೇತಿ ನೀಡಿ, ಯಾವುದೇ ಪರಿಸ್ಥಿತಿಯನ್ನು ಎದುರಿಸಲು ಸಜ್ಜಾಗುವಂತೆ ದೇಹವನ್ನು ಹುರಿಗೊಳಿಸುತ್ತಿರುವುದೇನೋ ನಿಜ. ಆದರೆ, ವೃತ್ತಿಯಲ್ಲಿ ನೆಲೆಯೂರುತ್ತಿದ್ದಂತೆ ಕ್ರಮೇಣ ಅವರ ಉದರ ಪರ್ವತ ಬೆಳೆಯುತ್ತಾ ಹೋಗುತ್ತದೆ. ಇದು ಅವರ ಕಾರ್ಯಕ್ಷಮತೆಯ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ. ಪೊಲೀಸ್ ಇಲಾಖೆಗೂ ಇದೊಂದು ಸವಾಲಾಗಿ ಪರಿಣಮಿಸಿದೆ. ಪೊಲೀಸರ ಹೊಟ್ಟೆಯ ಸುತ್ತಳತೆ ತಗ್ಗಿಸುವ ನಿಟ್ಟಿನಲ್ಲಿ ಇಲಾಖೆಯು ಆಗಾಗ ಸುತ್ತೋಲೆ ಹೊರಡಿಸುತ್ತಲೇ ಇರುತ್ತದೆ. ಇಷ್ಟಾಗಿಯೂ ಈ ‘ಹೊಟ್ಟೆನೋವು’ ನಿವಾರಣೆಯಾಗಿಲ್ಲ.

ಹಾಗಂತ, ಈ ಉದರ ಮುಜುಗರಕ್ಕೆ ಪೊಲೀಸರೊಬ್ಬರನ್ನೇ ದೂಷಿಸುವುದು ಸರಿಯಲ್ಲ. ಪೊಲೀಸ್ ಇಲಾಖೆಯ ಒಟ್ಟಾರೆ ಕಾರ್ಯ ಸ್ವರೂಪವೇ ಈ ಸಮಸ್ಯೆಗೆ ಮೂಲ. ರಾಷ್ಟ್ರೀಯ ಗ್ರಾಮೀಣ ಆರೋಗ್ಯ ಮಿಷನ್ ಪ್ರಕಾರ, ದೇಶದಲ್ಲಿ ಶೇ. 60 ರಷ್ಟು ಪೊಲೀಸರು ಸ್ಥೂಲಕಾಯಕ್ಕೆ ಒಳಗಾಗಿದ್ದಾರೆ. ಶೇ.20 ರಷ್ಟು ಮಂದಿ ಡಯಾಬಿಟಿಸ್ ಮತ್ತು ಶೇ. 24 ರಷ್ಟು ಮಂದಿ ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿದ್ದಾರೆ. 2002 ರಿಂದ 2012 ರ ಅವಧಿಯಲ್ಲಿ 1341 ಪೂಲೀಸ್ ಸಿಬ್ಬಂದಿ ಅನಾರೋಗ್ಯದಿಂದ ಮೃತಪಟ್ಟಿದ್ದಾರೆ. ಕೆಲಸದ ಒತ್ತಡ ತಾಳಲಾರದೆ 167 ಮಂದಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಮಧುಮೇಹ, ರಕ್ತದೊತ್ತಡಕ್ಕೆ ಒಳಗಾಗುವವರ ಸಂಖ್ಯೆ ಪ್ರತಿ ವರ್ಷ ಹೆಚ್ಚುತ್ತಲೇ ಇದೆ. ದೈಹಿಕ- ಮಾನಸಿಕ ಒತ್ತಡ, ನಿದ್ದೆಯ ಕೊರತೆ, ಆಹಾರ ಸೇವನೆ ಕ್ರಮದಲ್ಲಿ ಏರುಪೇರಿನಿಂದಾಗಿ ಪೊಲೀಸ್ ಸಿಬ್ಬಂದಿ ಬೊಜ್ಜು ಮುಂತಾದ ಅನಾರೋಗ್ಯ ಪೀಡನೆಗೆ ಗುರಿಯಾಗುತ್ತಿದ್ದಾರೆ. ವಿವಿಐಪಿಗಳ ರಕ್ಷಣೆ, ಗಲಭೆ ನಿಯಂತ್ರಣ ಮುಂತಾದ ಸಂದರ್ಭಗಳಲ್ಲಿ ಅವರು ಪಾಳಿಯೆ ಪರಿವೆ ಇಲ್ಲದೆ ಹಗಲು- ರಾತ್ರಿ ಕಾರ್ಯ ನಿರ್ವಹಿಸಬೇಕಾಗುತ್ತದೆ. 12- 18 ಗಂಟೆಗಳ ಡ್ಯೂಟಿ ಪೊಲೀಸರಿಗೆ ಸಾಮಾನ್ಯವಾಗಿದೆ. ಹೀಗಿರುವಾಗ, ವ್ಯಾಯಾಮದಲ್ಲಿ ತೊಡಗಿ ದೇಹವನ್ನು ಬೊಜ್ಜು ರಹಿತವಾಗಿ ಇರಿಸಲು ಇವರಿಗೆ ಸಮಯವಾದರೂ ಎಲ್ಲಿದೆ.

ಅಮೆರಿಕ, ಬ್ರಿಟನ್ ನಂತಹ ದೇಶಗಳಲ್ಲಿ ಆರಕ್ಷಕರ ದೈಹಿಕ ಸಕ್ಷಮತೆಗೆ ಸಂಬಂಧಿಸಿ ಕಟ್ಟುನಿಟ್ಟಿನ ಕ್ರಮ ಅನುಸರಿಸಲಾಗುತ್ತದೆ. ಹೊಟ್ಟೆ ಬೆಳೆಸಿಕೊಂಡವರನ್ನು ಸೇವೆಯಿಂದ ವಜಾ ಮಾಡಲಾಗುತ್ತದೆ. ಹೈಟೆಕ್ ಪೊಲೀಸ್ ಠಾಣೆ ನಿರ್ಮಿಸಿ, ಅತ್ಯಾಧುನಿಕ ಸಶ್ತ್ರಾಸ್ತ್ರ, ಪೂರೈಸಿ ಸುಸಜ್ಜಿತ ವಾಹನಗಳನ್ನು ನಿಯೋಜಿಸಿದರಷ್ಟೇ ಸಾಲದು. ಸಿಬ್ಬಂದಿಯ ಆರೋಗ್ಯವಂತ ದೇಹದ ಕಡೆಗೂ ಸರಕಾರ ಕಾಳಜಿ ವಹಿಸಬೇಕು. ಮುಂಬಯಿಯ ಬಹುತೇಕ ಠಾಣೆಗಳಲ್ಲಿ ಇತ್ತೀಚೆಗೆ ಜಿಮ್ ಕೇಂದ್ರಗಳನ್ನು ಸ್ಥಾಪಿಸಲಾಗಿದೆ. ಠಾಣೆಯ ಸಿಬ್ಬಂದಿ ಪ್ರತಿದಿನ ಕನಿಷ್ಠ ಅಧರ್ ಗಂಟೆ ಜಿಮ್ನಲ್ಲಿ ದೈಹಿಕ ಕಸರತ್ತು ನಡೆಸಲು ಅವಕಾಶ ಕಲ್ಪಿಸಲಾಗಿದೆ. ಈ ವ್ಯವಸ್ಥೆ ಅಳವಡಿಸಿದ ಬಳಿಕ ಅಲ್ಲಿಯ ಸಿಬ್ಬಂದಿಯ ಹೊಟ್ಟೆಯ ಗಾತ್ರ ಕಡಿಮೆಯಾಗುತ್ತಿದೆ. ಇಂಥ ಜಿಮ್ ಮತ್ತು ಯೋಗ ಕೇಂದ್ರಗಳನ್ನು ನಮ್ಮ ರಾಜ್ಯದ ಎಲ್ಲ ಠಾಣೆಗಳಲ್ಲಿ ಸ್ಥಾಪಿಸಬೇಕು. ಅಗತ್ಯ ಇರುವ ಸಿಬ್ಬಂದಿಯನ್ನು ನೇಮಿಸಿ ಪೊಲೀಸರ ಮೇಲಿನ ಕೆಲಸದ ಒತ್ತಡವನ್ನು ತಗ್ಗಿಸಬೇಕು. ದೈಹಿಕ ವ್ಯಾಯಾಮ ಪೊಲೀಸರ ಕರ್ತವ್ಯ ನಿರ್ವಹಣೆಯ ಒಂದು ಭಾಗ ಎಂದು ಪರಿಗಣಿಸಬೇಕು.