ಮಂಗಳೂರು : ಮಾರ್ಚ್ 7 ರಂದು ನಡೆಯಲಿರುವ ಮಂಗಳೂರು ಮಹಾನಗರ ಪಾಲಿಕೆ ಸೇರಿದಂತೆ  ನಗರ ಸ್ಥಳೀಯ ಸಂಸ್ಥೆಗಳಿಗೆ ನಡೆಯುವ ಚುನಾವಣೆಗೆ ದ.ಕ. ಜಿಲ್ಲಾಡಳಿತ ಸರ್ವಸನ್ನದ್ಧವಾಗಿದ್ದು ಮುಕ್ತ ಹಾಗೂ ಶಾಂತಿಯುತ ಮತದಾನಕ್ಕೆ ಎಲ್ಲಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಜಿಲ್ಲಾಧಿಕಾರಿ ಎನ್‌. ಪ್ರಕಾಶ್‌ ಬುಧವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.

ಜಿಲ್ಲೆಯಲ್ಲಿ ಒಟ್ಟು 544 ಮತಗಟ್ಟೆಗಳಲ್ಲಿ ಮತದಾನ ನಡೆಯಲಿದೆ. 84 ಮತಗಟ್ಟೆಗಳನ್ನು ಅತಿಸೂಕ್ಷ್ಮಹಾಗೂ 70 ಮತಗಟ್ಟೆಗಳನ್ನು ಸೂಕ್ಷ್ಮ ಎಂದು ಗುರುತಿಸಲಾಗಿದೆ. ಮಂಗಳೂರು ಮಹಾನಗರ ಪಾಲಿಕೆಯಲ್ಲಿ 31 ಸೂಕ್ಷ್ಮ ಹಾಗೂ 61 ಅತಿಸೂಕ್ಷ್ಮ, ಮೂಡಬಿದಿರೆ ಪುರಸಭೆಯಲ್ಲಿ 2 ಸೂಕ್ಷ್ಮ ಹಾಗೂ 2 ಅತಿಸೂಕ್ಷ್ಮ, ಉಳ್ಳಾಲ ಪುರಸಭೆಯಲ್ಲಿ ತಲಾ 3 ಸೂಕ್ಷ್ಮ ಹಾಗೂ ಅತಿಸೂಕ್ಷ್ಮ, ಬಂಟ್ವಾಳ ಪುರಸಭೆಯಲ್ಲಿ 12 ಸೂಕ್ಷ್ಮ ಹಾಗೂ 11 ಅತಿಸೂಕ್ಷ್ಮ, ಪುತ್ತೂರು ಪುರಸಭೆಯಲ್ಲಿ 10 ಸೂಕ್ಷ್ಮ ಹಾಗೂ 2 ಅತಿಸೂಕ್ಷ್ಮ, ಬೆಳ್ತಂಗಡಿ ಪಟ್ಟಣ ಪಂಚಾಯತ್‌ನಲ್ಲಿ 3 ಸೂಕ್ಷ್ಮಹಾಗೂ 2 ಅತಿಸೂಕ್ಷ್ಮ ಸುಳ್ಯ ಪಟ್ಟಣ ಪಂಚಾಯತ್‌ನಲ್ಲಿ 9 ಸೂಕ್ಷ್ಮಹಾಗೂ 3 ಅತಿಸೂಕ್ಷ್ಮ ಮತಗಟ್ಟೆಗಳೆಂದು ಪರಿಗಣಿಸಲಾಗಿದೆ. ಪ್ರಮುಖ ಮತಗಟ್ಟೆಗಳಲ್ಲಿ ವೀಡಿಯೋ ಚಿತ್ರೀಕರಣ ಮಾಡಲಾಗುವುದು ಎಂದವರು ವಿವರಿಸಿದರು.

ಈ ಬಾರಿ 4,63,791 ಮತದಾರರು ತಮ್ಮ ಹಕ್ಕು ಚಲಾಯಿಸಲಿದ್ದು, ಮತಗಟ್ಟೆಯಲ್ಲಿ ಕಾರ್ಯ ನಿರ್ವಹಿಸಲು ಒಟ್ಟು 3,000 ಮಂದಿ ಅಧಿಕಾರಿಗಳನ್ನು ಹಾಗೂ ಸಿಬ್ಬಂದಿಗಳನ್ನು ನೇಮಿಸಲಾಗಿದ್ದು ಅವರ ಪ್ರಯಾಣಕ್ಕಾಗಿ 84 ಬಸ್ಸುಗಳನ್ನು, 22 ಜೀಪುಗಳನ್ನು ಹಾಗೂ 27 ಮ್ಯಾಕ್ಸಿ ಕ್ಯಾಬ್ ಗಳನ್ನು ಒದಗಿಸಲಾಗಿದೆ. ಪ್ರತಿ ಮತಗಟ್ಟೆಯಲ್ಲೂ ಶಾಂತಿಯುತವಾದ ಮತದಾನ ನಡೆಯುವಂತೆ ನೋಡಿಕೊಳ್ಳಲು ಬಿಗಿ ಭದ್ರತೆಯನ್ನು ಕೈಗೊಳ್ಳಲಾಗಿದೆ. ಪ್ರತಿಮತಗಟ್ಟೆಗಳಿಗೆ ತಲಾ ಓರ್ವ ಅಧ್ಯಕ್ಷಾಧಿಕಾರಿ ಹಾಗೂ 3 ಮಂದಿ ಮತಗಟ್ಟೆಯ ಅಧಿಕಾರಿಗಳು ಹಾಗೂ ಓರ್ವ ಗ್ರೂಪ್‌ ಡಿ ಸಿಬಂದಿಯನ್ನು ನಿಯೋಜಿಸಲಾಗಿದೆ. ಇದಲ್ಲದೆ ಮತಗಟ್ಟೆ ಸಿಬಂದಿಯನ್ನು ಮತಗಟ್ಟೆಗಳಿಗೆ ಕಳುಹಿಸಿ ವಾಪಸ್‌ ಕರೆತರುವ ಬಗ್ಗೆ 84 ಬಸ್‌ಗಳು, 22 ಜೀಪು, 27 ಮ್ಯಾಕ್ಸಿಕ್ಯಾಬ್‌ ವ್ಯಾನ್‌ಗಳನ್ನು ವ್ಯವಸ್ಥೆಗೊಳಿಸಲಾಗಿದೆ.

ಮತದಾನ ಮಕ್ತ ಹಾಗೂ ಶಾಂತಿಯುತವಾಗಿ ನಡೆಯುವ ನಿಟ್ಟಿನಲ್ಲಿ ಎಲ್ಲಾ ಎಚ್ಚರಿಕೆಗಳನ್ನು ವಹಿಸಲಾಗಿದ್ದು ಗರಿಷ್ಠ ಭದ್ರತೆ ಮಾಡಲಾಗಿದೆ. ಸೂಕ್ಷ್ಮ ಹಾಗೂ ಅತಿಸೂಕ್ಷ್ಮ ಮತಗಟ್ಟೆಗಳಿಗೆ ಪೊಲೀಸ್‌ ಹೆಡ್‌ಕಾನ್ಸ್‌ಟೆಬಲ್‌, ಕಾನ್ಸ್‌ಟೆಬಲ್‌ಗ‌ಳನ್ನು ಹಾಗೂ ಸಾಮಾನ್ಯ ಮತಗಟ್ಟೆಗಳಿಗೆ ಕಾನ್‌ಸ್ಟೆàಬಲ್‌ ಹಾಗೂ ಗೃಹರಕ್ಷಕದಳ ಸಿಬಂದಿಗಳನ್ನು ನಿಯೋಜಿಸಲಾಗಿದೆ. 68 ಪೊಲೀಸ್‌ ಸೆಕ್ಟರ್‌ ತಂಡಗಳನ್ನು ನಿಯೋಜಿಸಲಾಗಿದೆ. ಮಂಗಳೂರು ಮಹಾನಗರ ಪಾಲಿಕೆಗೆ 47, ಮೂಡಬಿದಿರೆಗೆ 3, ಉಳ್ಳಾಲಕ್ಕೆ 3, ಬಂಟ್ವಾಳಕ್ಕೆ 6, ಪುತ್ತೂರಿಗೆ 4, ಬೆಳ್ತಂಗಡಿಗೆ 2 ಹಾಗೂ ಸುಳ್ಯ ಪಟ್ಟಣ ಪಂಚಾಯತ್‌ಗೆ 3 ತಂಡಗಳನ್ನು ನಿಯೋಜನೆ ಮಾಡಲಾಗಿದೆ.

ದ.ಕ. ಜಿಲ್ಲೆಯಲ್ಲಿ 320 ಎಚ್‌ಸಿ ಹಾಗೂ ಪಿಸಿ, 25 ಎಎಸ್‌ಐ, 18 ಪಿಎಸ್‌ಐ, 7 ಮಂದಿ ಪಿಐ, 2 ಡಿವೈಎಸ್‌ಪಿ, 75 ಗೃಹರಕ್ಷಕದಳ ಸಿಬಂದಿಯನ್ನು ನಿಯೋಜಿಸಲಾಗಿದೆ. ಮಂಗಳೂರು ಕಮಿಷನರೆಟ್‌ ವ್ಯಾಪ್ತಿಯಲ್ಲಿ 3 ಡಿಸಿಪಿ, 5 ಎಸಿಪಿ, 14 ಪಿಐ 25 ಪಿಎಸ್‌ಐ, 61 ಎಎಸ್‌ಐ, 480 ಎಚ್‌ಸಿ ಮತ್ತು ಪಿಸಿ, 150 ಗೃಹರಕ್ಷಕದಳ ಸಿಬಂದಿಗಳನ್ನು ನಿಯೋಜಿಸಲಾಗಿದೆ. ಉತ್ತರ ಕನ್ನಡದಿಂದ 100, ಉಡುಪಿಯಿಂದ 100, ಚಿಕ್ಕಮಗಳೂರಿನಿಂದ 50 ಸಿಬಂದಿಗಳನ್ನು ತರಿಸಿಕೊಳ್ಳಲಾಗಿದೆ. ಕೆಎಸ್‌ಆರ್‌ಪಿ 8 ಪ್ಲಟೂನ್‌ಗಳನ್ನು ನಿಯೋಜಿಸಲಾಗಿದೆ ಎಂದವರು ಹೇಳಿದರು.