ಮಂಗಳೂರು: ನಗರದಲ್ಲಿ ನಟೋರಿಯಸ್‌ ರೌಡಿ ಕಾಲಿಯಾ ರಫೀಕ್‌ (35) ಮೇಲೆ ಗುಂಡಿನ ದಾಳಿ ನಡೆಸಿ ಬರ್ಬರವಾಗಿ ಹತ್ಯೆ ಮಾಡಿರುವ ಘಟನೆ ಮಂಗಳೂರನ್ನ ಮತ್ತೆ ಬೆಚ್ಚಿ ಬೀಳಿಸಿದೆ.

ರೌಡಿ ರಫೀಕ್‌ ಹಾಗೂ ಆತನ ಸಂಬಂಧಿ ಸೇರಿದಂತೆ ನಾಲ್ವರು ಕಾರಿನಲ್ಲಿ ಮಂಗಳೂರಿನತ್ತ ಬರುತ್ತಿದ್ದಾಗ ಉಪ್ಪಳದ ರೌಡಿ ನೂರ್ ಅಲಿ ತಂಡ ದಾಳಿ ನಡೆಸಿದೆ. ಇಲ್ಲಿಯ ಕೋಟೆಕಾರು ಪೆಟ್ರೋಲ್ ಬಂಕ್‌ನಲ್ಲಿ ಅಡ್ಡಗಟ್ಟಿದ ನೂರ್‌ ಅಲಿ ತಂಡ ಮೊದಲು ಕಾರಿಗೆ ಲಾರಿಯಿಂದ ಡಿಕ್ಕಿ ಹೊಡೆಸಿದ್ದಾರೆ ಎನ್ನಲಾಗಿದೆ.

ಆಗ ರಫೀಕ್‌ ಮತ್ತು ತಂಡದವರು ಕೂಡಲೇ ಕಾರಿನಿಂದ ಓಡಲು ಯತ್ನಿಸಿದ ರಫೀಕ್‌ ಮೇಲೆ ಶೂಟೌಟ್‌ ನಡೆಸಿದ್ದಲ್ಲದೆ, ಮಾರಾಕಾಸ್ತ್ರಗಳಿಂದ ಕೊಚ್ಚಿ ನೂರ್‌ ಅಲಿ ತಂಡ ಬರ್ಬರವಾಗಿ ಹತ್ಯೆ ಮಾಡಿದೆ.

ದಾಳಿ ವೇಳೆ ರಫೀಕ್‌ ಸಂಬಂಧಿ ಜಾಹಿದ್ ಎಂಬುವನ ಕೈಗೆ ಪೆಟ್ಟಾಗಿದ್ದು, ಈತನನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.

ಮಂಗಳೂರಿನತ್ತ ಬರುತ್ತಿದ್ದ ರಫೀಕ್ ಕಾರನ್ನು ಹಿಂಬಾಲಿಸುತ್ತಿದ್ದ ನೂರ್‌‌ ಅಲಿ ತಂಡ, ಕೋಟೆಕಾರು ಪೆಟ್ರೋಲ್ ಬಂಕ್‌ ಬಳಿ ಈ ಕೃತ್ಯವೆಸಗಿದೆ.

ಇನ್ನು ಹತ್ಯೆಯಾಗಿರುವ ಉಪ್ಪಳದ ಕಾಲಿಯಾ ರಫೀಕ್ ವಿರುದ್ಧ ಕರ್ನಾಟಕ, ಕೇರಳದಲ್ಲಿ ಕೊಲೆ, ಕೊಲೆಯತ್ನ ಸುಲಿಗೆ ಪ್ರಕರಣ ಸೇರಿದಂತೆ ಸುಮಾರು 45 ಕ್ಕೂ ಹೆಚ್ಚು ಪ್ರಕರಣಗಳಿವೆ ಎಂದು ತಿಳಿದು ಬಂದಿದೆ.