ಮಂಗಳೂರು : ವ್ಯಕ್ತಿಯೋರ್ವನನ್ನು ಮರದ ಸೊಂಟೆಯಿಂದ ಮುಖಕ್ಕೆ ಹೊಡೆದು ಕೊಲೆ ಮಾಡಿದ ಘಟನೆ ಫೆಬ್ರವರಿ 13ರ ಬುಧವಾರ ರಾತ್ರಿ ನಡೆದಿದೆ. ಕೊಲೆಯಾದ ವ್ಯಕ್ತಿ ಮುಡ್ಕೂರು ಸಮೀಪದ ಸಂಕಲಕರಿಯದ ನಿವಾಸಿ ಯಶವಂತ ಮಡಿವಾಳ(38).  ಬಜ್ಪೆ ಠಾಣಾ ವ್ಯಾಪ್ತಿಯಲ್ಲಿರುವ ಕಿನ್ನಿಪದವು  ಶ್ರೀ ಮಹಾಕಾಳಿ ದೈವಸ್ಥಾನದ ಬುಧವಾರ ಕೋಲಕ್ಕೆ ಬಂದಿದ್ದ ಈತ ನಾಪತ್ತೆಯಾಗಿದ್ದ.

ನಾಪತ್ತೆಯಾದ ಯಶವಂತ ಮಡಿವಾಳನ ರಕ್ತಸಿಕ್ತವಾದ ಮೃತ ದೇಹ ಗುರುವಾರ ಮಧ್ಯಾಹ್ನದ ವೇಳೆಗೆ ಕಿನ್ನಿಪದವು ಮಹಾಕಾಳಿ ದೈವಸ್ಥಾನದ ಸಮೀಪದ ಧರ್ಮರಾಜ ಎಂಬರಿಗೆ ಸೇರಿದ ನಿರ್ಮಾಣಹಂತದ ಮನೆಯೊಂದರಲ್ಲಿ ಪತ್ತೆಯಾಗಿದೆ. ದವಡೆಗೆ ಮರದ ಸೊಂಟೆಯಿಂದ ಹೊಡೆದು ಕೊಲೆ ಮಾಡಲಾಗಿದ್ದು, ಈ ಹೊಡೆತಕ್ಕೆ ದವಡೆಯಿಂದ ಹಲ್ಲುಗಳು ಕಳಚಿದೆ. ಯಶವಂತನ ಮೈಯಲ್ಲಿ ಬ್ರೇಸ್ ಲೆಟ್, ಚಿನ್ನದ ಸರ ಇದ್ದು ಇವುಗಳೊಂದಿಗೆ ಮೊಬೈಲ್ ಕೂಡ ಕಳವು ಮಾಡಲಾಗಿದೆ.

ಈತನಿಗೆ ಸವಿತಾ ಸಲ್ಯಾನ್‌ ಎನ್ನುವವರೊಂದಿಗೆ 5ವರ್ಷದ ಹಿಂದೆ ವಿವಾಹವಾಗಿ,  ಮೂರುವರ್ಷದ ಚರಿಷ್ಮಾ ಎಂಬ ಮಗಳಿದ್ದಾಳೆ. ಕೊಲೆಯಾದ ವ್ಯಕ್ತಿಗೆ ವಿಪರೀತ ಮದ್ಯ ಸೇವನೆ,ಗುಟ್ಕಾದ ಚಟವಿದ್ದು, ಕೊಲೆಗೆ ನಿಖರ ಕಾರಣ ತಿಳಿದು ಬಂದಿಲ್ಲ