ಮಂಗಳೂರು,: ಪಿ.ವಿ. ಐತಾಳ ಅವರ ಇಂಗ್ಲಿಷ್‌ ಯಕ್ಷಗಾನ ತಂಡ ‘ಯಕ್ಷನಂದನ’ ವತಿಯಿಂದ ಶುಕ್ರವಾರ ನಗರದ ಪುರಭವನದಲ್ಲಿ ಕರ್ನಾಟಕ ಯಕ್ಷಗಾನ ಬಯಲಾಟ ಅಕಾಡೆಮಿಯ ನೂತನ ಅಧ್ಯಕ್ಷ ಮಲ್ಪೆ ಲಕ್ಷ್ಮೀನಾರಾಯಣ (ಎಂ.ಎಲ್‌.) ಸಾಮಗ ಅವರನ್ನು ಸನ್ಮಾನಿಸಲಾಯಿತು.

ಸಾಹಿತಿ ಏರ್ಯ ಲಕ್ಷ್ಮೀನಾರಾಯಣ ಆಳ್ವ ಅವರು ಸಮ್ಮಾನ ಸಮಾರಂಭ ಅಧ್ಯಕ್ಷತೆ ವಹಿಸಿದ್ದರು. ಸುಬ್ರಹ್ಮಣ್ಯ ಮಠದ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮೀಜಿ ಅವರು ಆಶೀರ್ವಚನಗೈದರು. ಕಸಾಪ ಮಾಜಿ ಅಧ್ಯಕ್ಷ ಹರಿಕೃಷ್ಣ ಪುನರೂರು ಅವರು ಮುಖ್ಯ ಅತಿಥಿಯಾಗಿದ್ದರು.

ಸಮ್ಮಾನ ಸ್ವೀಕರಿಸಿ ಮಾತನಾಡಿದ ಮಲ್ಪೆ ಸಾಮಗರು ಬಯಲಾಟ ಅಕಾಡೆಮಿಯ ನೂತನ ಅಧ್ಯಕ್ಷನಾದ ನನಗೆ ಜವಾಬ್ದಾರಿ ಹೆಚ್ಚಿದೆ, ಎಲ್ಲಾ ಕಲಾವಿದರ ಏಳಿಗೆಗೆ ಸರಕಾರದ ನಿರೀಕ್ಷೆಗಳನ್ನು ಗಮನದಲ್ಲಿಟ್ಟುಕೊಂಡು ಮುಂದಿನ ಮೂರು ವರ್ಷಗಳ ಅವಧಿಯಲ್ಲಿ ಕಾರ್ಯಕ್ರಮಗಳನ್ನು ರೂಪಿಸಲಾಗುವುದು ಎಂದು ಅವರು ಹೇಳಿದರು.

ಡಾ| ಸತ್ಯಮೂರ್ತಿ ಐತಾಳ ಸ್ವಾಗತಿಸಿದರು. ಜಿ.ಕೆ. ಭಟ್‌ ಅವರು ಶುಭಾಶಂಸನೆಗೈದರು. ಯಕ್ಷನಂದನ ಸಂಚಾಲಕ ಸಂತೋಷ ಐತಾಳ ಪ್ರಸ್ತಾವನೆಗೈದರು. ವಾಣಿ ಸತ್ಯಮೂರ್ತಿ ಐತಾಳ ಅಭಿನಂದನಾ ಪತ್ರ ವಾಚಿಸಿದರು.