ಸುಳ್ಯ : ಆಲೆಟ್ಟಿ ಗ್ರಾಮದ ಬೊಳ್ಳೂರು ಎಂಬಲ್ಲಿ ಆಸ್ತಿ ವಿವಾದದಿಂದಾಗಿ ಯುವಕನೋರ್ವ ಆತನ ಚಿಕ್ಕಪ್ಪನಿಂದಲೇ ಕೊಲೆಯಾದ ಘಟನೆ ಮಂಗಳವಾರ ಬೆಳಿಗ್ಗೆ ನಡೆದಿದೆ. ಬೊಳ್ಳೂರು ಬೆಳ್ಳಂಪಾರೆಯ ಅಪ್ಪಯ್ಯ ನಾಯ್ಕ ಎಂಬವರ ಪುತ್ರ ಸದಾಶಿವ ನಾಯ್ಕ(೨೬) ಮೃತ ವ್ಯಕ್ತಿ ಯಾಗಿದ್ದು, ಈತ  ಹಾಗು ಈತನ ಚಿಕ್ಕಪ್ಪ ನಾರಾಯಣ ನಾಯ್ಕ ಈ ಇಬ್ಬರ ಕುಟುಂಬದ ನಡುವೆ ಆಸ್ತಿ ವಿಷಯವಾಗಿ ಆಗಾಗ್ಗೆ  ಕಲಹ ನಡೆಯುತ್ತಿದ್ದು ನಿನ್ನೆ ತಾರಕಕ್ಕೇರಿ ಕೊಲೆಯಲ್ಲಿ ಅಂತ್ಯಗೊಂಡಿದೆ.

ಕೊಲೆ ಆರೋಪಿನಾರಾಯಣ ನಾಯ್ಕ ಸುಳ್ಯ ರೋಟರಿ ಶಾಲೆಯಲ್ಲಿ ಅಟೆಂಡರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದು, ಮಂಗಳವಾರ ಬೆಳಿಗ್ಗೆ  ಸದಾಶಿವ ನಾಯ್ಕ ನಾರಾಯಣ ನಾಯ್ಕರನ್ನು ಆಸ್ತಿ ವಿಚಾರವಾಗಿ ವಿಚಾರಿಸಲೆಂದು ಅವರ ಮನೆ ಸಮೀಪ ರಸ್ತೆಯಲ್ಲಿ ಕಾದು ಕುಳಿತ್ತಿದ್ದು ಆ ವೇಳೆ ಶಾಲೆಗೆ ಹೋರಟ  ನಾರಾಯಣ ನಾಯ್ಕರು ಎದುರಾಗಿ ಇಬ್ಬರ ನಡುವೆ ಮಾತಿನ ಚಕಮಕಿ, ಹೊಡೆದಾಟ ಸಂಭವಿಸಿದೆ.ಈ ವೇಳೆ ತಮ್ಮ ಬಳಿ ಇದ್ದ ಚೂರಿಯಿಂದ ನಾರಾಯಣ ನಾಯ್ಕರು ಸದಾಶಿವರ ಹೊಟ್ಟೆಗೆ ಇರಿದಿದ್ದು, ತೀವ್ರ ಗಾಯಗೊಂಡ ಅವರನ್ನು ರಿಕ್ಷಾದಲ್ಲಿ ಸುಳ್ಯ ಸರ್ಕಾರಿ ಆಸ್ಪತ್ರೆಗೆ ಕರೆತರಲಾಯಿತಾದರು ಮಾರ್ಗ ಮಧ್ಯೆ ಸದಾಶಿವ ಮೃತಪಟ್ಟಿದ್ದಾರೆ.

ಸದಾಶಿವ ನಾಯ್ಕರಿಗೆ ವರ್ಷದ ಹಿಂದೆಯಷ್ಟೇ ಮದುವೆಯಾಗಿದ್ದು, ಅದೇ ಗ್ರಾಮದ ಕೋಲ್ಚಾರಿನ ಕುಡುಂಬಿ ನಿವಾಸಿ ಮಂಜುಳಾರನ್ನು ಅವರು ವಿವಾಹವಾಗಿದ್ದರು. ಮಂಜುಳಾ ಈಗ ತುಂಬು ಗರ್ಭಿಣಿ. ಘರ್ಷಣೆಯ ವೇಳೆ ನಾರಾಯಣ ನಾಯಕರ ಪುತ್ರಿ ರಮ್ಯಾ ಕೂಡ ಸ್ಥಳದಲ್ಲಿದ್ದು ಗಾಯಗೊಂಡ ಆಕೆಯನ್ನು ಆಸ್ಪತ್ರೆ ದಾಖಲಿಸಲಾಗಿದೆ. ಸುಳ್ಯ ಪೊಲೀಸ್ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.